Anto Woleki Ngɛnangɛna Lanɛ la Nkɛtɛ

¹ “Wudja weli la [Jehowa] uku [Nzambi k]awo weko la ongenongeno.” (Osam. 144:15) Ɛtɛkɛta ɛsɔ mɛnyaka di’Ɛmɛnyi wa Jehowa wekɔ anto wele l’ɔngɛnɔngɛnɔ woleki lanɛ la nkɛtɛ. Ndoko ɔngɛnɔngɛnɔ woleki wɔnɛ wa kambɛ Jehowa, Nzambi ɔtɔi ka mɛtɛ ndo kasɛna. Lam’ele nde ekɔ ‘Nzambi k’ɔngɛnɔngɛnɔ,’ ɔngɛnɔngɛnɔ ande mɛnamaka oma le wanɛ wɔtɛmɔla. (1 Tim. 1:11) Naa awui amɔtshi wendana l’ɔtɛmwɛlɔ aso watɔngɛnyangɛnya na?

² Ɛkɔkɔ wa Ndjala la Ɔngɛnɔngɛnɔ: Yeso akatoshikikɛ dia ɔngɛnɔngɛnɔ ndjaka ‘lam’eyaso dia tekɔ wola lo nyuma.’ (Mat. 5:⁠3) Wekelo wa Bible wa mbala la mbala ndo wɔtwɛlɔ wa lo nsanganya yaso tshɛ y’Akristo kotshaka ohomba ɔsɔ. Wekelo w’akambo wa mɛtɛ wa l’Ɔtɛkɛta wa Nzambi wambototshungola oma l’awui wa kashi wa l’ɛtɛmwɛlɔ. (Joa. 8:32) Afundelo wakatetsha nto woho wa monga la yoho ya lɔsɛnɔ yoleki dimɛna. (Is. 48:17) L’ɔtɛ wa dikambo sɔ, sho ngɛnangɛnaka diɔtɔnganelo di’oshika di’Akristo diele l’atei wa nkumbo kaso k’anto l’ɔnango kele l’ɔngɛnɔngɛnɔ.​—⁠1 Tes. 2:​19, 20; 1 Pet. 2:⁠17.

³ Sho kondjaka ɔngɛnɔngɛnɔ w’efula lo kitanyiya ɛlɛmbɛ waki Nzambi wa lâdiko wendana la lɔkɛwɔ, nɛ dia sho mbeyaka dia dikambo sɔ tokokɛka ndo ngɛnyangɛnyaka Jehowa. (Tuk. 27:11) Jurunalistɛ mɔtshi akate ate: “Kânga mbewɔ l’ɛlɛmbɛ wahawakɔkɔla, Ɛmɛnyi wa Jehowa hawɛnama oko anto wele bu l’ɔngɛnɔngɛnɔ. Vɔ wekɔ mɛtɛ l’ɔngɛnɔngɛnɔ. Ndo akɛnda nd’epalanga [wa l’atei awɔ] mɛnyaka dia wekɔ l’ɔngɛnɔngɛnɔ wa lânde ndo la wɛdimo.” Woho akɔna wokokiso kimanyiya anto akina dia monga l’ɔngɛnɔngɛnɔ oko sho na?

⁴ Tokimanyiya Anto Akina dia Tana Ɔngɛnɔngɛnɔ: Andja wambolola l’awui wa nyangu, ndo anto efula waya bu l’elongamelo k’ɔlɔlɔ kendana la nshi yayaye. Koko, sho tekɔ l’elongamelo k’ɔlɔlɔ, teya dia lushi lɔmɔtshi akambo tshɛ wa nyangu wayoshila. (Eny. 21:​3, 4) Diakɔ di’asambishaso l’ohetoheto tshɛ, lo nyanga anto wele l’etema w’ɔlɔlɔ wa sho mbewoya elongamelo kaso ndo awui wetawɔso lo kɛnɛ kendana la Jehowa.​—⁠Ezek. 9:⁠4.

⁵ Kadiyɛso kɛmɔtshi kele ombatshi mboka akate ate: “Ndoko kɛnɛ koleki mbisha ɔngɛnɔngɛnɔ oleki kimanyiya anto dia vɔ mbeya Jehowa ndo akambo ande wa mɛtɛ.” Nyɛsɔ totshe tshɛ kakokaso sala dia keketsha anto efula dia vɔ mbetawɔ sho mbeka la wɔ Bible lawakawɔ. Kambɛ Jehowa ndo ndjakimɔ shamɛ dia kimanyiya anto akina dia mbokambɛ mbelaka ɔngɛnɔngɛnɔ woleki tshɛ.​—⁠Etsha 20:⁠35.