Tekɔ lo ‘tɛmbɛ lokumu l’ɔlɔlɔ la dui dimɔ di’ɔlɔlɔ efula’
‘Nde amɛna wele ekolo wa ɔnɛ latɛmbɛ lokumu l’ɔlɔlɔ la dui dimɔtshi di’ɔlɔlɔ efula.’—ISAYA 52:7.
1, 2. a) Awui akɔna wa wɔma wasalema lushi tshɛ? b) Ngande wayaoka anto efula lo kɛnɛ kendana la nsango ya kɔlɔ yahawahekɔ mboka?
ƐLƆ kɛnɛ, anto wa l’andja w’otondo wekɔ lo ndeka nongola nsango ya kɔlɔ. Etena kadiholawɔ aradiyo, vɔ mbokaka nsango ya kɔlɔ yendana la hemɔ ya lɔnyɔi yânɛ anto wa lanɛ la nkɛtɛ. Vɔ mɛnaka lo televiziɔ alɛdi w’ana wamboma alemba la ndjala walɔmba ekimanyielo. Vɔ mbadiaka lo tojurunalɛ waewoyelo wendana la woho walanya bɔmbɛ mvudu ndo woho wadiakayɔ lokema l’anto waha l’onongo.
2 Eelo, awui wa wɔma efula salemaka lushi tshɛ. Akambo wa l’andja ɔnɛ wekɔ lo tatshu otsha lo kɔlɔ koleki. (1 Koreto 7:31) Jurunalɛ mɔtshi ya lo Erɔpɛ wa lo owɛstɛ yakɛnya dia mɛnamaka di’oko andja w’otondo “wekɔ suke la ndanyema tshɛtshɛ.” Diɔ diakɔ diele lofulo latadɛ l’anto wambɔkɔmɔ etema! Onto ɔmɔtshi lakawakɔnya dia nde mbisha kanyi yande lo kɛnɛ kendana la nsango yewoyama lo televiziɔ lo wodja w’États-Unis, akasha kanyi yele la miliyɔ y’anto ate: ‘L’ɔkɔngɔ wa dimi menda awui wewoyawɔ lo televiziɔ, dimi kɔmɔka otema. Nsango tshɛ yewoyama yekɔ paka ya kɔlɔ. Yɔ mɛtɛ kɔmɔlaka demba.’
Lokumu lahomba onto tshɛ mboka
3. a) Lokumu lakɔna l’ɔlɔlɔ lewoya Bible? b) Lande na kɔsayɛ lokumu l’ɔlɔlɔ la Diolelo la nɛmɔ?
3 Onde lokumu l’ɔlɔlɔ koka tanema lo andja wa kɔlɔ ɔnɛ? Eelo, lɔ koka tanema! Ekɔ ekeketshelo dia mbeya dia Bible mbewoyaka lokumu la ɔlɔlɔ. Lɔ lekɔ lokumu l’ɔlɔlɔ lata ɔnɛ Diolelo diaki Nzambi diayonya hemɔ, ndjala, awui wa ngala, ata ndo weho tshɛ wa ɔsɔkishelo. (Esambu 46:9; 72:12) Shi nkumu ya ngasɔ mbakombola onto tshɛ mboka? Ɛmɛnyi wa Jehowa mbɔsaka dia onto tshɛ pombaka mboka lokumu lɔsɔ. Ɔnkɔnɛ, vɔ mbeyamaka ahole tshɛ lo woho watetemalawɔ la mbidja welo dia mbewoya anto wa lo wedja tshɛ lokumu l’ɔlɔlɔ la Diolelo diaki Nzambi.—Mateu 24:14.
4. Akambo akɔna wendana la olimu aso wayotɔsɛdingola lo sawo nɛ ndo lo sawo diayela?
4 Lâsɔ, kakɔna kakokaso sala dia sho tetemala ndjasha lo yoho ya dimɛna lo esambishelo ka lokumu l’ɔlɔlɔ lɔsɔ oyadi lo bɛtshi dia nkɛtɛ diele anto hawoleke lietawɔ? (Luka 8:15) Ɔsɛdingwelo wa lo tshena pe w’akambo asato w’ohomba wendana la olimu aso w’esambishelo ayotokimanyiya mɛtɛ dia sala dui sɔ. Sho koka sɛdingola 1) eyango aso, mbuta ate lande na kasambishaso; 2) losango laso, mbuta ate kakɔna kasambishaso; ndo 3) toho taso, kana woho wasambishaso. Naka sho mongaka la eyango wa pudipudi ndo la losango lokɛma hwe ndo naka sho kamba la toho t’amɛna, kete tayosha weho w’anto efula diaaso dia vɔ mboka lokumu loleki nkumu nkina tshɛ ɔlɔlɔ, mbuta ate lokumu l’ɔlɔlɔ la Diolelo diaki Nzambi.a
Lande na kasambishaso lokumu l’ɔlɔlɔ
5. a) Naa dui dioleki ohomba diatotshutshuya dia sambisha? b) Lande na kakokadiɔ mbutama dia okitanyiya aso lo didjango dia lo Bible dia sambisha ekɔ djembetelo ya ngandji kokaso Nzambi?
5 Nyɛsɔ tɔsɛdingole dikambo dia ntondo, mbuta ate eyango aso. Lande na kasambishaso lokumu l’ɔlɔlɔ? Lo ɔkɔkɔ wâmɛ wakatshutshuya Yeso dia sala dikambo sɔ. Nde akate ate: “Dimi latulangaka Papa.” (Joani 14:31; Osambu 40:8) Ntondotondo, ngandji kokaso Nzambi totshutshuyaka dia sala dikambo sɔ. (Mateu 22:37, 38) Bible mɛnyaka diɔtɔnganelo diele lam’asa ngandji kokaso Nzambi la olimu w’esambishelo, nɛ dia tɔ mbutaka ɔnɛ: “Ngandji ka [Nzambi] kene, dia shu nama elembe andi: ku elembe andi hawuleki wutshu.” (1 Joani 5:3; Joani 14:21) Onde l’atei a wadjango waki Nzambi mbatanaso ndo nɛ diata dia ‘ntshɔ ndo mbetɛ anto ambeki’? (Mateu 28:19) Eelo. Lo mɛtɛ, Yeso mbakate ɛtɛkɛta ɛsɔ, koko oma le Jehowa mbakaye ɛtɛkɛta akɔ. Lande na kataso ngasɔ na? Yeso nembetshiyaka ate: “Dimi dime halatshi dikambu, keli latutaka akambu wakambetsha Papa.” (Joani 8:28; Mateu 17:5) Omalɔkɔ, etena kakitanyiyaso didjango dia sambisha, sho mɛnyaka Jehowa dia sho mbôkaka ngandji.
6. Lo toho takɔna tatotshutshuya ngandji kokaso Nzambi dia sambisha?
6 Ndo nto, ngandji kokaso Jehowa totshutshuyaka dia sambisha nɛ dia nde nangaka dia sho munola awui wa kashi wakate Satana lo lokombo lande. (2 Koreto 4:4) Satana akadje tâmu lo lotshungɔ lele la Nzambi la nɔmbɔla. (Etatelu 3:1-5) Oko weso Ɛmɛnyi wa Jehowa, sho kombolaka tondja emamatanya waki Satana sɛkɛ ndo kidia lokombo laki Nzambi la ntondo ka anto. (Isaya 43:10-12) Ndo nto, sho sambishaka nɛ dia tamboyeya waonga ndo mboka yaki Jehowa. Sho ndjaokaka suke la nde ndo tekɔ la nsaki k’efula ka mbewoya anto akina awui wendana la Nzambi kaso. Ɔnkɔnɛ, ɔlɔlɔ waki Jehowa ndo mboka yande yosembwe toshaka ɔngɛnɔngɛnɔ watotshutshuya paka dia tɛkɛta lo dikambo diande. (Osambu 145:7-12) Sho tshutshuyamaka dia mbewoya lotombo lande ndo tɛkɛta dikambo dia ‘awui ande w’ɛlɔlɔ’ le wanɛ wayotohokamɛ.—1 Petero 2:9; Isaya 43:21.
7. Lâdiko dia ngandji kokaso Nzambi, ɔkɔkɔ akɔna okina w’ohomba watotshutshuya dia sambisha?
7 Tekɔ nto la ɔkɔkɔ okina w’ohomba watotshutshuya dia tetemala sambisha: Sho nangaka mɛtɛ samba ndo keketsha anto watshimba yimba la lokema la nsango ya kɔlɔ yokawɔ ndo wanɛ wasowa l’ɔtɛ w’akambo wotshikitanyi. L’olimu ɔsɔ, sho salaka la wolo dia mbokoya Yeso. Ɛnyɛlɔ, tende kɛnɛ kɔkɔndwami lo Mako tshapita 6.
8. Kakɔna kɛnya ɔkɔndɔ wele lo Mako tshapita 6 lo kɛnɛ kendana la dionga diaki la Yeso otsha le anto?
8 Lam’akakalola apɔstɔlɔ oma lo lɔkɛndɔ lawɔ l’esambishelo ndo kakawewoya Yeso awui tshɛ wakawasale ndo wakawetsha, Yeso akɛnyi dia vɔ wakalɛmbɛ, ko nde akawatɛ dia vɔ ntshɔ kâmɛ la nde dia ‘tomuya yema.’ Ɔnkɔnɛ, vɔ wakɔtɔ lo wato ko wakatshu otsha lo dihole dia ki. Anto wakayele, wakalawɔ l’omamu w’ashi ndo lo tshanda ya tshitshɛ tsho vɔ wakakome lo dihole diakiwɔ. Kakɔna kakasale Yeso na? Ɔkɔndɔ mbutaka ɔnɛ: “[Nde] akenyi ului a wuki w’antu. Ndi akawauki ketshi, ne dia vo waki uku ekoko waha la ulami; akatatela mbaetsha akambu efula.” (Mako 6:31-34, sho mbɛnganyisha alɛta ango.) Kânga mbakandalɛmbɛ, kɛtshi akatshutshuya Yeso dia tetemala sambisha anto lokumu l’ɔlɔlɔ. Mbokɛmaka hwe dia, Yeso akɛnya woho wakandayakiyanya efula dikambo di’anto asɔ. Nde akawaoke kɛtshi.
9. Kakɔna kekaso oma l’ɔkɔndɔ wa lo Mako 6 lo kɛnɛ kendana la eyango w’ɔlɔlɔ watotshutshuya dia sambisha?
9 Wetshelo akɔna wakondjaso oma lo ɔkɔndɔ ɔsɔ na? Oko weso Akristo, sho mbokaka dia tekɔ la ɔkɛndɛ wa sambisha lokumu l’ɔlɔlɔ ndo mbetɛ anto ambeki. Sho mbeyaka ɔkɛndɛ aso wa mbewoya anto lokumu l’ɔlɔlɔ, nɛ dia Nzambi nangaka dia ‘weho w’anto tshɛ shimbamela.’ (1 Timote 2:4) Ɔnkɔnɛ, sho mbɔsaka olimu aso aha tsho oko ɔkɛndɛ, koko sho kambaka olimu akɔ oma lo kɛtshi kokaso anto. Naka sho mbokaka anto kɛtshi efula oko Yeso, kete etema aso wayototshutshuya dia sala tshɛ kakokaso sala dia tetemala mbasambisha lokumu l’ɔlɔlɔ. (Mateu 22:39) Monga la eyango w’amɛna lo olimu w’esambishelo ayototshutshuya dia sambisha lokumu l’ɔlɔlɔ aha la mpekɔ.
Losango laso mendanaka la lokumu l’ɔlɔlɔ la Diolelo diaki Nzambi
10, 11. a) Ngande wakɔndɔla Isaya losango lasambishaso? b) Ngande wakɛmbɛ Yeso lokumu l’ɔlɔlɔ la dui dimɔtshi di’ɔlɔlɔ efula ndo ngande wayela ekambi waki Nzambi wa nshi nyɛ ɛnyɛlɔ kaki Yeso?
10 Ko kayotota lo kɛnɛ kendana la dui dia hende diendana la olimu aso, mbuta ate losango laso? Kakɔna kasambishaso? Ɔprɔfɛta Isaya toshaka olembetshiyelo ɔmɔtshi wa dimɛna wendana la losango lewoyaso ɔnɛ: ‘Ande amɛna wele ekolo wa ɔnɛ latɛmbɛ lokumu l’ɔlɔlɔ lo akona, ɔnɛ latewoya ki, latɛmbɛ lokumu l’ɔlɔlɔ la dui dimɔtshi di’ɔlɔlɔ efula, latadianganya lokumu la panda ndo latɛ Siɔna ate: Nzambi kayɛ ambokoma nkumekanga!’—Isaya 52:7.
11 Etelo k’ohomba ka lo divɛsa nɛ kata ɔnɛ, “Nzambi kayɛ ambokoma nkumekanga,” mɛnyaka losango lahombaso sambisha, mbuta ate lokumu l’ɔlɔlɔ la Diolelo diaki Nzambi. (Mako 13:10) Ndo nto, divɛsa sɔ mɛnyaka lokanyi loleki ohomba lele la losango laso. Isaya akakambe la ditelo diele oko “panda,” “lokumu l’ɔlɔlɔ,” “ki,” ndo “dui dimɔtshi di’ɔlɔlɔ efula.” Ntambe efula l’ɔkɔngɔ wa Isaya, mbuta ate lo ntambe ka ntondo lo tena diaso nɛ, Yeso Kristo akakotsha prɔfɛsiya kɛsɔ lo yoho ya diambo lo mbisha ɛnyɛlɔ k’ohetoheto lo kɛnɛ kendana la esambishelo ka lokumu l’ɔlɔlɔ la dui dimɔtshi di’ɔlɔlɔ efula, mbuta ate, Diolelo diayaye diaki Nzambi. (Luka 4:43) Nshi nyɛ, djekoleko tatɛ oma l’ɔnɔnyi 1919, Ɛmɛnyi wa Jehowa wakayele ɛnyɛlɔ kaki Yeso lo sambisha l’ohetoheto lokumu l’ɔlɔlɔ la Diolelo diaki Nzambi diamboshikikɛma ndo lendana la ɛtshɔkɔ wayodiela.
12. Etombelo akɔna wele la lokumu l’ɔlɔlɔ la Diolelo le wanɛ walietawɔ?
12 Etombelo akɔna wonga la lokumu l’ɔlɔlɔ la Diolelo le wanɛ walietawɔ na? Oko wakidiɔ lo nshi yaki Yeso, ɛlɔ kɛnɛ lokumu l’ɔlɔlɔ mbishaka anto elongamelo ndo ekeketshelo. (Romo 12:12; 15:4) Lɔ mbishaka anto wele l’etema w’ɛlɔlɔ elongamelo nɛ dia vɔ ndjeyaka dia wekɔ la ɛkɔkɔ wa shikaa wa mbetawɔ dia tena di’amɛna efula diekɔ la ntondo. (Mateu 6:9, 10; 2 Petero 3:13) Elongamelo kɛsɔ kimanyiyaka efula wanɛ woka Nzambi wɔma dia mɛna akambo la sso di’ɔlɔlɔ. Omembi w’esambo mbutaka dia anto asɔ ‘hawotoka nkumu ya kɔlɔ wɔma.’—Osambu 112:1, 7.
Losango ‘layɔkɔnɔla mpota y’akanga wa etema wambatɛ’
13. Ngande wakɔndɔla ɔprɔfɛta Isaya ɛtshɔkɔ wakondja esadi eto wanɛ wetawɔ lokumu l’ɔlɔlɔ?
13 Ndo nto, lokumu l’ɔlɔlɔ lasambishaso mbishaka wanɛ walihokamɛ esambelo ndo ɛtshɔkɔ. Woho akɔna? Ɛtshɔkɔ ɛmɔtshi waya oma lo mpokamɛ losango la Diolelo mɛnyama lo ɛtɛkɛta ɛnɛ waki ɔprɔfɛta Isaya lakate ate: “Nyuma ka Khumadiondjo, [Jehowa] keli la mi, ne dia [Jehowa] akankiti iso dia dimi nsambisha amenyi fono lukumu l’ololo. Ndi akantumi dia dimi nkonoya akanga w’etema wambate, dia mvutela fumbi dia vo ndjala la ndjadjasela, la dia mvutela asi lukanu dia vo ntshungo; dia nsanyia antu di’eleku ka ngandji ka mamba ka [Jehowa] la dia lushi l’esombweyo ka [Nzambi k]asu, ndu dia nsamba antu tshe walela.”—Isaya 61:1, 2; Luka 4:16-21.
14. a) Kakɔna kalembetshiya etelo kata ɔnɛ “nkonoya akanga w’etema wambate” lo kɛnɛ kendana la losango la Diolelo? b) Ngande wayotɛnya dia Jehowa ndjakiyanyaka dikambo dia akanga wa etema wambatɛ?
14 Lo ndjela prɔfɛsiya kɛsɔ, lo sambisha lokumu l’ɔlɔlɔ, Yeso akahombe “nkonoya akanga w’etema wambate.” Isaya akakambe mɛtɛ la ɛtɛkɛta wa didjidji w’amɛna efula! Lo ndjela diksiɔnɛrɛ dimɔtshi dia awui wa lo Bible, tshɛkɛta ya lo Hɛbɛru yokadimɔmi ɔnɛ “mɔmba” “vɔ kambaka la yɔ mbala efula dikambo dia ‘wɔmbɛlɔ’ wa la ɛtshi ka dihɔndɔ, ndo kɛsɔ mendanaka la osakelo ndo la ɔkɔnwɛlɔ wa mpota.” Ɔfɛlɛmɛ mbeyaka ninga ɛtshi ka dihɔndɔ kana kiɔmba dimɛna lo dihole diele mpota kana dioka onto kandji woho wa nde kɔlɔngana. Woho akɔ wâmɛ mbele, etena kasambishaso losango la Diolelo, apandjudi keketshaka wanɛ tshɛ wasowa lo yoho mɔtshi. Ndo etena kasukɛwɔ wanɛ wele lo dihombo, vɔ mɛnyaka ndjakiyanya kaki Jehowa. (Ezekiyele 34:15, 16) Lo kɛnɛ kendana la Nzambi, omembi w’esambo akate ate: “Ndi atokonoyaka etema wakate, atombaka ahondo lu puta yawo.”—Osambu 147:3.
Woho wotshikitanyi losango la Diolelo la nsango nkina
15, 16. Naa bɛnyɛlɔ diɛnya dia losango la Diolelo mbishaka wanɛ wele lo dihombo osukɔ ndo wolo?
15 Bɛnyɛlɔ efula mɛnyaka woho wasukɛ ndo wakeketsha losango la Diolelo akanga w’etema wambatɛ. Tɔshi ɛnyɛlɔ kaki Oreanna, mama kɛmɔtshi k’osombe ka lo wodja ɔmɔtshi wa la Amɛrikɛ wa lo sidɛ lakashisha mposa ka nsɛna. Ɔmɛnyi ɔmɔtshi wa Jehowa akatatɛ membola Oreanna ndo akawadiɛka Bible ndo Buku di’ɛkɔndɔ wa lo Bible.b Lo etatelo, womoto lakakɔmɔ demba ɔsɔ akahokamɛka wadielo etami lo mbeto kande, ndo nde akakumaka akumu mbala la mbala. Kombeta edja, nde akatatɛ sala la wolo dia mbidjasɛ lo mbeto kande lo wonya wa wadielo. Yema tshitshɛ l’ɔkɔngɔ, nde akadjasɛka lo kɔsa lo salɔ etena kakinde lo kongɛ kadiyɛso kakekaka la nde Bible. Oma lâsɔ, mama kɛsɔ akatatɛ mbɔtɔ lo nsanganya ya Akristo ya l’etshumanelo lo Mbalasa ka Diolelo. Oko wakandakeketshama oma lo kɛnɛ kakandeke oma lo nsanganya shɔ, nde akatatɛ mbisha oseka onto tshɛ laketaka suke la luudu lande ekanda walembetshiya Bible. La ɛnɔnyi 93, Oreanna akabatizama oko Ɔmɛnyi wa Jehowa. Losango la Diolelo akayɔhɛtshahɛtsha nsaki kande ka nsɛna.—Tukedi 15:30; 16:24.
16 Losango la Diolelo sukɛka l’ɔlɔlɔ tshɛ kânga wanɛ weya ɔnɛ wayanga mvɔ l’ɔtɛ wa hemɔ. Tɔshi ɛnyɛlɔ kaki Maria k’oma la Erɔpɛ wa lo owɛstɛ. Nde aki la hemɔ ka nyɔi ndo nde akashisha elongamelo tshɛ. Lo etena kakandɛnana la Ɛmɛnyi wa Jehowa nde aki la ɔkɔmwɛlɔ w’efula. Koko, lam’akandeke awui wendana la asangwelo waki Nzambi, nde akayongaka la oyango w’ɔlɔlɔ lo lɔsɛnɔ. Nde akabatizama oko Ɔmɛnyi wa Jehowa ndo akayasha efula lo olimu w’esambishelo. Lo ɛnɔnyi ehende w’ekomelo ka lɔsɛnɔ lande, elongamelo ndo ɔlɔ waki lande akɛnamaka lo washo ande. Maria akavu ele la elongamelo ka shikaa ka eolwelo.—Romo 8:38, 39.
17. a) Ngande watshikitanya losango la Diolelo nsɛnɔ ya wanɛ walietawɔ? b) Lo toho takɔna tamboyɛna wɛmɛ dia Jehowa ‘sembolaka wanɛ tshɛ wokotami’?
17 Alapɔlɔ ɛsɔ mɛnyaka woho wakoka losango la Diolelo tshikitanya nsɛnɔ yaki wanɛ wele la mposa k’efula ka akambo wa mɛtɛ wa lo Bible. Anto wambovusha lakiwɔ la ngandji kondjaka nto wolo etena kekawɔ awui wendana la elongamelo ka eolwelo. (1 Tesalonika 4:13) Anto wasɛna lo wola ndo wele l’ekakatanu dia ndesha nkumbo yawɔ hawotoyaɔnyɔlaka nto ndo vɔ ndjongaka la dihonga lam’ekawɔ ɔnɛ Jehowa hawakalɛki pondjo naka wekɔ la kɔlamelo le nde. (Osambu 37:28) Oma lo ekimanyielo ka Jehowa, wanɛ wambɔkɔmɔ ndjotatɛka kondja wolo yema yema dia ndɔshana la hemɔ ndo mbala efula vɔ ndjongaka la akoka wa tondoya hemɔ kakɔ. (Osambu 40:1, 2) Lo mɛtɛ, oma lo ekimanyielo ka wolo w’oma lo Ɔtɛkɛta ande, kakianɛ Jehowa ekɔ lo ‘sembola wanɛ tshɛ wokotami.’ (Osambu 145:14) Eelo, woho wɛnaso nganɛ wasamba lokumu l’ɔlɔlɔ la Diolelo diaki Nzambi wanɛ wambɔkɔmɔ lo ɛtshi kaso ka nkɛtɛ ndo l’etshumanelo kaso, toholaka mbala la mbala dia tekɔ la lokumu l’ɔlɔlɔ loleki tshɛ nshi nyɛ!—Osambu 51:17.
‘Ɔsɛngɔsɛngɔ ami le Nzambi lo dikambo diawɔ’
18. Woho wakatone ase Juda lokumu l’ɔlɔlɔ aki la shɛngiya yakɔna le Paulo, ndo lande na?
18 Kânga mbele losango laso lekɔ la lokumu loleki tshɛ, anto efula litonaka. Ngande wakoka dui sɔ monga la shɛngiya le so? Paka woho wakadionge la shɛngiya le ɔpɔstɔlɔ Paulo. Mbala efula, nde akasambishaka ase Juda, koko efula l’atei awɔ wakatonaka losango la panda. Otonelo awɔ akanyangiya Paulo efula. Nde akasuya ate: “Dimi la lokonyo la wuki, ndu la lunyangu lahashili l’utema ami.” (Romo 9:2) Paulo akokaka ase Juda wakandasambishaka kɛtshi. Woho wakawatone lokumu l’ɔlɔlɔ akonyangiya.
19. a) Lande na kende bu dui dia diambo dia ndjaoka dia tambɔkɔmɔ tena dimɔtshi? b) Kakɔna kakakimanyiya Paulo dia nde tetemala la olimu ande wa esambishelo?
19 Kɛtshi totshutshuyaka dia sambisha lokumu l’ɔlɔlɔ. Ɔnkɔnɛ, bu dui dia diambo dia sho ndjaoka dia tambɔkɔmɔ etena katona anto losango la Diolelo. Woho watotoyaokaka ngasɔ mɛnyaka dia sho ndjakiyanyaka dikambo dia wahɔ wa lo nyuma wa wanɛ wasambishaso. Koko, sho pombaka mbohɔ ɛnyɛlɔ kaki ɔpɔstɔlɔ Paulo. Kakɔna kakokimanyiya dia nde tetemala la olimu ande w’esambishelo? Kânga mbele woho wakatone ase Juda lokumu l’ɔlɔlɔ akawosha lonyangu ndo pâ, Paulo kompekɔ ase Juda lo tshɛ kawɔ lo fɔnya ɔnɛ vɔ hawoyokoka kimanyiyama. Nde aki la elongamelo ɔnɛ amɔtshi wayoyetawɔ Kristo. Omalɔkɔ, lo ndjakiyanya dikambo dia ase Juda, Paulo akafunde ate: ‘Okiyanu ndo ɔsɛngɔsɛngɔ ami le Nzambi lo dikambo diawɔ, ele dia panda kawɔ.’—Romo 10:1.
20, 21. a) Lo kɛnɛ kendana la olimu aso, ngande wakokaso ndjela ɛnyɛlɔ kaki Paulo? b) Dui diakɔna diendana la olimu aso diayɔsɛdingwama lo sawo diayela?
20 Tende akambo ahende wakake Paulo epole ɔsɛkɛ lɔkɔ. Aki nsaki kaki l’otema ande ka ɔnɛ anto amɔtshi wayokondja panda ndo nde akasɛngasɛnga Nzambi lo dikambo sɔ. Ɛlɔ kɛnɛ, sho ndjelaka ɛnyɛlɔ kaki Paulo. Sho mongaka la nsaki k’oma k’ɛse otema ka tana onto tshɛ lakoka mpokamɛ lokumu l’ɔlɔlɔ. Sho tetemalaka nɔmba Jehowa dia sho tana anto wa ngasɔ dia sho mbakimanyiya dia vɔ monga la yoho ya lɔsɛnɔ yayowakonya lo panda.—Tukedi 11:30; Ezekiyele 33:11; Joani 6:44.
21 Koko, dia sambisha anto efula losango la Diolelo, hatohombe mbeya tsho lande na ndo kakɔna kahombaso sambisha, koko ndo woho wasambishaso. Dui sɔ diayɔsɛdingwama lo sawo diayela.
[Nɔtɛ ya l’ɛse ka dikatshi]
a Lo sawo nɛ tayɔsɛdingola akambo ahende wa ntondo. Lo sawo diayela tayɔsɛdingola dikambo dia sato.
b Diakatondjama oma le Ɛmɛnyi wa Jehowa.
Kakɔna kamboyeka?
• L’ɔtɛ wa ɛkɔkɔ akɔna wasambishaso?
• Naa losango loleki ohomba lasambishaso?
• Ɛtshɔkɔ akɔna wakondja wanɛ wetawɔ losango la Diolelo?
• Kakɔna kayotokimanyiya dia tetemala lo olimu aso?
[Esato wa lo lɛkɛ 26]
Dɔmbɛlɔ tokimanyiyaka dia tetemala lo olimu aso