Ekɔ Ɔlɔlɔ Efula Sho Mongaka Laawɔ Nshi Tshɛ!
1 Aya ɛnɔnyi akumi, anangɛso efula wa l’Erɔpɛ wa l’Ehotwelo ka wonya takawakokaka nsangana lo sɛkɛ. Ohokanyiya ɔlɔ waki lawɔ lushi lakawasangana kâmɛ lam’akawakondja lotshungɔ!
2 Enda kɛnɛ kakafunde omendji ɔmɔtshi w’otshimbedi lo dikambo di’etshumanelo kɛmɔtshi kakandatshu a tembola: “Lushi la Hende la dikɔlɔ, lâsɔ ko leke ka koma, mashinyi washa edungu lo luudu akalana. Loonge l’ekama lakalɔka l’andja, ndo lo mbalasa aki tshitshi ka mamba ka 5°C. Anangɛso wakalɔtɛ akɔti wa tshitshi, tambala lo kingo, atapa wa ponde (gants) l’anya, fulɛ ndo sabata ya tshitshi. Ndoko lakakoke mbifola Bible kande dia ndjela nɛ dia anya waki lokata loto. Lo lɔyɛnga, lɛnɛ akimi lɔlɔtshi dikɔti diami, tshitshi kakambɔtɔ polo lo weka ndo edinga wakatombaka oma l’onyɔ lam’akamatɛkɛtaka. Koko, dui diakamambia efula ele: dimi komboka kânga onto ɔtɔi akiyana. Vɔ tshɛ wakate ɔnɛ waki l’ɔngɛnɔngɛnɔ dia monga laawɔ!” Anangɛso asɔ kokanyiya kânga yema dia mbetsha losanganya!
3 Onde Ndo Sho Mbele Ngasɔ? Onde sho ngɛnangɛnaka efula dia monga la lotshungɔ la nsanganaka kâmɛ lomingu tshɛ? Kana onde sho mbɔtɔka lo nsanganya paka naka akambo tshɛ wekɔ dimɛna? Mbeyaka monga wolo dia mbɔtɔka tena tshɛ ndo sho mbeyaka mbetsha l’ɔkɔkɔ ɔmɔtshi w’oshika. Koko, tokanyiya wanɛ wele l’atei aso waya esombe, wele la hemɔ, la dikɔmɔ, walɛmba l’olimu wa wonya w’otondo kana wele l’ɛkɛndɛ wa weke koko vɔ mongaka laawɔ suke la nshi tshɛ nɛ dia vɔ mbeyaka ohomba wa nsanganya. Toyele bɛnyɛlɔ di’amɛna sɔ!—Enda lo Luka 2:37.
4 Toyale la mbekelo ka sukɛ ɔtɛmwɛlɔ wa mɛtɛ lo mbɔtɔka lo nsanganya tshɛ, tatɛ oma lo losanganya la tshitshɛ la wekelo wa dibuku polo lo nsanganya ya weke ya distrikɛ. Bonde kahombaso mbɔsa nsanganya shɔ la nɛmɔ na? Nɛ dia Nzambi mbakatodjangɛ dia nsanganaka. Koko, ɛkɔkɔ ekina w’ohomba wekɔ. Sho tshɛ tekɔ l’ohomba wa kondja ɛlɔlɔ wa wetshelo w’oma le Nzambi ndo ekimanyielo ka nyuma k’ekila. Lo nsanganya mbakondjaso diangɔ sɔ. (Mat. 18:20) Ndo nto, sho shikikalaka oma lo woho wakeketshanyaso l’anangɛso.—Heb. 10:24, 25.
5 Lam’akahilɔ Yeso, Petero akate ate: ‘Ombetsha, ndeka ɔlɔlɔ sho tshikala lendo.’ (Luka 9:33) Sho pombaka monga la saki ka ngasɔ ka nsanganya yaso y’Akristo. Eelo, ekɔ ɔlɔlɔ efula sho mongaka laawɔ nshi tshɛ!