Tetsha Anto Akina Woho wa Vɔ Ndjakondjiyɛ Ɛlɔlɔ
1 Jehowa nangaka di’onto tshɛ ndjakondjiyɛ “ɛlɔlɔ.” (Is. 48:17) Nde mbeyaka kiɔkɔ y’ɔngɛnɔngɛnɔ wa mɛtɛ. Nde ndeka kombola di’anto mbewɔ elanyelo ndo monga la lɔsɛnɔ lo kitanyiya adjango ande. Tekɔ lo ndjakondjiyɛ ɛlɔlɔ efula lo ndjela mboka ka Nzambi. (Osam. 34:8) Ngande wakokaso mbetsha anto akina dia vɔ ntsha yoho yakɔ yâmɛ na?
2 Kakɔna Kakombola Anto? Kakɔna kaleka anto ndjakiyanya lo dihole diodjashiyɛ? Shi dia vɔ monga la lotui tshitshi l’ahole awɔ, di’awala awɔ monga nge, dia nshi yayaye y’anawɔ, ndo di’akambo akina wa woho ɔsɔ? Lende asekesɔwɔ dia nyanga ekimanyielo lam’ahomanawɔ l’ekakatanu na? Mbeyaka monga ko vɔ ndjaɛkɛka le wɔ vamɛ kana l’akoka wele la wɔ, kana l’alako wawasha anto akina. Omalɔkɔ, anto efula hawoyeya ka ntsha oma lo tokanyi tɔmɔtshi taheyama ɔtɛ l’ekolo takawakondja tendana la woho wakokawɔ ndjakondjiyɛ ɛlɔlɔ. Sho la dia mbaɛnya ɔnɛ ndoko koleki alako washa Dui dia Nzambi. (Osam. 119:98) Ko yoho yakɔna na? Ele lo mbaɛnya nganɛ wakokawɔ ndowanya nsɛnɔ yawɔ kânga kakianɛ naka wayodja weolo dia mbeka Bible ndo kamba la kɛnɛ katatɔ.—2 Tim. 3:16, 17.
3 Lɔsɛnɔ la lo Nkumbo la Dimɛna Efula: Tɔtɔi toto mbeya mɛtɛ woho wakimanyiya Efeso 5:22–6:4 dia kandola ekakatanu wa lo nkumbo. Kɛsɔ mbakakomɛ wadi l’omi amɔtshi. Ɛnɔnyi dikumi l’ɔkɔngɔ wa vɔ tshukana, vɔ wakɔshi yɛdikɔ ɔnɛ vɔ pombaka kakitɔna. Koko, wadi akamɛ mbeka Bible. Ndo wakawetsha kɛnɛ kata Afundelo lo dikambo dia lɔsɛnɔ la lo diwala. Omi akɛnyi esadi eto etshikitanu wakasale wadiɛnde lam’akandakambaka l’awui wa lo Bible, ko nde lawɔ akayomɛka mbeka Bible. Nde akayota l’ɔkɔngɔ ate: “Kakianɛ, tamboshola kiɔkɔ y’ɔngɛnɔngɛnɔ wa mɛtɛ wa lo nkumbo.”
4 Tônge l’Oyango w’Oshika lo Lɔsɛnɔ: Lam’akaye ɔlɔngɔlɔngɔ ɔmɔtshi waki fumbe ka kândji le Ɛmɛnyi wa Jehowa dia ndjoyanga ekimanyielo, vɔ wakawetsha ɔnɛ: Jehowa mbokanɛka. Nde ate: ‘Dimi lamboshola dia Otungi ekɔ la sangwelo dimɔtshi lo kɛnɛ kendana l’onto ndo amombɛ wanɛ walangande lɔsɛnɔ la pondjo. Ohonyokanyiya ɔngɛnɔngɛnɔ waki lami lo dikambo sɔ. Ɛlɔ kɛnɛ, laya la demba dia dimɛna, wɔladi wa lo yimba ndo diɔtɔnganelo dia ma ma la Nzambi.’
5 Onto tshɛ kokaka kondja ɛlɔlɔ oma l’ekimanyielo k’oshika k’oma lo Dui dia Nzambi. Lo kamba ladiɔ oko ɔnɔmbɔdi aso, sho mbetawɔka dia mboka ka Jehowa ndeka mboka tshɛ ya l’andj’ɔnɛ fwa. (Osam. 116:12) Tekɔ la diɛsɛ dia mbewoya anto akina losango lɔsɔ, lo mbaetsha woho wa vɔ ndjakondjiyɛ ɛlɔlɔ. Lo ntsha ngasɔ mbayotokondja etombelo efula w’ɛlɔlɔ.