Nyu Nyekɔ “Endelu ka wa la Kete”!
1 Ɔpɔstɔlɔ Paulo akafunde ate: “Shu tambuyala uku endelu ka wa la kete, ndu lu ashu wa andjelu, ndu lu ashu w’antu.” (1 Kor. 4:9) Dikambo sɔ alangadiɔ nembetshiya, ndo woho akɔna wahombadiɔ mendana l’olimu aso ɛlɔ kɛnɛ?
2 Le ose Kɔrɛtɔ, tshɛkɛta “endelu” mboholaka ondo kɛnɛ kakasalemaka l’asɛkɛ wa tɔkɛnyɔ w’ase Rɔma lɛnɛ akawɔsaka anto wakawande ko mbaetshetsha lo washo wa nunu di’anto wakawaendaka la ntondo ka vɔ ndjadiaka l’esehe tshɛ. Lo yoho yakɔ yamɛ, efula ka andjelo ndo anto wakɛnaka woho wakahɛnyahɛnyamaka Akristo wa ntondo l’ɔtɛ w’esambishelo ka Diolelo. (Heb. 10:32, 33) Kɔlamelo yawɔ yakonge la shɛngiya le anto efula wakawaendaka oko wele ekikelo kaso kekɔ la shɛngiya le efula k’anto watenda ɛlɔ kɛnɛ. Waa na watenda na?
3 Andja ndo Anto: Mbala mɔtshi tita sango mbewoyaka awui wendana l’elimu wasala ekambi waki Jehowa. Kânga mbangɛnangɛnaso l’ɔlɔlɔ wele mɛtɛ ndo shikaa watama lo dikambo di’olimu aso, sho nongamɛka nto tena la tena alapɔlɔ wa kɔlɔ wahomba dianganyema oma le atunyi aso. Koko, sho pombaka tetemala ndjaɛnya dia tekɔ ekambi waki Nzambi oyadi “la lukumu la kolo ndu la lukumu l’ololo.” (2 Kor. 6:4, 8) Le anto watenda l’etema w’ɔlɔlɔ, dikambo sɔ mɛnyaka hwe dia tekɔ ambeki wa mɛtɛ waki Yeso Kristo.
4 Le Andjelo: Ditongami dia lo nyuma nto wekɔ lo tenda. Diabolo nde l’ɛdiɛngɛ ande wekɔ lo tenda—la “kele ka wuki,” l’oyango wa nshimba ‘olimu waki wanɛ watosambishaka dui dia Yeso.’ (Eny. 12:9, 12, 17) Andjelo waki Nzambi wele la kɔlamelo mendaka ndo ngɛnangɛnaka etena ka kadimola kânga otshi wa pɛkato ɔtɔi otema. (Luka 15:10) Mbeya di’ɔnɛ andjelo wekɔ lo mɛna di’olimu aso wakambema l’andja w’otondo ɛlɔ kɛnɛ ɔnɛ vɔ wekɔ olimu w’ohomba ndo wahomba kambema la shamanya pombaka tokeketsha!—Eny. 14:6, 7.
5 Etena kahomanayɛ l’ɛlɔshamelo kana kafɔnyayɛ di’olimu ayɛ bu l’etombelo w’amɛna, ohɔ dia washo w’anto wa l’andja w’otondo wekɔ lo kenda. Ekikelo kayɛ ka la kɔlamelo mɛnyaka akambo efula lo kɛnɛ kendana la kɔlamelo yayɛ. L’ekomelo, ‘ta diayɛ di’ɔlɔlɔ dia mbetawɔ’ diayokosha dikoka dia ‘nkimɛ lɔsɛnɔ la pondjo wolo.’—1 Tim. 6:12.