Tokeketale Dia Sala Waendelo W’eyoyo

¹ Onde wɛ nangaka sala waendelo w’eyoyo? Apandjudi efula nangaka. Ondo wɛ tôkaka wɔma l’etatelo, djekoleko lam’akalolayɛ dia tenda anto waki kɔmɛnya saki k’efula lam’akanyahomana ntondo. Koko lo yɛdikɔ ‘yamboyokeketala l’ekimanyielo ka Nzambi kaso dia tɛkɛta dikambo dia lokumu l’ɔlɔlɔ’ lo salaka waendelo w’eyoyo, ondo wɛ akambe dia mɛna woho wele olimu ɔsɔ wɔdu ndo l’etombelo w’ɛlɔlɔ. (1 Tes. 2:⁠2) Ngande wokokiyɛ mbeya ntsha olimu ɔsɔ?

² Mɛtɛ, diendelo di’oyoyo tshikitana efula la dia ntondo. Lo diendelo di’oyoyo sho sawolaka l’onto leyaso, aha lahateye, ndo tongaka mɛtɛ wɔdu efula sawola l’onto lambotɛnaka. Sho kondjaka ɛlɔlɔ wa mamba lo ndjashaka tshɛ l’olimu ɔsɔ: waendelo w’eyoyo kokaka ndjokoma lo mbeka l’anto akɔ Bible ndo vɔ pama.

³ Lam’asambishaso lo luudu la luudu, sho pomanaka tena efula l’anto waki kondjasha lo losango laso lam’akatete mbala ya ntondo. Ko lande na atetemalaso la ntshɔ dia towaenda na? Sho mbeyaka dia akambo wele l’anto tshikitanaka ndo ndjokomaka ko onto laki oko kombidjaka yimba, kânga lakatone losango, ndjɛnya saki mbala kekina. Lam’ele sho mbeyaka ngasɔ, toyalɔngɔsɔlɛ dimɛna ndo tɔlɔmbɛ dia kondja ɛlɔmbwɛlɔ ka Jehowa woho w’anto pokɛ lotui lo kɛnɛ kayotota.

⁴ Naka, l’olimu wa lo luudu la luudu, sho nangaka sambisha anto waki kɔmɛnya kânga yema ya saki mbala ka ntondo, kete hoke kalola dia tenda wanɛ tshɛ wakahokɛ lotui lo losango la Diolelo?​—⁠Etsha 10:​34, 35.

⁵ Efula l’atei aso waya lo mɛtɛ ɛlɔ kɛnɛ nɛ dia opandjudi ɔmɔtshi akatshɔka dia towaenda tena la tena aha la mboka yɛnyi. Naka ɔsɔku mbediɔ yambola wate: ‘Naa dionga diakamɛnya otsha le opandjudi ɔsɔ oma l’etatelo na? Onde laketawɔ losango la Diolelo kam’akamalioke? Onde lakaliɔnyɔla?’ Sho la dia ngɛnangɛna nɛ dia opandjudi wakakalola dia ndjotenda akatɛnyi ate sho sunganaka nyomendama nto, ko ‘akakeketala l’ekimanyielo ka Nzambi,’ akaye lakaso ndo akamɛ tetsha awui wa mɛtɛ. Ko kayotota dia wanɛ wɛnya yema ya saki l’etatelo ko ndjoyangaka oko tolawɔlawɔ l’ɔkɔngɔ na? Ekɔ ohomba efula dia sho mongaka la yimba ya mɛnaka akambo la sso di’ɔlɔlɔ, oko adiɛnya ɛnyɛlɔ kayela kɛnɛ.

⁶ La pindju ka pɛ, apandjudi ahende wa amato wakasambishaka l’ɔsɛsɛ ko vɔ pomana la osekaseka ɔmɔtshi la pusupusu. Nde akalongola periodikɛ ndo akatɛ akadiyɛso dia vɔ ntshɔ lakande Lushi la Lomingu layela. Vɔ wakakome lɛkɔ lo wonya wakawokana, koko kanga luudu ka omoto akawatɛ ɔnɛ nde bu l’etena ka sawola. Koko, nde akâlake ɔnɛ nde ayonga l’etena lomingu layaye. Akadiyɛso kombetawɔ ɔnɛ nde ayolɛnya dakanu sɔ, koko lam’akawaye nto mama kakɔ akâkongaka. Wekelo wakatatɛ, ndo ehamelo wa omoto ɔsɔ waki diambo efula. Nde kombiviya la ntshɔ lo nsanganya tena la tena ko l’ɔkɔngɔ l’olimu w’esambishelo. Kakianɛ nde ambobatizama.

⁷ Toke Etshina Omako Sawo dia Ntondo: Tena efula, sho mbikaka etshina ka diendelo di’oyoyo dia dimɛna lo sawo dia ntondo. Tohokɛ lotui le ɔtɛkɛtshi aso. Atande na? Onde nde ndjashaka lo ɛtɛmwɛlɔ? Onde nde ndjashaka l’akambo w’atshunda w’anto? wa diewo? w’ɔkɔndɔ w’anto? wa dihole diodjashiso? L’ekomelo ka sawo, sho kokaka mboka dimbola dimɔtshi di’ona paka kanyiya ndo mbôlaka dia ndjosawola la nde lo dikambo dia okadimwelo washa Bible lam’ayotoya nto.

⁸ Ɛnyɛlɔ, naka ɔtɛkɛtshi aso ndjashaka lo daka diasha Bible dia paradiso la nkɛtɛ, kete sawo dikina diendana la dikambo sɔ kokaka sungana. Naka tayanga ntshɔ ko sho mombola ɔnɛ: “Ngande wakokaso ndjashikikɛ ɔnɛ Nzambi ayokotsha daka diande na?” Ko ndjokotsha ɔnɛ: “Ondo dimi mbeyaka ndja nto lam’ayonga nkumbo k’otondo lawɔ ko ndjonyɛnya okadimwelo washa Bible lo dimbola sɔ.”

⁹ Naka onto akɔ hɛnyisha saki lo dikambo dimɔtshi ndamɛ, kete sho kokaka mboka dimbola dimɔtshi l’atei a wanɛ watanema lo toho tele lo lɛkɛ la komelo l’Olimu Aso wa Diolelo ko sho kamba lawɔ oko etshina ka sawo diaso dia mbala kekina.

¹⁰ Tofunde Awui wa Mɛtɛ: Awui wafundaso lo nɔtɛ ya luudu la luudu pombaka monga mɛtɛ ndo kokele. Tofunde lokombo la adrɛsɛ w’ɔtɛkɛtshi aso kam’amɔso la le nde. Tatokanyiyake numɛlɔ ya luudu ndo lokombo l’ɔsɛsɛ lokanyiya ko funda: tende dimɛna kana awui akɔ wekɔ mɛtɛ. Tofunde awui amɔtshi wendana l’onto akɔ, dikambo diakatasawudi la nde, avɛsa wakatadjisha, la kana ekanda wakatotshike ndo wembola wayotoyokadimula mbala kekina. Tofunde ndo lushi la wonya wakatasawudi la nde ndo etena kakatokanyi dia mɛnana nto. Lam’ele awui tshɛ wambofundama lo fishi, tatokishishake! Tokidje lo dihole dimɔtshi dia diomba. Tokanyiya onto akɔ ndo tokanyiya yoho yayototosala mbala kekina.

¹¹ Tatohɛke Oyango Aso: Ntondotondo, tosale tshɛ dia ɔtɛkɛtshi aso ngɛnangɛna lo monga la lɔngɛnyi ndo la wangasanu. Tɛnya ɔnɛ sho ndjashaka le nde l’otondo, aha la mbekesanɛ la nde amboleka. L’ɔkɔngɔ, towohole wembola wakatoke mbala ketshi. Tolonge lokanyi lande dimɛna ndo towoke losaka l’otema ɔtɔi dia elembetshiyelo ande. L’ɔkɔngɔ towɛnya lo na ele lokanyi la Bible ohomba efula. Naka kokaka, tɔ̂tɔlɛ otsha lo kanyi ya woho ɔsɔ lo dibuku Ewo Katɔla Otsha lo Lɔsɛnɔ la Pondjo. Tohɔ l’ɔlɔlɔ tshɛ ɔnɛ oyango aso wa ntondo lo diendelo di’oyoyo ele tatɛ mbeka l’onto Bible.

¹² Ɔtɛkɛta wokɛma hwe wa lo dibuku Ewo akakimanyiya efula l’atei aso dia ‘keketala’ lo mbetsha anto Bible ndo dia keketsha ambeki akɔ lo vɔ ntshɔ lo nsanganya ndo mbɔtɔ l’ɔlɔngɔswamelo waki Jehowa. Ntondo, takakongɛka ɔnɛ anto watokeka tshanda mɔtshi la ntondo ka sho ndjowaeta dia vɔ sangana la so. Kakianɛ, ambeki efula wɔtɔ lo nsanganya kam’atatɛwɔ mbeka ko wohama esadi esadi.

¹³ Pami kɛmɔtshi la wadiɛnde wakasambisha osekande la l’olimu. Lam’akɛnya onto akɔ saki, ɔnangɛso la wadiɛnde wakɔsɛngɔla dia mbeka la nde Bible lo dibuku Ewo. Ko wonya akɔ, vɔ wakokeketsha dia nde ntshɔ lo nsanganya, lɛnɛ ayondotokondja ekadimwelo lo wembola ande efula. Onto akɔ kombetawɔ paka wekelo oto, koko nde akamɛ ndo mbeka mbala hiende lo lomingu ndo akatatɛ ntshɔ tena tshɛ lo nsanganya lo Mbalasa ka Diolelo.

¹⁴ Tokambe la Biukubuku Kakɔna Katɔlɔmba Nzambi?: Lo losanganya la distrikɛ “Akɛndji wa Wɔladi a Nzambi,” takalongola biukubuku Kakɔna Katɔlɔmba Nzambi? Biukubuku shɔ kimanyiyaka dia tatɛ mbeka Bible l’anto woka Nzambi wɔma oyadi ambeyi wa mukanda w’efula mbewɔ kana bu. Wetshelo w’otondo wekɔ lɔkɔ wohola atshina a wetshelo wa lo Bible. Okanda ɔsɔ ekɔ ehomɔ ka dimɛna efula dia mbewoya anto ewo ka Nzambi. Yɔ nembetshiyaka awui wa mɛtɛ lo yoho yokɛma hwe ndo ya wɔdu efula yokokiso sho tshɛ monga l’akoka wa kamba la yɔ dia mbetsha anto kɛnɛ katɔlɔmba Nzambi. Mɛtɛ, apandjudi efula wayonga la diɛsɛ dia mbetsha onto Bible l’ekimanyielo ka biukubuku shɔ.

¹⁵ Ondo anto amɔtshi wɛna ɔnɛ vɔ bu l’etena ka mbeka dibuku Ewo wayolanga sawolaka yema lo mbekaka biukubuku Katɔlɔmba. Kɛnɛ kayoweka ayowâmbia efula. Lo ndjɛkɛ hiende kana shato tsho, vɔ wayokondja okadimwelo lo wembola wayambola anto oma ko ɛnɔnyi nkama: Ele Nzambi? Ele Diabolo? Asangoya Nzambi lo dikambo dia nkɛtɛ? Elɛwɔ Diolelo diaki Nzambi? Ngande wakokayɛ mbishola ɔtɛmwɛlɔ wa mɛtɛ? Kânga mbalembetshiya biukubuku yakɔ awui wa mɛtɛ l’ɛtɛkɛta wa wɔdu, losango lele lɔkɔ lekɔ la nkudu efula. Yɔ yekɔ l’atshina w’akambo wayɔsɛdingolaka dikumanyi la wanɛ walanga batizama ndo yɔ kokaka kimanyiya dia takula nna dia ntondo ko ndjeka wekelo wa lotshimola l’ekimanyielo ka dibuku Ewo.

¹⁶ Dia sɛngɔla onto lo mbeka la nde Bible lo diendelo di’oyoyo, sho mbeyaka mbuta tsho ɔnɛ: “Onde wɛ mbeyaka dia naka wɛ ndjaombɛ kânga taahe tongana toto wɛ ayokoka kondja okadimwelo lo dimbola dimɔtshi dia lo Bible di’ohomba efula?” L’ɔkɔngɔ tombole dimbola dimɔtshi l’atei a wɛnɛ wele l’etatelo ka wekelo ɔmɔtshi wa lo biukubuku yakɔ. Ɛnyɛlɔ, naka tekɔ lo tɛkɛta l’osombe w’onto sho kokaka mbuta shate: “Sho mbeyaka ɔnɛ Yeso akakɔnɔya anto lo nshi ya ntondo. Ko lo nshi yayaye, kakɔna kayondosalɛ akanga wa hemɔ? esombe? anto wambovɔ na?” Sho tanaka okadimwelo wa wembola ɛsɔ lo wekelo 5. Dimbola diayela nɛ mbeyaka kotola yambalo y’onto layasha l’awui w’ɔtɛmwɛlɔ: “Onde Nzambi nongaka alɔmbɛlɔ tshɛ?” Wekelo 7 mbishaka okadimwelo. Ase nkumbo wayolanga mbeya: “Kakɔna kalɔmba Nzambi oma le ambutshi l’ana?” Vɔ wayokieya lo mbeka wekelo 8. Wembola ekina wekɔ wele oko: “Onde anto wambovɔ kokaka salɛ wanɛ wasɛna kɔlɔ?” (wekelo 11); “Lande na kayata ɛtɛmwɛlɔ efula ɔnɛ Kristo mbayelawɔ?” (wekelo 13); ndo “Kakɔna kahombayɛ sala dia monga ɔngɛnyi wa Nzambi?” (wekelo 16).

¹⁷ Tatotshimbatshimbake dia Sala Waendelo w’Eyoyo: Nshi ngana yahombaso konga dia ndjosala diendelo di’oyoyo na? Apandjudi amɔtshi kalolaka l’ɔkɔngɔ wa lushi ɔtɔi kana nshi hiende. Akina kalolaka ko lushi lakɔ la dikɔlɔ dia yɔɔ! Onde amboleka esadi? Tɛnamaka tena efula di’oko anto hawambe dikambo sɔ. Mbala efula, opandjudi mbahomba mɛnaka akambo la sso di’ɔlɔlɔ ndo keketala yema. Tende awui amɔtshi wakatshama.

¹⁸ Opandjudi ɔmɔtshi w’ɛnɔnyi 13 akatasambishaka lo luudu la luudu ɛnyinde ko amato ahende watasembola ekolo. Lam’akandohɔ ɔnɛ vɔ tokeketshaka dia sambishaka anto oyadi lo dihole diakɔna diewɔ, nde akatɛkɛtsha amato akɔ l’ɔsɛsɛ. Vɔ waketawɔ losango la Diolelo ndo vɔ akɔ ahende wakalongola dibuku ɔtɔi ɔtɔi dia Ewo. Ɔnangɛso l’ɔlɔngɔlɔngɔ akɔshi adrɛsɛ awɔ, akatshu dia towaenda l’ɔkɔngɔ wa nshi hiende ndo akamɛ mbeka la wɔ Bible l’onto ndo l’onto.

¹⁹ Kadiyɛso kɛmɔtshi, nde lawɔ nto, mbɔsaka tɛdikɔ dia kalola la tosawola l’ɔtɛkɛtshi ande lomingu layela. Koko lushi ɔtɔi kana nshi hiende l’ɔkɔngɔ wa sawo diawɔ dia ntondo, nde mbetaka la tawendji dia mbosha periodikɛ katɛkɛta dikambo diakawasawola mbala ketshi. Nde totɛka onto ate: “Sawo nɛ diakakotola yambalo yami ko lakakani nte wɛ ayolanga diâla. Hakoke sawola la yɛ kakianɛ koko layoya Lushi la Sato l’ɔkɔngɔ a midi oko akatokana. Dakanu diaso dieke paka ngasɔ?”

²⁰ Etena kɛnya onto saki k’awui wa mɛtɛ, sho kokaka monga l’eshikikelo ɔnɛ nde ayohomana la wekamu lo yoho mɔtshi kana kina. Lo kalolaka esadi l’ɔkɔngɔ wa sawo diaso dia ntondo, tayowokeketsha dia mbokimanyiya lo nde shika tanga la ntondo ka tɔsɛngiya t’ase nkumbo kande, t’angɛnyi waleka mbokana la nde, ndo t’anto akina.

²¹ Dihonga ekɔ dionga di’ohomba efula dia kondja etombelo l’olimu wa waendelo w’eyoyo. Ngande wokokiso monga ladiɔ na? Ɔpɔstɔlɔ Paulo kadimulaka dimbola sɔ lam’atande ɔnɛ sho ‘keketalaka’ dia mbewoya akina lokumu l’ɔlɔlɔ ‘l’ekimanyielo ka Nzambi kaso.’ Naka sho nangaka pama lo dikambo sɔ, kete tɔlɔmbɛ dia kondja ekimanyielo ka Jehowa. Ko, la diɔtɔnganelo la alɔmbɛlɔ aso, towese saki tshɛ yɛnya anto. Jehowa ayɔtshɔkɔla weolo aso mɛtɛ!

[Caption on page 3]

[Box on page 3]

Woho wa Kondja Etombelo oma lo Waendelo w’Eyoyo

■ Tɛnya dia sho ndjashaka la tshondo ndo l’otema ɔtɔi le anto.

■ Tɔsɔnɛ dikambo dimɔtshi di’oma lo Bible diakotola yambalo dia sawola.

■ Tokake etshina ka diendelo di’oyoyo tena tshɛ.

■ Totetemale la kanyiya onto akɔ l’ɔkɔngɔ wa kakitɔna la nde.

■ Tokalole l’ɔkɔngɔ wa lushi ɔtɔi kana nshi hiende dia mbesa saki.

■ Tatohɛke dia oyango aso ele dia tatɛ mbeka l’anto Bible.

■ Tɔlɔmbɛ dia kondja ekimanyielo woho wa sho keketala l’olimu.