Woho wa mbohɔka tshungo la lowando tshɛ
1, 2. Lande na kahombaso mbohɔka tshungo la lowando tshɛ?
1 Dia kitanyiya didjango diaki Yeso, Akristo wa lo andja w’otondo wayosangana Lushi la samalo, Ngɔndɔ ka sato 22, 2008, l’ɔkɔngɔ wa ɛɔtwɛlɔ ka wonya dia mbohɔ nyɔi ka Yeso Kristo. (Luka 22:19; 1 Kor. 11:23-26) Lowando l’efula lele laso lo kɛnɛ tshɛ kakasalema ambeta ɛnɔnyi 1975 mbatotshutshuya dia sho sala dikambo sɔ. Lo nama olowanyi ande wa kokele etena kakandasoyama ndo kakandadiakema l’otamba w’asui, Yeso akakidia lokombo laki She ndo akasha okadimwelo wa kokele lo tɔfwɛfwɛ takadje Satana.—Jobo 1:11; Tuk. 27:11.
2 Dikila diaki Yeso diakatshulɔma diakasha sheke y’oyoyo nɛmɔ ndo diakakimanyiya anto wele kema kokele dia vɔ mbetawɔma oko ana waki Nzambi wele la elongamelo ka mbolɛ kâmɛ la Kristo lo Diolelo diande dia l’olongo. (Jer. 31:31-34; Mako 14:24) Ndo nto, oko wakalembetshiya Yeso Nikɔdɛmɔ, ngandji k’efula kakoke Nzambi anto kakɛnama hwe woho wakandakimɔ Ɔnande la ngandji efula oko olambo dikambo di’anto.—Joa. 3:16.
3. Wahɔ akɔna wayokondja wanɛ wayɔtɔ lo Eohwelo?
3 Tele anto akina: Olimu aso wa Diolelo wa Ngɔndɔ ka ntondo wakatokeketsha dia sho sala listɛ l’anto wahombaso mbelɛ ndo sho mbaelɛ l’onto ndo l’onto. Onde wɛ ambotatɛ mbelɛ wanɛ wele lo listɛ layɛ? Onde wɛ amboyalɔngɔsɔla dia ndeka mbisha lonya lo esambishelo ka lânde kayotatɛ lo Ngɔndɔ ka sato 1 dia mbelɛ anto oya lo Eohwelo? Wanɛ wayɔtɔ lo losanganya lɔsɔ wayohokamɛ wetshelo wa lo Afundelo wayowakimanyiya dia vɔ monga la mbetawɔ lo tshungo katɔla lo lɔsɛnɔ la pondjo.—Romo 10:17.
4. Lande na kahombaso koma la ntondo lo Eohwelo?
4 Wanɛ tshɛ wele l’akoka pombaka ndjalɔngɔsɔla dia koma la ntondo dia ndjolongola la wangasanu tshɛ wanɛ wakalongola akatshi wa leeta la lânde. Lam’ele tena efula anto efula ndjaka lo Eohwelo, ekɔ ohomba sho ndeka mbidja eyoyo ɛsɔ ndo anto akina wayoyaka mbala mɔtshi lo nsanganya yimba.
5. Ngande wakokaso nɔngɔsɔla etema aso dikambo dia Eohwelo?
5 Tɔlɔngɔsɔlɛ etema aso: Biukubuku Tɔsɛdingolake Afundelo lushi la lushi—2008 ndo Calendrier 2008 kekɔ la ekongelo ka lânde ka wadielo wa Bible lo nshi ya Eohwelo tatɛ Ngɔndɔ ka sato 17. Ɔsɛdingwelo w’akambo w’ohomba wakasalema lo nshi y’ekomelo ka lɔsɛnɔ laki Yeso la lanɛ la nkɛtɛ ayotokimanyiya dia sho nɔngɔsɔla etema aso dikambo dia Eohwelo. (Ez. 7:10) Kana yimba lo dɔmbɛlɔ l’ɛkɔndɔ wa lo Bible ɛsɔ ayofudia lowando laso lo ngandji kakatoke Jehowa nde la Ɔnande lo kimɔ tshungo.—Osam. 143:5.
6. Monga la lowando l’ɔtɛ wa tshungo ayonga la shɛngiya yakɔna le so?
6 Oko wayasukana Eohwelo, nyɛsɔ toyalɔngɔsɔlɛ ndo tɔlɔngɔsɔlɛ anto akina dimɛna dimɛna dikambo dia dui di’ohomba sɔ. Mbohɔ tshungo la lowando tshɛ ayokeketsha diɔtɔnganelo diasaso la Jehowa nde la Ɔnande. (2 Kor. 5:14, 15) Dui sɔ diayototshutshuya nto dia sho mbaokoya lo mboka anto akina ngandji ka ndjahombia.—1 Joa. 4:11.