Tonge Kâmɛ la Jehowa nde l’Ɔnande l’Ɔngɛnɔngɛnɔ
Tshɛ Dikambo Dioleki Ohomba dia l’Ɔnɔnyi Diayosalema lo Ngɔndɔ ka Sato 28
1 Lam’ayotosala Dambo dia Nkumadiɔndjɔ dia Dikɔlɔ diayonga Ngɔndɔ ka Sato 28, 2002, l’ɔkɔngɔ wa ɛɔtwɛlɔ ka wonya, tayɛnya dia tekɔ l’ɔngɛnɔngɛnɔ wa monga kâmɛ sho la Jehowa Nzambi nde la Yeso Kristo. Lo diaaso dia lânde sɔ, atshikadi w’Akristo w’akitami w’esɔ wayɔngɛnangɛna ‘osanga’ wa lânde ɔsɔ wele lawɔ vɔ l’ekitɔ ekina wa Diolelo, vɔ la Shɛwɔ, ndo vɔ l’Ɔnande. (1 Joa. 1:3; Ef. 1:11, 12) Miliyɔ y’“ekoko ekina” wayokana yimba lo diaaso dia lânde diele lawɔ dia monga kamɛ la Jehowa nde l’Ɔnande oko wewɔ lawɔ lokanyi ɔtɔi dia kotsha olimu wa Nzambi!—Joa. 10:16.
2 Tokambe Kâmɛ la Diɔtɔnganelo dia Wolo: Jehowa nde la Yeso wokongaka nshi tshɛ kâmɛ l’ɔngɛnɔngɛnɔ. Kâmɛ kawɔ kakamɛ oma ko mɔmbɔkɔmbɔla ntondo k’anto tongama. (Mika 5:2) Dimama dia wolo dia ngandji k’efula diaki lam’asawɔ vɔ ahende. Oko lomba lambɔsama oko tshondo y’onto, Ɔna enondo ɔsɔ akakoke mbuta la ntondo ka nde ndjoya lanɛ la nkɛtɛ ate: “Dimi lakôngenyangenyaka nshi tshe, ndu lakangenangenaka la ntundu kandi tena tshe.” (Tuk. 8:30) Woho wakandetsha ɛnɔnyi heyama mbadia kâmɛ la ɔnɛ lele Kiɔkɔ ya ngandji akonge la shɛngiya y’efula le Ɔna Nzambi!—1 Joa. 4:8.
3 Lam’akandɛnyi di’anto waki l’ohomba w’etshungwelo, Jehowa akakimɔ Ɔnande ɛtɔi lakandote, ɔnɛ lakalekaka ngɛnangɛna anto dia nde ndjokimɔ olambo wa tshungo, watosha tshɔyi y’elongamelo kele laso. (Tuk. 8:31) Oko wele Jehowa nde l’Ɔnande kâmɛ dia kotsha sangwelo ɔtɔi, sho ndjalaka kâmɛ la wɔ ndo lam’asaso lo dimama dia wolo dia ngandji tasala lolango la Nzambi l’ɔngɛnɔngɛnɔ tshɛ.
4 Tɛnya Lowando Laso l’oma k’Ɛs’Otema: Lo monga lo losanganya la Eohwelo ndo lo mpokamɛ la yambalo ndo la dilɛmiɛlɔ di’efula, sho koka mɛnya lowando la mɛtɛ lele laso lo ngandji katoka Jehowa ndo l’olambo wakakimɔ Ɔnande dikambo diaso. Elembetshiyelo wayoshama lo kɛnɛ kendana l’ɛnyɛlɔ kaki Yeso ka ngandji, kɔlamelo yande polo ndo lo nyɔi dia mbisha tshungo, ndo la lowandji lande oko Nkumekanga ka lo Diolelo diaki Nzambi diamboshikikɛmaka, aha la mbohɛ ɛtshɔkɔ wayela Diolelo sɔ le anto. Wayotohola nto ohomba wa tetemala la mɛnya mbetawɔ kaso, wa kambaka olimu l’ohetoheto lo ndjela lolango laki Jehowa oko “ekambi kame la wo lu akambu wa mete.”—3 Joa. 8; Jak. 2:17.
5 Tokimanyiya Anto Akina dia Vɔ Sangana Laso: Olui wa dikumanyi pombaka mbidja welo wa lânde dia keketsha apandjudi tshɛ wahayosambisha wele lo bɛtshi diawɔ dia nkɛtɛ dia mbɔtɔ lo Eohwelo ka nyɔi ka Kristo. (Mat. 18:12, 13) Sala listɛ l’anto wayoyolanga mbelɛ di’aha kânga onto ɔtɔi mbohamɛ ndo dia onto l’onto tshɛ mbelamɛ.
6 Onde wɛ mbeyaka anto akina wakoka ndja lo Eohwelo? Ɔsa yɛdikɔ ya nyanga woho wa mbatshutshuya oya lo diaaso sɔ. Elɛwɔ la wangasanu tshɛ, ndo okiyawɔ dia wayolongwama dimɛna. Tosale la wolo aso tshɛ dia mbelɛ ambeki aso wa Bible ndo anto akina wayasha, l’ase nkumbo kaso ndo anyaso oya lo dikambo nɛ dioleki ohomba dia l’ɔnɔnyi. Anto tshɛ weya ‘nɛmɔ di’efula diele l’ewo ka Kristo Yeso,’ wakakoke kondja ɛtshɔkɔ oma l’olambo wa tshungo. (Fil. 3:8) Wanɛ wele la mbetawɔ l’olambo waki Kristo kokaka ndjala la elongamelo ka shikaa ka lɔsɛnɔ la pondjo.—Joa. 3:16.
7 Tatɔnyɔlake pondjo shɛngiya yakoka Eohwelo monga layɔ le anto wele l’etema w’ɔlɔlɔ. Ambeta ɛnɔnyi ehende, lo wodja wele lo disɛnga dielɛwɔ Papousie-Nouvelle-Guinée, anto 11 wakande lɔkɛndɔ lo masuwa ɔmɔtshi wa tshitshɛ l’edja ka wenya wa tango 17 l’atei wa ndjale kaki ndo l’asuku paka l’oyango wa tɔtɔ lo losanganya la Ehwelo. Lande na? Vɔ wakate vate: “Sho takalange tosala Eohwelo ka nyɔi ka Kristo sho l’atɛmɔdi akina waki Jehowa; diakɔ diele akasungana mɛtɛ sho munda lɔkɛndɔ lakɔ.” Ohokanyiya ohetoheto waki l’anto wakɛnya nsaki asɔ ndo lowando lakonge lawɔ dia ndjala kâmɛ la Jehowa, l’Ɔnande, ndo l’anangɛwɔ w’Akrito l’ɔngɛnɔngɛnɔ tshɛ!
8 Lɔmba anto wayasha tshɛ dia vɔ tatɛ mbeka Bible. Keketshawɔ dia vɔ mbɔtɔka lo nsanganya mbala tshɛ ndo dia vɔ mbewoyaka anto akina awui wa mɛtɛ wekawɔ. Kimanyiyawɔ dia ‘kɛndakɛnda l’osase’ ndo dia ‘ntsha akambo wa mɛtɛ’ lo kamba olimu l’atɔndɔ wa lo Bible lo lɔsɛnɔ lawɔ. (1 Joa. 1:6, 7) Kimanyiyawɔ dia monga la diokanelo dia wolo la Jehowa ndo dia tetemala nyomɔngɛnangɛna diɛsɛ dia monga kâmɛ dia ntshaka lolango lande.
9 Ande diɛsɛ dia mamba dia monga l’ɔngɛnɔngɛnɔ kâmɛ “lu nyuma otoi, la utema otoi; [ta]tetemala lu mbetawo ka lukumu l’ololo” lee! (Fil. 1:27, 28) Nyɛsɔ tolongame l’ɔngɛnɔngɛnɔ etena kayotosangana kâmɛ l’asekaso atɛmɔdi lo Eohwelo lo Ngɔndɔ ka Sato 28, ndo tokake Jehowa nde l’Ɔnande losaka nshi tshɛ!—Luka 22:19.