Eohwelo ka Nyɔi ka Kristo Kayosalema l’Andja w’Otondo
1 Jehowa toshaka weshasha efula. Ɔlɔlɔ ande kɔndwama lo yoho ya dimɛna efula oko ‘woshasha ande waheyama mbuta.’ Eelo, ‘ɔlɔlɔ wotamanya wa Nzambi’ ambolekoya ko hatoyeya ka mbuta diawɔ.—2 Kor. 9:14, 15.
2 Woshasha Ande Woleki Ɔlɔlɔ: Yeso Kristo, Otshungodi w’anto tshɛ mbele woshasha woleki ɔlɔlɔ tshɛ. Lo mɛnya ngandji k’efula kokande andja ɔnɛ, Jehowa akakimɔ ɔnande ɛtɔi lalangande efula. (Joa. 3:16) Ɔtshɔkɔ ɔsɔ w’otamanya w’oma le Nzambi sunganaka mbohɔma l’andja w’otondo! Ko wonya akɔna ndo lende ayosalema eohwelo kɛsɔ? La dikɔlɔ dia Lushi la Nɛi, Ngɔndɔ ka Nɛi 1, 1999, Akristo wa l’andja w’otondo wayohɔ Dambo dia Dikɔlɔ dia Nkumadiɔndjɔ, mbut’ate: Eohwelo k’olambo ɔsɔ woleki woke tshɛ.—1 Kor. 11:20, 23-26.
3 Kristo akatovwɛ ‘kânga lam’akiso têke atshi wa pɛkato,’ ndo sho kokaka mɛnya lowando laso lo sala Eohwelo ka nyɔi kande ndo mbelɛ anto akina dia vɔ monga kâmɛ la so lo diaaso sɔ dioleki tshɛ ohomba.—Romo 5:8.
4 Dikambo Dioleki Tshɛ Ohomba: Eohwelo ka nyɔi ka Kristo ndeka mbika epole ɔsɛkɛ ntondotondo lo woho wakandasukɛ lowandji laki Nzambi la wolo tshɛ. Diɔ toholaka nto ɔnɛ sho kokaka ndjâla pudipudi la ntondo ka Jehowa naka sho monga la mbetawɔ l’olambo wa Yeso, lâsɔ mbayotonga l’eshikikelo ka kondja panda. (Etsha 4:12) Aha la tamu, ɔnɛ mbele dui dioleki ohomba ɔnɔnyi w’otondo!
5 Tayɛnya ɔnɛ sho mbokaka anyaso anto ngandji lo mbaelɛ dia ndjosala la so Dambo dia Nkumadiɔndjɔ. Miliyɔ y’anto yeya nɛmɔ di’efula diele l’olambo ɔsɔ kokaka kondja wahɔ oma lɔkɔ. (Fil. 3:8) Wanɛ wele la mbetawɔ l’olambo w’etshungwelo wa Kristo kokaka monga l’elongamelo ka shikaa ka lɔsɛnɔ la pondjo.—Joa. 17:3.
6 Lo nshi y’Eohwelo, sho mongaka la waaso wa lânde wa mɛnya lowando laso l’ɔlɔlɔ w’otamanya waki Nzambi woleki tshɛ. Ɔsɔ ekɔ etena k’ɔlɔlɔ efula ka sambisha lokumu l’ɔlɔlɔ la Diolelo diaki Nzambi l’ohetoheto. Ɛtshɔkɔ wa weke wekɔ lo kongɛ wanɛ tshɛ wakanyiya efula lo dɔmbɛlɔ dikambo dia woshasha waki Jehowa waheyama mbuta ndo wayalɔngɔsɔla dia monga lo Dambo dia Nkumadiɔndjɔ di’ɔnɔnyi ɔnɛ!