Olimu w’esambishelo totshikitanyaka l’anto akina
1 Anto efula mimbolaka ɔnɛ: “Kakɔna katshikitanya Ɛmɛnyi wa Jehowa la ɛtɛmwɛlɔ ekina na?” Ngande wakokayɛ kadimola wombola ɔsɔ na? Wɛ kokaka mbalembetshiya wetshelo ɛmɔtshi wa lo Bible wetawɔso. Ko onde wɛ ambokanyiyaka yema woho ɔnɛ watotshikitanya olimu aso w’esambishelo la ɛtɛmwɛlɔ ekina?—Mat. 24:14; 28:19, 20.
2 Ɛlɔ kɛnɛ, ɛtɛmwɛlɔ efula hawoke mposa ka mbewoya anto akina akambo wetawɔwɔ. Vɔ fɔnyaka ɔnɛ kɛnɛ kele ohomba ele kitanyiya ɛlɛmbɛ waki Kayisa, monga la lɔkɛwɔ l’ɔlɔlɔ ndo ntshɛ anto akina ɔlɔlɔ ko pe. Vɔ fɔnyaka dia vɔ kema l’ɔkɛndɛ wa kimanyiya anto akina dia vɔ mbeya kɛnɛ kata Bible dia kondja panda. Ko ngande wotshikitanyiso la ɛtɛmwɛlɔ ekina ɛsɔ na?
3 Olimu w’esambishelo wakambaso l’ohetoheto tshikitana efula l’elimu w’ɛtɛmwɛlɔ ekina. Aya ɛnɔnyi ndekana 100 wele Ɛmɛnyi wa Jehowa wa nshi nyɛ wambosambisha lokumu l’ɔlɔlɔ polo lo tokoma ta nkɛtɛ lo ndjela ɛnyɛlɔ k’Akristo wa ntondo. Sho kambaka olimu ɔsɔ l’oyango wa kimanyiya anto efula dia vɔ mbɔtɔnganyiya nsɛnɔ yawɔ la lolango laki Nzambi.—1 Tim. 2:4; 2 Pet. 3:9.
4 Anto atawɔ eyɛ? onde wɛ mbeyamaka oko onto lasambisha Ɔtɛkɛta waki Nzambi l’ohetoheto? (Etsha 17:2, 3; 18:25) Oma l’olimu ayɛ w’esambishelo, onde asukanyi ayɛ kokaka mɛna otshikitanu wele lam’asa ɔtɛmwɛlɔ awɔ la wakiyɛ? Onde vɔ keyaka oko onto lele la nsaki k’efula ka mbewoya anto akina elongamelo kele layɛ? Onde wɛ tombaka l’olimu w’esambishelo mbala la mbala? Eya dia sho ndjâtshikitanyaka l’anto akina aha lo lokombo loto, koko lo ntsha kɛnɛ kalembetshiya lokombo lakɔ, mbut’ate, sambisha akambo anɛ wendana la Jehowa.—Is. 43:10.
5 Ngandji kokaso Nzambi la anyaso anto mbatotshutshuya dia sho ndjâkimɔ l’olimu w’esambishelo. (Mat. 22:37-39) Diɔ diakɔ diele, l’ɛnyɛlɔ ka Yeso ndo k’apɔstɔlɔ, sho kombolaka kamba la diaaso tshɛ diakondjaso dia sambisha anto akina losango la Diolelo. Nyɛsɔ totetemale sambisha anto walanga mpokamɛ lokumu l’ɔlɔlɔ l’ohetoheto tshɛ. Lo ntsha ngasɔ mbayotokimanyiya anto wele l’etema w’ɔlɔlɔ dia vɔ ‘mɛna otshikitanu wele lam’asa . . . onto lakambɛ Nzambi la ɔnɛ lahokambɛ.’—Mal. 3:18.