Woho watosha ɛtɛkɛta waki Yeso ɔngɛnɔngɛnɔ
“[Yeso] akambela l’ukungu. . . . Ambeki andi wakayi le ndi. Ndi . . . akawaetsha.”—MAT. 5:1, 2.
1, 2. a) Lo diaaso diakɔna diakasha Yeso Dako dia lo dikona? b) Ngande wakatatɛ Yeso sawo diande?
LO ƆNƆNYI 31 T.D., Yeso akahembola lɔkɛndɔ lande l’esambishelo lakandatshu la Ngalileya dia nde tosala difɛstɔ di’Elekanelo la Jerusalɛma. (Joa. 5:1) Lam’akandakalola la Ngalileya, nde akalɔmbɛ otsho w’otondo dia Nzambi mbɔlɔmbɔla etena kakandahombe sɔna apɔstɔlɔ 12. La wedi a pindju, olui w’anto wakatshumana etena kakakɔnɔlaka Yeso wanɛ waki la hemɔ. Kâmɛ la ambeki ande ndo l’anto akina waki lawɔ, nde akadjasɛ lo dikona ndo akatatɛ mbaetsha.—Mat. 4:23–5:2; Luka 6:12-19.
2 Yeso akatatɛ sawo diande, mbuta ate Dako dia lo dikona lo mɛnya dia ɔngɛnɔngɛnɔ ndjaka oma lo monga la diɔtɔnganelo di’ɔlɔlɔ la Nzambi. (Adia Mateu 5:1-12.)a Ɔngɛnɔngɛnɔ ekɔ ‘eongelo k’onto lele l’ɔlɔ w’efula.’ Akambo divwa wakate Yeso washa onto ɔngɛnɔngɛnɔ mɛnyaka lande na kele Akristo l’ɔngɛnɔngɛnɔ ndo ɛtɛkɛta akɔ wekɔ ohomba efula ɛlɔ kɛnɛ oko wakiwɔ ambeta ɛnɔnyi suke la 2 000. Nyɛsɔ tɔsɛdingole kakianɛ akambo asɔ l’ɔmɔmɔ.
‘Wanɛ weya ehomba awɔ wa lo nyuma’
3. Kakɔna kalembetshiya mbeya ehomba aso wa lo nyuma?
3 ‘Wanɛ weya ehomba awɔ wa lo nyuma wekɔ la ɔtshɔkɔ, nɛ dia diolelo dia l’olongo diele diawɔ.’ (Mat. 5:3) ‘Wanɛ weya ehomba awɔ wa lo nyuma’ mbeyaka dia wekɔ l’ohomba w’ɛlɔmbwɛlɔ ndo kɛtshi kaki Nzambi.
4, 5. a) Lande na kele wanɛ weya ehomba awɔ wa lo nyuma wekɔ l’ɔngɛnɔngɛnɔ? b) Ngande wakokaso kotsha ehomba aso wa lo nyuma?
4 Wanɛ weya ehomba awɔ wa lo nyuma wekɔ la ɔtshɔkɔ, “ne dia diulelu dia l’ulungu dieli diawo.” Mbetawɔ Yeso oko Mɛsiya akasha ambeki ande wa lo ntambe ka ntondo diaaso dia vɔ tolɛ kâmɛ la nde lo Diolelo diaki Nzambi dia l’olongo. (Luka 22:28-30) Oyadi tekɔ l’elongamelo ka tôlɛ kâmɛ la Kristo l’olongo kana tekɔ lo kongɛ lɔsɛnɔ la pondjo lo paradiso ka la nkɛtɛ l’ɛlɔmbwɛlɔ ka Diolelo, sho kokaka monga l’ɔngɛnɔngɛnɔ naka mɛtɛ tekɔ lo mbeya ehomba aso wa lo nyuma ndo naka mɛtɛ sho shihodiaka dia tekɔ l’ohomba w’ɛlɔmbwɛlɔ kaki Nzambi.
5 Aha anto tshɛ mbeya ehomba awɔ wa lo nyuma nɛ dia anto efula bu la mbetawɔ ndo hawɔshi diangɔ di’ekila la nɛmɔ. (2 Tes. 3:1, 2; Heb. 12:16) L’atei wa toho takokaso kotsha ehomba aso wa lo nyuma mbele ndo wekelo wa l’etete wa Bible, ndjasha l’ohetoheto l’olimu wa mbetɛ anto ambeki ndo mbɔtɔka lo nsanganya y’Akristo mbala la mbala.—Mat. 28:19, 20; Heb. 10:23-25.
Wanɛ walela wele la “otshoko”
6. Waa na “watulelaka,” ndo lande na kewɔ la “otshoko”?
6 “Wane watulelaka, weko la otshoko, ne dia vo wayusambama.” (Mat. 5:4) “Wane watulelaka” wekɔ oko ‘wanɛ weya ehomba awɔ wa lo nyuma.’ Vɔ hawolele lo kawana l’ɔtɛ w’ekakatanu wele la wɔ lo lɔsɛnɔ. Koko, vɔ ndelaka l’ɔtɛ wa kɔlɔ kokawɔ oko wewɔ atshi wa pɛkato ndo l’ɔtɛ w’awui wasalema l’ɔtɛ wele anto bu kokele. Lande na kele anto walela asɔ wekɔ la “otshoko”? Nɛ dia vɔ wekɔ la mbetawɔ le Nzambi ndo le Kristo ndo vɔ sambemaka lo monga la diɔtɔnganelo di’ɔlɔlɔ la Jehowa.—Joa. 3:36.
7. Ngande wahombaso mbɔsa andja waki Satana?
7 Onde sho ndelaka l’onto ndo l’onto l’ɔtɛ w’akambo wa kɔlɔ wambokokanɛ l’andja ɔnɛ waki Satana? Ngande mɛtɛ wɔsaso kɛnɛ kakoka andja ɔnɛ tosha? Ɔpɔstɔlɔ Joani akafunde ate: “Akambu wa la kete, saki ka dimba, ndu saki ka ashu, ndu utaku a lumu, vo waha uma le Shesu, keli weko uma la kete.” (1 Joa. 2:16) Ko kayotosala naka ‘yimba y’andja ɔnɛ,’ mbuta ate wolo watshutshuya anto wânganyi la Nzambi yotonge la shɛngiya lo lonyuma laso? Etena kɛsɔ, sho pombaka nɔmba l’etete, mbeka Ɔtɛkɛta wa Nzambi ndo nyanga ekimanyielo oma le dikumanyi. Naka sho ndjasukanya la Jehowa, kete ‘tayosambema’ oyadi dui diakɔna tshɛ diatɔkɔmɔla.—1 Kor. 2:12; Osam. 119:52; Jak. 5:14, 15.
“Wane weli la memakana” wekɔ la ɔtshɔkɔ!
8, 9. Kakɔna kalembetshiya monga la memakana, ndo lande na kele wanɛ wele la memakana la ɔtshɔkɔ?
8 “Wane weli la memakana, weko la otshoko, ne dia vo wayukita kete.” (Mat. 5:5) “Memakana,” kana okitshakitsha tshikitana la ɔhɔdu kana diki dia l’ɛlɔmɔ. (1 Tim. 6:11) Naka tekɔ la memakana, kete tayokiɛnya lo sala lolango laki Jehowa ndo lo mbetawɔ ɛlɔmbwɛlɔ kande. Tɔ kayɛnama nto lo woho wasalɛso asekaso ambetawudi ndo anto akina akambo. Memakana ka ngasɔ mbɔtɔnɛka la dako diakasha ɔpɔstɔlɔ Paulo.—Adia Romo 12:17-19.
9 Bonde kele wanɛ wele la memakana wekɔ la ɔtshɔkɔ? Nɛ dia Yeso akate dia “vo wayukita kete.” Yeso mbele Onto la ntondo lakakite nkɛtɛ. (Osam. 2:8; Mat. 11:29; Heb. 2:8, 9) Koko, “ekito kame la Kristu” wele la memakana wayokita vɔ lawɔ nkɛtɛ. (Romo 8:16, 17) Anto akina efula wele la memakana wayokondja lɔsɛnɔ la pondjo lo nkɛtɛ kayɔlɔmbwama oma le Diolelo diaki Yeso.—Osam. 37:10, 11.
10. Ngande wakoka ohombelo wa memakana monga la shɛngiya lo waɛsɛ w’olimu wele la so l’etshumanelo ndo lo diɔtɔnganelo diasaso l’anto akina?
10 Lo ɛnyɛlɔ ka Yeso, sho pombaka monga la memakana. Ko kakɔna kayotosala naka sho mbeyamaka oko anto wasala akambo wa ngala? Dui sɔ kokaka ndawoya anto. Naka tekɔ Akristo w’apami wakombola monga la waɛsɛ l’etshumanelo, kete hatotokondja ɛkɛndɛ naka tekɔ la dionga dia ngasɔ. (1 Tim. 3:1, 3) Paulo akatɛ Tito dia nde tetemala mbohola Akristo wa la Kɛrɛtɛ ɔnɛ: “Tawuyalaki la ngala, keli wayali la memakana, wenya antu tshe ndjakitshakitsha lu akambu tshe.” (Tito 3:1, 2) Wanɛ wele la memakana wekɔ mɛtɛ tshondo y’ɔtshɔkɔ le anto akina!
Vɔ wekɔ la ndjala ka “akambu w’ololo”
11-13. a) Kakɔna kalembetshiya monga la ndjala ndo la mposa k’akambo w’ɔlɔlɔ? b) Ngande “wayulutshama” wanɛ wele la ndjala ndo la mposa k’akambo w’ɔlɔlɔ?
11 “Wane weli la ndjala la pusa ka akambu w’ololo weli la otshoko, ne dia vo wayulutshama.” (Mat. 5:6) “Akambu w’ololo” wakatɛkɛtaka Yeso lo divɛsa nɛ ekɔ dionga dia sala kɛnɛ kele ɔlɔlɔ lo yoho yɔtɔnɛ la lolango ndo la wadjango waki Nzambi. Omembi w’esambo akate dia nde aki la ‘nsaki k’efula’ k’ɛlɛmbɛ wosembwe waki Nzambi. (Osam. 119:20) Onde sho mbɔsaka akambo w’ɔlɔlɔ la nɛmɔ di’efula lo yɛdikɔ ya sho monga la ndjala ndo la mposa kawɔ?
12 Yeso akate dia wanɛ wele la ndjala ndo la mposa k’akambo w’ɔlɔlɔ wekɔ la ɔtshɔkɔ nɛ dia vɔ “wayulutshama.” Dikambo sɔ diakakotshama l’ɔkɔngɔ wa Pɛntɛkɔsta ka 33 T.D., nɛ dia nyuma k’ekila kaki Jehowa kakatatɛ ‘mɛnya anto wa la nkɛtɛ tolembetelo ta shika tendana la akambo w’ɔlɔlɔ.’ (Joa. 16:8) Lo tshimbo ya nyuma k’ekila, Nzambi akasambiya apami dia vɔ funda Afundelo w’Akristo wa lo Grɛkɛ, wele ohomba efula dia ‘mbekiya anto lo akambo w’ɔlɔlɔ.’ (2 Tim. 3:16) Nyuma kaki Nzambi tokimanyiyaka nto dia ‘ndɔta lonto l’oyoyo lakatongama lo ndjela lolango la Nzambi lo losembwe la mɛtɛ.’ (Ef. 4:24) Shi ekɔ mɛtɛ dui di’ekeketshelo dia mbeya dia wanɛ wayatshumoya wayanga edimanyielo ka pɛkato yawɔ l’ekimanyielo k’olambo wa tshungo waki Yeso kokaka monga anto w’ɔlɔlɔ lo washo waki Nzambi?—Adia Romo 3:23, 24.
13 Naka tekɔ la elongamelo ka nsɛna la nkɛtɛ, kete ndjala ndo mposa kele la so k’akambo w’ɔlɔlɔ kayoshila tshɛ lo tshɛ etena kayotonga la lɔsɛnɔ la pondjo l’andja wosembwe. Lam’akatakongɛ etena kɛsɔ, nyɛsɔ toyashikikɛ dia nsɛna lo yoho yɔtɔnɛ la ɛlɛmbɛ waki Jehowa. Yeso akate ate: “Ntundu nyutayangi diulelu la ololo wa [Nzambi].” (Mat. 6:33) Sala dui sɔ ayotosha awui efula wa sala l’olimu wa Nzambi ndo tayonga l’ɔngɛnɔngɛnɔ wa mɛtɛ.—1 Kor. 15:58.
Ɔkɔkɔ wele “wane wukana ketshi” wekɔ la ɔtshɔkɔ
14, 15. Ngande wakokaso mbokana kɛtshi, ndo lande na kele “wane wukana ketshi” wekɔ la ɔtshɔkɔ?
14 “Wane wukana ketshi, weko la otshoko, ne dia vo wayuwauka ketshi.” (Mat. 5:7) “Wane wukana ketshi” tɛtɛka solo ndo mbokaka anto akina kandji. Yeso akakimanyiya anto efula wakasowaka lo dihindo nɛ dia nde akawaokaka kɛtshi. (Mat. 14:14) Kɛtshi mɛnamaka lo awui wendana la dombo etena kadimanyiya anto wanɛ wakâsalɛ kɔlɔ, oko wadimanyiya Jehowa wanɛ wayatshumoya la kɛtshi. (Etum. 34:6, 7; Osam. 103:10) Sho kokaka mɛnya kɛtshi lo yoho shɔ oma l’ɛtɛkɛta ndo l’etsha aso w’amɛna wa kimanyiya wanɛ wasowa. Woho wa dimɛna wa mɛnya kɛtshi ele lo mbewoya anto akina akambo wa mɛtɛ wa lo Bible. Oko wakandoke olui w’anto kɛtshi, Yeso “akatatela mbaetsha akambu efula.”—Mako 6:34.
15 Tekɔ l’ɔkɔkɔ w’oshika wa mbetawɔ ɛtɛkɛta waki Yeso w’ɔnɛ: “Wane wukana ketshi, weko la otshoko, ne dia vo wayuwauka ketshi.” Naka sho salɛka anto akina akambo la kɛtshi, kete vɔ lawɔ wayotosalɛka akambo la kɛtshi. Naka sho mbokanaka kɛtshi, kete Nzambi lawɔ ayotoka kɛtshi lo lushi l’elombwelo. (Jak. 2:13) Paka anto wokana kɛtshi mbayodimanyiyama pɛkato ndo mbayokondja lɔsɛnɔ la pondjo.—Mat. 6:15.
Ɔkɔkɔ wele “wane weli la etema wa pudipudi” la ɔtshɔkɔ
16. Kakɔna kalembetshiya monga “la etema wa pudipudi,” ndo ngande wele wanɛ wele la dionga sɔ ‘mɛnaka Nzambi’?
16 “Wane weli la etema wa pudipudi, weko la otshoko, ne dia vo wayena [Nzambi].” (Mat. 5:8) Naka tekɔ “la etema wa pudipudi,” kete dui sɔ diayɛnama oma lo akambo wɔsaso la nɛmɔ, lo nsaki ndo lo eyango aso ndo tayɔkɛnɛmɔla “ngandji kambuya uma l’utema a pudipudi.” (1 Tim. 1:5) Wanɛ wonga pudipudi kânga lo woshɛshɛ “wayena [Nzambi].” Kɛsɔ halembetshiya ɔnɛ vɔ wayɛna Jehowa lo yoho ya mɛtɛ mɛtɛ, nɛ dia Jehowa akate dia “untu heyi menami, ku ndi ntshikala la lumu.” (Etum. 33:20) Koko, lam’ele Yeso akakɛnɛmɔla lonto laki Nzambi lo yoho ya kokele, nde akakoke mbuta ate: “One lakamenyi, akenyi Papa.” (Joa. 14:7-9) Oko weso atɛmɔdi waki Jehowa wele lanɛ la nkɛtɛ, sho kokaka ‘mɛna Nzambi’ oma lo kɛnɛ katosalɛnde. (Jobo 42:5) Akristo w’akitami mɛnaka Nzambi lo yoho ya mɛtɛ mɛtɛ etena kolɔwɔ oko ditongami dia lo nyuma.—1 Joa. 3:2.
17. Shɛngiya yakɔna yele la otema wa pudipudi le so?
17 Lam’ele onto lele l’otema wa pudipudi ekɔ pudipudi lo lɔkɛwɔ ndo lo nyuma, nde hasale akambo wele mindo lo washo waki Jehowa. (1 Ek. 28:9; Is. 52:11) Naka tekɔ l’otema wa pudipudi, kete kɛnɛ kataso ndo kasalaso kayɛnamaka pudipudi ndo hatotosala ndoko dikambo l’etema ehende l’olimu wakambɛso Jehowa.
‘Wanɛ walanga wɔladi’ komaka ana waki Nzambi
18, 19. Dionga dia ngande diele la ‘wanɛ walanga wɔladi’?
18 ‘Wanɛ walanga wɔladi wekɔ la ɔtshɔkɔ, nɛ dia vɔ wayelamɛ ana waki Nzambi.’ (Mat. 5:9) ‘Wanɛ walanga wɔladi’ mbeyamaka oma lo kɛnɛ kasalawɔ ndo kahawasale. Naka tekɔ weho w’anto wakakanyiyaka Yeso lam’akandate ɛtɛkɛta ɛsɔ, kete tayonga anto walanga wɔladi ndo ‘hatotokaloya kɔlɔ lo kɔlɔ.’ Koko, ‘tayotetemalaka ndjela kɛnɛ kele ɔlɔlɔ le anto akina.’—1 Tes. 5:15.
19 Tshɛkɛta ya lo Grɛkɛ yokadimɔmi ɔnɛ “wanɛ walanga wɔladi” lo Mateu 5:9 nembetshiyaka “wanɛ wadja wɔladi.” Dia sho monga l’atei wa wanɛ walanga wɔladi, sho pombaka sala la wolo dia mbidja ki. Wanɛ wadja wɔladi hawosale kânga dikambo ɔtɔi diakoka ‘kakitola angɛnyi.’ (Tuk. 16:28) Oko weso wanɛ walanga wɔladi, sho salaka la wolo dia ‘mbidja ki lam’asaso l’anto tshɛ.’—Heb. 12:14.
20. Waa na wele kakianɛ “ana wa [Nzambi],” ndo waa nto wayoyokoma ana wa Nzambi?
20 Wanɛ walanga wɔladi wekɔ l’ɔngɛnɔngɛnɔ nɛ dia “wayuwaeta vati: Ana wa [Nzambi].” Akristo w’akitami wele la kɔlamelo mbɔsamaka oma le Jehowa oko “ana wa [Nzambi].” Vɔ wamboshilaka monga la diɔtɔnganelo dia ma ma vɔ la Jehowa oko anande, nɛ dia vɔ wekɔ la mbetawɔ le Kristo ndo vɔ tɛmɔlaka ‘Nzambi ka ngandji ndo ka wɔladi’ l’otema ɔtɔi. (2 Kor. 13:11; Joa. 1:12) Ko kayotota dikambo dia “ekoko ekina” waki Yeso walanga wɔladi? Yeso ayonga ‘Shɛwɔ ka pondjo’ l’Ɛlɔmbwɛlɔ kande k’ɛnɔnyi kinunu, koko l’ekomelo k’ɛlɔmbwɛlɔ kɛsɔ nde ayoyakitshakitsha l’ɛse ka Jehowa ndo anto asɔ wayokoma ana wa Nzambi lo yoho ya mɛtɛ mɛtɛ.—Joa. 10:16; Is. 9:6; Romo 8:21; 1 Kor. 15:27, 28.
21. Ngande wayotosala akambo naka tekɔ lo ‘nɔmbwama la nyuma’?
21 Naka tekɔ lo ‘nɔmbwama la nyuma,’ kete anto akina wayɛna esadi eto dia sho nyangaka wɔladi. ‘Hatotonga la lotamanya’ kana ‘la esolanyi.’ (Ngal. 5:22-26) Koko, sho salaka la wolo dia “mbidjase la antu tshe ki.”—Romo 12:18.
Wekɔ l’ɔngɛnɔngɛnɔ kânga mbahɛnyahɛnyamawɔ!
22-24. a) Naa ɛkɔkɔ watshutshuya wanɛ wahɛnyahɛnyama l’ɔtɛ w’akambo w’ɔlɔlɔ dia monga la ɔngɛnɔngɛnɔ? b) Kakɔna kayotɔsɛdingola lo asawo ahende wa wekelo wayela?
22 “Wane wambusuyama dia akambu w’ololo, weko la otshoko, ne dia diulelu dia l’ulungu dieli diawo.” (Mat. 5:10) Yeso akakotsha ate: “Lam’ayuwunyotenga, lam’ayuwunyusuya, lam’ayuwunyumamanyia wehu tshe w’akambu wa kolo dia dikambu diami, nyeko la otshoko. Nyongenengene, nyutamanya ngenangena, ne dia difutu dianyu dieko efula l’ulungu, ne dia wakasuya amvutshi waki la ntundu kanyu wuhu ako.”—Mat. 5:11, 12.
23 Lo ɛnyɛlɔ kaki aprɔfɛta waki Nzambi wa lo nshi y’edjedja, Akristo nongamɛka dia tɛngama, mpɛnyahɛnyama ndo mamatanyiyama l’ɔtɛ wa “akambu w’ololo.” Koko etena kakikɛso akambo asɔ la kɔlamelo tshɛ, sho mongaka l’ɔlɔ w’efula wa ngɛnyangɛnya ndo tombola Jehowa. (1 Pet. 2:19-21) Asui wadiɛnɛso la wɔ hawokoke kitshakitsha ɔngɛnɔngɛnɔ wele la so lo kambɛ Jehowa oma ko kakianɛ kana lo nshi yayaye. Vɔ hawotokitshakitsha ɔngɛnɔngɛnɔ wele la so oyadi wa tolɛ kâmɛ la Kristo lo Diolelo dia l’olongo kana wa kondja lɔsɛnɔ la pondjo oko ambolami wa la nkɛtɛ wa Diolelo sɔ. Ɛtshɔkɔ ɛsɔ mɛnyaka dia sho mbetawɔmaka le Nzambi, nde tokaka kɛtshi ndo ekɔ la lokaho.
24 Ekɔ nto akambo akina efula wakokaso mbeka oma lo Dako dia lo dikona. Tayɔsɛdingola wetshelo efula lo asawo ahende wa wekelo wayela. Nyɛsɔ tende woho wakokaso kamba la ɛtɛkɛta waki Yeso Kristo ɛsɔ.
[Nɔte ka l’ɛse ka dikatshi]
a Tshɛkɛta ya lo Grɛkɛ yokadimɔmi ɔnɛ “otshoko” lo Bible k’Ekila lo avɛsa anɛ nembetshiyaka “ɔngɛnɔngɛnɔ.”
Ngande wayoyokadimola?
• Lande na kele ‘wanɛ weya ehomba awɔ wa lo nyuma’ wekɔ l’ɔngɛnɔngɛnɔ?
• Ɛkɔkɔ akɔna wele la “wane weli la memakana” dia monga l’ɔngɛnɔngɛnɔ?
• Lande na kele Akristo l’ɔngɛnɔngɛnɔ kânga mbahɛnyahɛnyamawɔ?
• Dui diakɔna diasha ɔngɛnɔngɛnɔ diakatɛkɛta Yeso dialeka kɔngɛnyangɛnya?
[Osato wa lo lɛkɛ 7]
Akambo divwa washa ɔngɛnɔngɛnɔ wakatɛkɛta Yeso wekɔ ohomba efula ɛlɔ kɛnɛ oko wakiwɔ nshi shɔ
[Osato wa lo lɛkɛ 8]
Yoho ya dimɛna ya mbokana kɛtshi ele lo mbewoya anto akina akambo wa mɛtɛ w’oma lo Bible