Ekadimwelo Lo Wembola Anyu
◼ Ngande wakokaso ntsha Eohwelo ka nyɔi ka Kristo la nɛmɔ di’efula na?
1 Yeso akahɔhɔla Eohwelo ka nyɔi kande l’otsho wakandakahema ata ate: ‘Kanyotshake ɔnkɔnɛ dia mbohɔmi.’ (Luka 22:19) Ngande wahombaso mbôhɔ na? Naka sho nangaka ntsha oko ambeki wa Yeso, kete onto l’onto la dia mbeya bonde kakadjama ɔlɛmbɛ ɔsɔ, kâmɛ ndo kitshimudi y’ɔlɛmbɛ akɔ le nde ndo lo nshi yande yayaye.
2 Akristo amɔtshi ntshaka fɛtɛ lushi la Eohwelo. Tena dimɔtshi, akɛnda ntshaka fɛtɛ kawɔ lânde ndo epalanga lânde. Vɔ mbɔtɔka waa fɔtɔ dia “mbohɔka” lushi lakɔ. Ambutshi sombɛka anawɔ ahɔndɔ w’eyoyo ndo mbashaka weshasha. Amɔtshi mbishanaka mɔyɔ lushi lakɔ ɔnɛ: “fɛtɛ k’ɔlɔlɔ!” Onde woho ɔsɔ mbakalange Yeso sho mbôhɔka?
3 Ɔpɔstɔlɔ Paulo akafunde ate: ‘Lam’ayonyɔlɛkaka ma nɛ, ndo lam’ayonyɔnɔkaka dikɔhɔ nɛ, nyu nyayotelaka anto dikambo dia nyɔi ka Nkumadiɔndjɔ, edja ndo lam’ayondoya.’ (1 Kor. 11:26) Ɔnkɔnɛ, Eohwelo kotolaka yambalo yaso tshɛ dia sho mbeya ɔnɛ nyɔi ka Yeso ekɔ ohomba efula dia sangwelo diaki Jehowa kotshama. Nyɔi kande akakimanyiya dia tshungola ana w’Adama ndo dia mbisha wanɛ wayonga la mbetawɔ diaaso dia sɛna pondjo la nkɛtɛ kayokadimɔ paradiso. (Joa. 3:16; Etat. 1:28) Oma lo mbetawɔ kawɔ lo dikila diakatshulola Kristo, ‘ɛkɔkɔ ekina’ wekɔ pudipudi lo washo wa Jehowa. Ɔnkɔnɛ, vɔ wekɔ la diɛsɛ dia woke dia kambɛ Nzambi ‘olimu w’ekila yanyi oko yanyi, otsho k’otsho lo tɛmpɛlɔ kande.’ (Eny. 7:14, 15) Lâdiko dia lâsɔ, Eohwelo mbaoholaka ɔnɛ vɔ wekɔ l’elongamelo ka mamba ka koma anto wa kokele ndo w’ɛlɔlɔ kam’ayokimɔ Yeso Diolelo le She.—Zef. 2:2, 3; 1 Kor. 15:24.
4 Lam’akate Yeso ate ‘Kanyotshake ɔnkɔnɛ dia mbohɔmi,’ nde akalange mbuta ɔnɛ katokanyiyake ngandji kakatoke Jehowa lam’akandatosha Ɔna ɔsɔ lakandalangaka efula, ndo ngandji kakandatoke ndamɛ lo kimɔ anima ande oko tshungo lo dikambo di’anto tshɛ wayɛnya mbetawɔ. (Luka 22:19) Nde akalange nto dia sho nyomokanyiya ɛlɔlɔ wayotokondja nshi nyɛ ndo lo nshi yayaye oma l’olambo wa lɔsɛnɔ lande. (Joa. 3:16; Romo 5:8; 1 Tim. 2:5, 6) Ɔnkɔnɛ, lushi l’Eohwelo ekɔ diaaso dia lânde dia kana yimba la lowando efula lo akambo asɔ tshɛ.
5 Omalɔkɔ, lam’ɔsa Akristo lushi l’Eohwelo oko diaaso dia sala fɛtɛ kana dia mbisha anawɔ weshasha, vɔ shishaka kitshimudi ya Eohwelo ndo kietɛka oko dikambo dia l’emunyi. Dionga dia ngasɔ hasungana, nɛ dia diɔ mbidjaka Eohwelo l’ɔnɔngɔ wa fɛtɛ y’apanganu oko Bɔnane la Nɔwɛlɛ; kietɛka oko diaaso dia kotsha ‘eyango wa nsaki ya l’emunyi’ lo dihole dia monga etena ka kana yimba l’akambo wa lo nyuma. (Romo 13:14; enda Isaya 5:12.) Ndoko ombeki wa Yeso Kristo w’oshika wayolanga mɔnyɔla dikambo sɔ dioleki ohomba l’Ɔkɔndɔ w’anto. Sho nangaka mbohɔ lushi lɔsɔ la nɛmɔ efula lo kanaka yimba lo ngandji ka Jehowa la ka Yeso Kristo, ndo l’ɛlɔlɔ wayotokondja nshi nyɛ ndo lo nshi yayaye oma lo dikila dia Kristo diakatshulwama.—Osam. 116:12, 13.