Tokambe Dimɛna l’Abuku w’Edjedja
1 Anto mombaka miliyɔ y’abuku w’edjedja lo mvudu yasondjawɔ abuku l’atshuku tshɛ wa nkɛtɛ. Ko, naa wahɔ w’ɔlɔ wakondja anto oma l’abuku asɔ na? (Und. 12:12) Ekanda woleki nɛmɔ efula ele wɛnɛ wakotola yambalo y’anto otsha lo Diolelo dia Nzambi la kɛnɛ kayodiotshelɛ anto. Tshumanelo efula diekɔ l’abuku wa ngasɔ tɔɔ wakafundama la ntondo ka 1985. Lo Ngɔndɔ ka Ntondo, tayosha anto abuku asɔ w’edjedja.
2 Vɔ Wekɔ Mɛtɛ la Nɛmɔ: Kânga mbakoka amɔtshi l’atei aso mɛna ɔnɛ abuku asɔ wambeta ɛnɔnyi lo mbɛdika l’ekanda aso w’eyoyo, sho la dia mbohɔ ɔnɛ mɛtɛ ka lo Bible fundama lɔkɔ. Losango la Diolelo lolembetshiyami lɔkɔ lekɔ ohomba polo ndo ɛlɔ, ndo onto kokaka kondja lɔsɛnɔ naka nde liyela. (Joa. 17:3) Omalɔkɔ, sho la dia mbidja weolo dia kamba l’abuku asɔ dimɛna.
3 Dia mɛnya nɛmɔ diawɔ, tɔtɛkɛtɛ dia mama kɛmɔtshi kakakondja sango dia lokema l’ekanda w’edjedja waki la Société wakatshike tshɛnde kakavu. Kadiyɛso kɛmɔtshi akambola mama kakɔ ɔnɛ kana nde mbeyaka ohomba w’ekanda akɔ. Mama kakɔ akate ate: “Haleye mɛtɛ ohomba awɔ, ko ngande wayomeya na?” Mama kakɔ aketawɔ mbeka Bible, akeye mɛtɛ, ndo l’ɔkɔngɔ akɛnyi ohomba w’ekanda waki tshɛnde. Abuku w’edjedja wekɔ sango dia nɛmɔ efula mɛtɛ!
4 Tâdianganya Efula: Lâdiko dia mbisha anto abuku w’edjedja l’esambishelo ka lo luudu la luudu, koshake ndo wanɛ weyayɛ ɔnɛ vɔ tɔngɛnangɛnaka mbadia ekanda aso, wanɛ wele l’abɔnɛma wa Tshoto y’Etangelo la Réveillez-vous! ndo wanɛ wele l’otadimbo ayɛ wa periodikɛ. Naka wɛ sɔnɛka wanɛ weka la yɛ Bible abuku w’edjedja, kete vɔ koka monga l’ewo kekina kayowakimanyiya dia nyomoleka shihodia sɔlɔ. Tohɛke mbɔsa abuku akina tshɛ w’edjedja wele bu lo bibliɔtɛkɛ ayɛ. Ngasɔ mbayoyonga la bibliɔtɛkɛ w’oshika wayokambaka lawɔ lo wekelo ayɛ w’onto ndamɛ.
5 Lo dihole dia sukukɛka abuku aso w’edjedja lo lɔkɔtɔ, nyɛsɔ tokambe lawɔ dimɛna dia tshutshuya anto wahomana la so dia vɔ ‘mboka Nzambi ka mɛtɛ wɔma ndo nama ɛlɛmbɛ ande.’—Und. 12:13.