‘Nyotetemale ndjelami’
1 Anto efula ndjashaka tshɛ dia ndjangɛnyangɛnya, koko tena efula vɔ bu l’ɔngɛnɔngɛnɔ akɔ. Yeso akadjanga dia anto monga la lokaho la l’otema ɔtɔi lasha ɔngɛnɔngɛnɔ. (Etsha 20:35) Nde akate ate: “Naka untu alanga ndjelami, ndi ayaseke, . . . andjeli.” (Mako 8:34) Dui sɔ halembetshiya tsho ndjahombiaka ɛngɛnɔngɛnɔ ɛmɔtshi. Diɔ nembetshiyaka ngɛnyangɛnyaka Jehowa lushi tshɛ, koko aha sho shoamɛ.—Romo 14:8; 15:3.
2 Tɔsɛdingole ɛnyɛlɔ kaki ɔpɔstɔlɔ Paulo. L’ɔtɛ wa ‘nɛmɔ di’efula diele la ewo ka Kristo Yeso,’ Paulo akatshike mbesa eyango ande ndamɛ, ndo akayasha l’ohetoheto tshɛ dia tɔla wahɔ wa Diolelo otsha la ntondo. (Fil. 3:7, 8) Nde akate ate: “Dimi layuyala la ongenongeno otekoya dia nkimo diango, ndu ndjakimo” dia kambɛ anto akina. (2 Kor. 12:15) Onto tshɛ pombaka ndjambola ɔnɛ: ‘Ngande wakambami la wenya, wolo, akoka, ndo la falanga yami? Onde dimi ndjashaka tshɛ dia wahɔ ami hita, kana dimi nyangaka dia ngɛnyangɛnya Jehowa?’
3 Waaso wa mbisha lonya: Ɔnɔnyi tshɛ, ekambi waki Nzambi mbetshaka wenya a tango ndekana miliyara ɔtɔi l’olimu washimbɛ nsɛnɔ w’esambishelo ka Diolelo. Lo etshumanelo, akɛnda ndo epalanga kambaka weho w’elimu wotshikitanyi lo wahɔ w’anto akina. Olimu w’efula wekɔ lo salema nto lo kɛnɛ kendana la nsanganya ya weke ndo la wokelo ndo ɔlɔngɔswɛlɔ wa mbalasa yakamba laso dia tɔla ɔtɛmwɛlɔ wa mɛtɛ otsha la ntondo. Ndo tokane yimba nto dia ngandji kele la anangɛso wakamba lo Kɔmite ka diɔtɔnganelo la mpitadi ndo Kɔmite y’elui wembola ɛkɔnyi. Welo wa l’otema ɔtɔi ɛsɔ wekɔ tshondo y’ɔtshɔkɔ le nkumbo kaso k’Akristo k’onto l’ɔnango!—Osam. 110:3.
4 Etena katomba mpokoso kɛmɔtshi kana dui dimɔtshi dia wanyandja, sho kondjaka diaaso dia kimanyiya asekaso lo toho efula. Koko mbala efula, sho mbeyaka tsho mɛna dia osekaso Okristo ekɔ l’ohomba w’ekimanyielo kana w’ekeketshelo. (Tuk. 17:17) Etena keso suke dia kambɛ anto akina ndo tɔla wahɔ wa Diolelo otsha la ntondo, sho mbokoyaka ɛnyɛlɔ kaki Yeso. (Fil. 2:5-8) Nyɛsɔ tosalake la wolo dia tetemala sala ngasɔ.