‘Kanyotshake ɔnkɔnɛ dia mbohɔkami’
Eohwelo ka nyɔi ka Yeso kayonga lo Ngɔndɔ ka nɛi 2
1. Lande na kele Ngɔndɔ ka nɛi 2, 2007, ekɔ datɛ di’ohomba?
1 Lo Ngɔndɔ ka nɛi 2, 2007, miliyɔ y’anto wa lo andja w’otondo wayosangana dia mbohɔ nyɔi k’olambo kaki Yeso. Yeso akavu nɛ dia nde akasukɛka lowandji laki She lele l’olongo, lo mɛnya dia kɛnɛ kakate Satana Diabolo di’anto kambɛka Nzambi paka l’ɔtɛ w’eyango awɔ wa lokaki kekɔ kashi. (Jobo 2:1-5) Dambo dia dikɔlɔ dia Nkumadiɔndjɔ toholaka nto dia lo nambola lɔsɛnɔ lande la kokele laha la pɛkato, Yeso ‘akakimɔ anima ande dia tshungola anto efula.’ (Mat. 20:28) Oma lɔkɔ, Yeso akadjangɛ ambeki ande ate: ‘Kanyotshake ɔnkɔnɛ dia mbohɔkami.’ (Luka 22:19) Shi lowando lele laso l’ɔtɛ wa woshasha wa diambo waki Nzambi ɔsɔ pombaka totshutshuya dia sho tatɛ ndjalɔngɔsɔla kakianɛ dia mbohɔ tshelo yoleki ya ngandji shɔ?—Joa. 3:16.
2. Ngande wakokaso nɔngɔsɔla etema aso dikambo dia Eohwelo?
2 Tɔlɔngɔsɔlɛ etema aso: Sho kokaka nɔngɔsɔla etema aso dikambo dia Eohwelo kɛsɔ lo sɛdingola kɛnɛ kakasalema lo nshi ya komelo ya lɔsɛnɔ laki Yeso lânɛ la nkɛtɛ oko onto. (Ez. 7:10) Dia tokimanyiya lo dikambo sɔ, sho koka tana ekongelo ka lânde ka wadielo wa Bible lo nshi ya Eohwelo lo biukubuku Tɔsɛdingolake Afundelo lushi la lushi—2007 ndo lo Calendrieer 2007. Lɔkɔ vɔ mbidja wadielo wa tenyi dia Bible diɔtɔnɛ la nshi yakasalema awui akɔ wendana la nyɔi ka Yeso lo ndjela alamanaka wakamba laso nshi nyɛ. Nshi ndo adatɛ wele lo ɛkɔndɔ wa lo Bible ndjelaka alamanaka w’ase Juda, mbuta ate ase Juda wakatatɛka mbadia lushi oma lo ɛɔtwɛlɔ ka wonya ka lushi lɔmɔtshi polo lo ɛɔtwɛlɔ ka wonya ka lushi lokina. Takadje yimba lo yoho ya wadielo wa nshi shɔ ndo wadielo wa Bible wendana la Eohwelo wakakongɛma lo ndjela awui asɔ. Mvusola awui wele lo wadielo wa Bible ɔsɔ ndo kana yimba lo dɔmbɛlɔ lo ngandji k’efula katoka Nzambi ayotokimanyiya dia sho ndeka kondja wahɔ oma lo Eohwelo.
3. Ngande wakokaso kimanyiya wanɛ wɛnya nsaki ndo wahayosambisha dia vɔ kondja wahɔ oma lo Eohwelo?
3 Têle anto akina lo Eohwelo: Dikatshi di’okotsha diele lo Olimu aso wa Diolelo wa Ngɔndɔ ka hende diakewoya okahanyelo wa lânde dia mbelɛ anto oya lo dui di’ohomba sɔ. Onde wɛ amboyalɔngɔsɔla dia ndeka mbisha lonya l’okahanyelo ɔsɔ? Onde wɛ ambosala listɛ l’anto wayoyelɛ lo Eohwelo, ndo onde wɛ ambotatɛ mɛnana lawɔ? Yalɔngɔsɔla dia ndja la ntondo ka wonya la dikɔlɔ dia lushi la Eohwelo dia nongola anto wakayelɛ kâmɛ ndo anto akina wɛnya nsaki. Wɛ mbeyaka mɛna ɔlɔlɔ mbidjasɛ kâmɛ la wɔ ndo ndjashikikɛ dia wekɔ la Bible ndo la dibuku di’esambo. Eyanyawɔ la anto akina wa lo etshumanelo. Onga suke dia kadimola ambola awɔ l’ɔkɔngɔ wa losanganya. Lɔmbawɔ dia vɔ ndja lo sawo dia lo sɛkɛ dia lânde diayoshama lo Ngɔndɔ ka nɛi 15. Lo yoho ya lânde dikumanyi wayoyashikikɛ dia wanɛ wakasanganaka ntondo l’etshumanelo koko hawoyosala dikambo sɔ wambolongola dikatshi dia leeta dia ndja lo Eohwelo ndo lo sawo dia lo sɛkɛ.
4. Ngande wakokaso kimanyiya anto dia vɔ tetemala pama lo nyuma l’ɔkɔngɔ wa Eohwelo?
4 Tokimanyiya wanɛ weke ka ndjasha lo akambo wa mɛtɛ ndo wahayosambisha dia vɔ pama: Ɔtɛkɛtshi ayewoya lo tshena pe dia sho mbekaka l’anto Bible ofele ndo ayokeketsha wanɛ weke ka ndjasha lo akambo wa mɛtɛ dia vɔ tetemala mbeka awui wendana la Jehowa. Wɛ kokaka kamba la awui wotshi ɔtɛkɛtshi dia nɔmba wanɛ wakayelɛ dia vɔ nyomeka awui efula wendana la Jehowa. Naka vɔ watatatɛ mbeka Bible, kete yashikikɛ dia ntshɔ towaenda aha la tshimbatshimba l’ɔkɔngɔ wa Eohwelo ndo mbaɛnya woho wekaso l’anto Bible. Dia vɔ pama lo nyuma, vɔ wayonga l’ohomba wa mbɔtɔka lo nsanganya ya l’etshumanelo. (Heb. 10:24, 25) La dui sɔ lo yimba, keketshawɔ dia vɔ tatɛ mbɔtɔka lo nsanganya mbala la mbala. Dikumanyi la dia ndjalɔngɔsɔla dia tembola Akristo wahayosambisha wakɔtɔ lo Eohwelo ndo mbakimanyiya dia vɔ ndeka kana yimba lo awui wakatɛkɛtama lo sawo. Dui sɔ mbeyaka mbakeketsha dia vɔ tatɛ nto sambisha kâmɛ la ase etshumanelo.
5. Ngande wayotokondja wahɔ oma lo Eohwelo?
5 Eohwelo toshaka diaaso dia sho kana yimba dimɛna lo kɛnɛ kakatosalɛ Jehowa ndo Yeso. Okanelo wa yimba wa ngasɔ pamiaka ngandji kokaso Jehowa ndo Yeso ndo dui sɔ mongaka la shɛngiya lo lɔkɛwɔ laso. (2 Kor. 5:14, 15; 1 Joa. 4:11) Ɔnɛ ekɔ etena ka sho tatɛ ndjalɔngɔsɔla ndo nɔngɔsɔla wanɛ wɛnya nsaki lo kɛnɛ kendana la diaaso di’ohomba sɔ ‘diewoyaso nyɔi ka Nkumadiɔndjɔ.’—1 Kor. 11:26.