Akoka mbetawɔ sho mbeka la nde Bible?
1 Omvutshi Amɔsɛ akatatshi ɔnɛ ndjala ka kasha kayonga lo nkɛtɛ y’Isariyɛlɛ, “aha ndjala ka mbu ya nde, kuyanga pusa ka ashi, keli ka eukelu k’aui wa [Jehowa].” (Am. 8:11) Lo wahɔ wa wanɛ wele la ndjala ndo la mposa ka lo nyuma, ɔlɔngɔswamelo wa Jehowa wekɔ lo kahanya l’andja w’otondo ekanda walembetshiya Bible.
2 Polo ndo ɛlɔ kɛnɛ, lofulo la dibuku Ewo lambotondjama aya ndekana kɔpi miliyɔ 70 ndo biukubuku Kakɔna aya ndekana kɔpi miliyɔ 91. Lam’etshaso anto akambo wa mɛtɛ, sho ngɛnangɛnaka woho wakawalɛndjalɛndja awui wa l’ekanda ɛsɔ ndo etombelo w’ɔlɔlɔ wele l’abuku asɔ. Koko lo mɛtɛ mɛtɛ, ekɔ nyemba y’anto wamboshilaka nongola ekanda aso, koko watamɛ mbeka la so Bible. Akokaso ntsha lo dikambo sɔ na?
3 Onto tshɛ lashaso okanda koka ndjêka la so Bible! Tende kɛnɛ kakakomɛ opandjudi ɔmɔtshi wakasɛngɔla womoto ɔmɔtshi dia mbeka la nde Bible mbala ka ntondo kakandasawola la mama kakɔ lo soko diande dia luudu. Womoto ɔsɔ aketawɔ mbala kakɔ kâmɛ. L’ɔkɔngɔ diko, nde akatɛ opandjudi ɔsɔ ate: “Wɛ mbele onto la ntondo lambɔsɛngɔla dia mbeka la mi Bible.” Lo ɛtshi kayɛ ka nkɛtɛ, anto angana wamboshilaka nongola ekanda aso wakoka mbuta woho akɔ wâmɛ na? Okanda tshɛ washaso onto toshaka diaaso dia sho kawola towenda nto ndo dia mbeka la nde Bible.
4 Lam’ele mbala efula sho pomanaka l’anto wamboshilaka nongola ekanda wakiso, ngande wakokaso nomialomia saki kawɔ ka mbeka awui wele lo ekanda ɛsɔ na? Ɔmɛnyi wa Jehowa ɔmɔtshi akambola mama kɛmɔtshi kakandasambishaka dia kana nde ekɔ la dimbola dimɔtshi diendana l’awui wa lo Bible. Mama kɛsɔ akôkadimola ate: “Kema.” Kadiyɛso akatɛtɛ ate: “Ndooko woho wakokayɛ monga ko bu la wembola.” Mama kɛsɔ akayombolaka wembola ɛmɔtshi, ko wekelo wa Bible wakayotatɛ. Bonde kahayambola ɔtɛkɛtshi ayɛ dia kana nde nangaka mbeya kɛnɛ kata Bible lo wombola ɔmɔtshi kana lo dikambo dimɔtshi diendana la nde na? Yâlɔngɔsɔla dia monyiya wombola ɔmɔtshi wayokotola yambalo yande naka nde ndoko la dikambo dia mimbola. Ɔkɛtshanyelo wa ngasɔ mbeyaka ndjonyokonya dia nyu tatɛ mbeka mɛtɛ ya lo Bible mbala la mbala.
5 Oyango wa woke w’olimu aso w’esambishelo ele dia mbeka l’anto Bible. Lam’ele hatokokaki mbeya onto akɔna akoka mbetawɔ sho mbeka la nde Bible, tatengengake dia mbutɛ onto tshɛ lahomana la so ɔnɛ sho nangaka mbeka la nde Bible. Tɛ Jehowa dikambo sɔ lo dɔmbɛlɔ, ndo yaɔtɔnganyiya l’alɔmbɛlɔ ayɛ. Wɛ mbeyaka mɛna dia asɛngɔla onto dia mbeka la nde Bible nganɛ ko nde amboyetawɔ!—1 Joa. 5:14, 15.