Ayoyokimɔ dia kondja lɔsɛnɔ la pondjo?
“Engo kakona kayengonya untu la lumu landi?”—MAT. 16:26.
1. Lande na kakatone Yeso dako diaki Petero?
ƆPƆSTƆLƆ Petero akambe heyama kɛnɛ kakandoke. Yeso Kristo owandji ande wa ngandji, akate “hwe” dia Nde aki suke la soyama ndo ndjakema! Petero akakadimola la eyango w’amɛna tshɛ lo ndaka Yeso ate: ‘Yâsalɛ ɔlɔlɔ Nkumadiɔndjɔ, dikambo dia ngasɔ diatokokomɛke.’ Yeso akasha Petero ɔkɔngɔ ndo akɛlɛ otsha le ambeki ande akina. Ondo ndo ambeki akina waki la kanyi yâmɛ ya kɔlɔ yaki la Petero shɔ. Oma lâsɔ, nde akatɛ Petero ate: “Satana! Utshimbi l’okongo ami. We hadji yimba lu akambu wa [Nzambi], paka lu akambu w’antu.”—Mako 8:32, 33; Mat. 16:21-23.
2. Ngande wakɛnya Yeso kɛnɛ kalɔmbama dia monga ombeki ande wa mɛtɛ?
2 Ɛtɛkɛta wayela waki Yeso wakakoke kimanyiya Petero dia nde mbeya lande na kakohangwɛ Yeso l’ɔtɛ wa dako diande. Yeso “aketi ului w’antu la ambeki andi,” ko akate ate: “Naka untu alanga ndjelami, ndi ayaseke, embe utamba andi [w’asui], andjeli. Ne dia untu tshe lalanga mamela lumu landi, ayulushisha; keli one lashisha lumu landi dikambu diami la dia lukumu l’ololo, ayulamela.” (Mako 8:34, 35) Mbokɛmaka hwe dia Yeso aki suke la nambola lɔsɛnɔ lande ndo nde akalongamɛka nto dia ambeki ande monga vɔ lawɔ suke dia kimɔ nsɛnɔ yawɔ l’olimu waki Nzambi. Naka vɔ sala ngasɔ, vɔ wayɔtshɔkwama efula.—Adia Mateu 16:27.
3. a) Ambola akɔna wakoke Yeso ampokami ande? b) Dimbola dia hende diaki Yeso diakohola ampokami ande dui diakɔna?
3 Lo diaaso diakɔ diâmɛ sɔ, Yeso akoke ambola ahende watshutshuya dia kana yimba: “Waho akona wayuyala le untu lakundja kete tshe, naka ndi ambushisha lumu landi lu dikambu diako?” ndo “Engo kakona kukuki untu mengonya la lumu landi?” (Mako 8:36, 37) Lo ndjela kanyi y’anto, okadimwelo wa dimbola dia ntondo mbokɛmaka hwe. Ndoko wahɔ wayonga l’onto lo kondja andja w’otondo ko nde shisha lɔsɛnɔ lande. Onto kokaka ngɛnangɛna la ɔngɔnyi paka naka nde ekɔ la lɔsɛnɔ. Dimbola diaki Yeso dia hende di’ɔnɛ: “Engo kakona kukuki untu mengonya la lumu landi?” akakoke mbohola ampokami awui wa kashi wakate Satana lo nshi ya Jɔbɔ ate: “Kene tshe keli la untu, ndi nkikimoka ne dia lumu landi.” (Jobo 2:4) Le anto amɔtshi wahatɛmɔla Jehowa, ɛtɛkɛta waki Satana ɛsɔ mbeyaka monga mɛtɛ. Anto efula kokaka sala oseka dikambo tshɛ, ɛnyɛlɔ oko sekola ɛlɛmbɛ wendana la lɔkɛwɔ dia tshikala la lɔsɛnɔ. Koko, Akristo mɛnaka akambo lo yoho yotshikitanyi.
4. Lande na kele ambola waki Yeso wekɔ la kitshimudi ya lânde le Akristo?
4 Sho mbeyaka dia Yeso kondja la nkɛtɛ dia ndjosha anto yônge ya dimɛna, ɔngɔnyi ndo lɔsɛnɔ la pondjo l’andja ɔnɛ. Nde akaye dia ndjodiholɛ anto mboka k’otsha lo lɔsɛnɔ la pondjo l’andja w’oyoyo ndo elongamelo ka lɔsɛnɔ la pondjo kɛsɔ mbɔsaso la nɛmɔ di’efula. (Joa. 3:16) Okristo kokaka shihodia dimbola dia ntondo diaki Yeso di’ɔnɛ: “Wahɔ akɔna wele l’onto naka nde kondja andja w’otondo ko shisha elongamelo kande ka lɔsɛnɔ la pondjo?” Okadimwelo ele ndoko wahɔ. (1 Joa. 2:15-17) Dia tokimanyiya dia sho kadimola dimbola dia hende diaki Yeso, sho mbeyaka ndjambola ɔnɛ: ‘Diangɔ dingana dietawɔmi kimɔ dia shikikɛ elongamelo kami ka lɔsɛnɔ l’andja w’oyoyo?’ Oko wadiɛnya yoho yaso ya lɔsɛnɔ, okadimwelo wa dimbola sɔ mɛnyaka wolo wele la elongamelo kɛsɔ l’etema aso.—Ɛdika la Joani 12:25.
5. Ngande wakokaso kondja woshasha wa lɔsɛnɔ la pondjo?
5 Lo mɛtɛ, Yeso konangaka mbuta dia lɔsɛnɔ la pondjo ekɔ difuto. Lɔsɛnɔ, kânga lɔnɛ la mondo lele laso lo dikongɛ di’akambo nɛ lekɔ woshasha. Hatokoke lisomba. Yoho yâmɛ yakokaso kondja woshasha wa lɔsɛnɔ la pondjo ele lo ‘monga la mbetawɔ le Kristo Yeso’ ndo le Jehowa “ufutshi a wane watûyangaka.” (Ngal. 2:16; Heb. 11:6) Koko, pombaka mɛnya mbetawɔ oma le etsha, lam’ele “mbetawo kaha la etsha mvokaka.” (Jak. 2:26) Omalɔkɔ, etena kakanaso yimba lo dimbola diaki Yeso, ayonga dimɛna sho sɛdingola dimɛna dimɛna diangɔ dingana dietawɔso shisha lo dikongɛ di’akambo nɛ ndo kɛnɛ ketawɔso sala l’olimu waki Jehowa dia mɛnya dia mbetawɔ kaso kekɔ la lɔsɛnɔ.
“Kristu kundjangenyangenya ndame”
6. Kakɔna kaketshaka Yeso lo dihole dia ntondo?
6 Lo dihole dia nde mbika washo lo kɛnɛ kakawoshaka andja wa lo nshi yande, Yeso akake washo lo akambo woleki ohomba ndo akatone ohemba wa monga la lomombo la l’emunyi. Lɔsɛnɔ lande aki lɔsɛnɔ la ndjahombia ndo l’okitanyiya otsha le Nzambi. Lo dihole dia nde ndjangɛnyangɛnya ndamɛ, nde akate ate: “Dimi latutshaka akambu [watɔngɛnyangɛnyaka Nzambi] nshi tshe.” (Joa. 8:29) Kakɔna kaketawɔ Yeso shisha dia ngɛnyangɛnya Nzambi?
7, 8. a) Kakɔna kakayahombia Yeso, ndo ngande wakandafutama? b) Dimbola diakɔna diahombaso ndjambola?
7 Lo diaaso dimɔtshi, Yeso akatɛ ambeki ande ate: “On’a untu, kundja dia antu mbukambela ulimu, keli akayi dia mbakambela ulimu, la dia mbakimwela lumu landi uku etshungwelu ka antu efula.” (Mat. 20:28) Yema la ntondo, lam’akatatɛ Yeso mbewola ambeki ande dia nde aki suke la ‘kimɔ lɔsɛnɔ lande,’ Petero akolake dia nde ndjasalɛ ɔlɔlɔ. Koko, Yeso akatshikala nge. Nde aketawɔ shisha lɔsɛnɔ lande la kokele dikambo di’anto. Etombelo waki la dionga diaki Yeso dia ndjahombia ele elongamelo kande ka nshi yayaye kaki shikaa. Nde akolwama ndo ‘akatodjasɛ lo lonya l’omi la Nzambi.’ (Etsha 2:32, 33) Ɔnkɔnɛ, nde akatotshikɛ ɛnyɛlɔ ka dimɛna efula.
8 Ɔpɔstɔlɔ Paulo akalake Akristo wa la Rɔma ‘diaha vɔ ndjangɛnyangɛnya’ ndo akawaohola dia kânga “Kristu kundjangenyangenya ndame.” (Romo 15:1-3) Omalɔkɔ, lo yɛdikɔ yakɔna yayotokamba la dako diaki ɔpɔstɔlɔ sɔ ndo yetawɔso ndjahombia dia mbokoya Kristo?
Jehowa nangaka dia sho mbosha kɛnɛ koleki ɔlɔlɔ le so
9. Kakɔna mɛtɛ kasala Okristo etena kayakimɔnde le Nzambi?
9 Lo Isariyɛlɛ w’edjedja, Ɛlɛmbɛ wa Mɔsɛ wakataka dia ɛhɔmbɔ w’ase Hɛbɛru wakahombaka tshungɔ lo ɔnɔnyi w’esambele wa lɔhɔmbɔ lawɔ kana lo ɔnɔnyi wa Jibile. Koko vɔ wakakokaka sala dui dikina. Naka ɔhɔmbɔ nangaka nkumɛnde, kete nde akakoke sɔna dia tshikala ɔhɔmbɔ ande lɔsɛnɔ lande l’otondo. (Adia Euhwelu k’Elembe 15:12, 16, 17.) Sho lawɔ salaka ɔsɔnwɛlɔ wa ngasɔ etena kayakimɔso le Nzambi. Sho mbetawɔka la lolango laso dia sala lolango la Nzambi, koko aha nango yaso. Lo sala ngasɔ, sho mɛnyaka ngandji k’efula kokaso Jehowa ndo nsaki kele laso ka mbokambɛ pondjo pondjo.
10. Lo yoho yakɔna yeso anto waki Nzambi, ndo ngande wahomba dikambo sɔ monga la shɛngiya lo tokanyi ndo l’etsha aso?
10 Naka wɛ ekɔ lo mbeka la Ɛmɛnyi wa Jehowa nshi nyɛ, ekɔ lo sambisha lokumu l’ɔlɔlɔ ndo mbɔtɔka lo nsanganya y’Akristo, kete tekɔ lo kandola. Sho nongamɛka dia kem’edja wɛ ayoyakimɔ le Jehowa ndo mboka dimbola diakoke ose Etiyɔpiya Filipɛ di’ɔnɛ: “Kakona kanshimba dimi mbatizama?” (Etsha 8:35, 36) Diɔtɔnganelo diasayɛ la Nzambi diayonga oko nɛ diaki la Akristo wele Paulo akafundɛ ate: “Alimba waha wanyu; ne dia nyu nyakasumbama la ushinga a wulu.” (1 Kor. 6:19, 20) Oyadi tekɔ l’elongamelo ka tɔsɛna l’olongo kana ka nsɛna la nkɛtɛ, naka tamboyakimɔka le Jehowa, kete sho taya anto Ande. Ekɔ mɛtɛ ohomba dia nɛndja nsaki ya lokaki ndo ‘tshika dia monga ɛhɔmbɔ waki anto’! (1 Kor. 7:23) Ekɔ mɛtɛ diɛsɛ dia woke dia monga okambi waki Jehowa wa kɔlamelo wasala lolango lande!
11. Olambo akɔna wakeketshama Akristo dia kimɔ, ndo kakɔna kalembetshiya dui sɔ mɛtɛ oko wɛnyamidiɔ lo elambo wakashamaka lo Ɛlɛmbɛ wa Mɔsɛ?
11 Paulo akalake asekande ambetawudi ate: ‘Nyolambole alemba anyu oko olambo wasɛna, w’ekila, wetawɔma le Nzambi, olimu w’ekila la ekanelo kanyu ka yimba.’ (Romo 12:1) Ondo ɛtɛkɛta ɛsɔ wakohola Akristo w’ase Juda elambo wakawalambolaka lo ɔtɛmwɛlɔ awɔ la ntondo ka vɔ koma ambeki waki Yeso. Vɔ wakeyaka dia lo Ɛlɛmbɛ wa Mɔsɛ, nyama yakawalambolaka Jehowa l’ediakelo yakahombe monga nyɛ yoleki amɛna. Nyama ya kɔlɔ kombetawɔmaka. (Mal. 1:8, 13) Ngasɔ mbediɔ etena kalambolaso alemba aso oko ‘olambo wasɛna.’ Sho mbishaka Jehowa kɛnɛ koleki ɔlɔlɔ le so, koko aha tsho kɛnɛ katshikala l’ɔkɔngɔ wa sho kotsha nsaki yaso shoamɛ. Etena kayakimɔso le Nzambi, sho mbetawɔka mbosha ‘nsɛnɔ’ yaso mbidja ndo wolo aso, akoka aso ndo ekundji aso. (Kol. 3:23) Ko kakɔna kalembetshiya dui sɔ mɛtɛ mɛtɛ na?
Tokambe la wenya aso la lomba
12, 13. Naa yoho mɔtshi yakokaso mbisha Jehowa kɛnɛ koleki ɔlɔlɔ leso?
12 Yoho mɔtshi ya mbisha Jehowa kɛnɛ koleki ɔlɔlɔ le so ele lo kamba la wenya aso la lomba. (Adia Efeso 5:15, 16.) Dui sɔ nɔmbaka dia sho monga la ndjakimɛ. Tɔsɛngiya t’oma l’andja ɔnɛ kâmɛ ndo woho weso kema kokele totshutshuyaka dia sho kamba la wenya aso paka di’ɔngɛnɔngɛnɔ ndo dia wahɔ aso shoamɛ. Lo mɛtɛ, “engo tshe keko la etena kato,” mbidja ndo etena ka kɛnya tɔkɛnyɔ ndo ka kamba olimu aso wa l’emunyi dia kotsha ɛkɛndɛ aso w’Okristo. (Und. 3:1) Koko, Okristo lakayakimɔ le Nzambi pombaka monga la wɛdimo ndo kamba la wenya ande la lomba.
13 Etena kakembola Paulo osomba wa Atɛna, nde akɛnyi dia “asi Atena tshe la angendangenda waki loko, kuntsha nduku dikambu dikina, paka mvuta la mbuka dikambu di’uyuyu.” (Etsha 17:21) Woho akɔ wâmɛ mbele ɛlɔ kɛnɛ anto efula mbetshaka wenya awɔ wetshetsha. Akambo wɔsɛ anto wenya wa nshi nyɛ ele menda televiziɔ, kɛnya tɔkɛnyɔ ta lo vidɛo ndo tɔkɛnyɔ tokina. Awui efula wekɔ wakoka toshishɛ wenya aso. Naka sho ndjasha lo awui akɔ, kete sho mbeyaka ndjonya yimba lo ehomba aso wa lo nyuma. Sho mbeyaka ndjokoma lo mbuta dia lam’ele tekɔ la wesanu efula, sho kema la wonya wa sala ‘akambo woleki ohomba,’ mbuta ate akambo wɔtɔnɛ la olimu wakambɛso Jehowa.—Fil. 1:9, 10.
14. Ambola akɔna wahombaso kana yimba dimɛna dimɛna la wɔ?
14 Ɔnkɔnɛ, oko weso ekambi waki Jehowa wakayakimɔ le nde, onto l’onto ayambole ɔnɛ: ‘Onde wadielo wa Bible, okanelo wa yimba ndo dɔmbɛlɔ wekɔ l’ekongelo kami ka lushi la lushi?’ (Osam. 77:12; 119:97; 1 Tes. 5:17) ‘Onde dimi mbɔsaka etena ka nɔngɔsɔla nsanganya y’Akristo? Onde dimi keketshaka anto akina dia vɔ mbisha kɔmatɛrɛ lo nsanganya?’ (Osam. 122:1; Heb. 2:12) Ɔtɛkɛta wa Nzambi mbutaka dia Paulo nde la Baranaba waketsha ‘etena k’otale watɛkɛta la dihonga tshɛ dia lowandji laki Jehowa.’ (Etsha 14:3) Onde wɛ kokaka tshikitanya akambo wele la yɛ dia wɛ mbetsha wenya efula, kânga ‘etena k’otale,’ l’olimu w’esambishelo lo kamba oko ombatshi mboka?—Adia Heberu 13:15.
15. Ngande wakamba dikumanyi la wenya awɔ la lomba?
15 Etena kakembola ɔpɔstɔlɔ Paulo nde la Baranaba etshumanelo k’Akristo ka la Atiyɔka, “vo wakatshikala la ambeki edja” dia mbakeketsha. (Etsha 14:28) Woho akɔ wâmɛ mbele, ɛlɔ kɛnɛ dikumanyi dioludi la ngandji ndekaka kamba la wenya awɔ dia keketsha anto akina. Lâdiko di’olimu awɔ w’esambishelo, dikumanyi kambaka la wolo dia nama ɛkɔkɔ, nyanga ɔkɔkɔ wamboshishɔ, kimanyiya wanɛ wele la hemɔ ndo kotsha ɛkɛndɛ ekina efula wa lo etshumanelo. Naka wɛ ekɔ ɔnangɛso lambobatizama, onde akambo wele la yɛ koshaka diaaso dia wɛ kotsha kɛnɛ kahombama dia mɛmba ɛkɛndɛ ekina w’olimu?
16. Naa toho tɔmɔtshi takokaso ‘salɛka asekaso ambetawudi kɛnɛ kele ɔlɔlɔ’?
16 Anto efula wakakondja ɔngɛnɔngɛnɔ lo kimanyiya wanɛ wakashisha diangɔ lo mpokoso k’oma le anto kana k’oma lo diangɔ diakatongama. Ɛnyɛlɔ, kadiyɛso kɛmɔtshi kaya l’ɛnɔnyi 65 kakamba lo Bɛtɛlɛ akande nkɛndɔ y’etale lo waaso amɔtshi dia tokimanyiya anto wakahomɔ mpokoso. Lande na kakandakambe la nshi yande ya vakashi lo yoho shɔ? Nde mbutaka ate: “Kânga mbemi bu la diewo dimɔtshi dia lânde, laki la diɛsɛ dia sala kɛnɛ tshɛ kaki ohomba kakamakoke sala. Dimi lakakeketshama efula lo mɛna mbetawɔ ka wolo kaki la analengo la akadiyɛmi wakashisha diangɔ diawɔ efula.” Ndo nto, nunu di’anto wa l’andja w’otondo mbishaka lonya lo wokelo wa Mbalasa ya Diolelo ndo wa Mbalasa ya Nsanganya ya weke. Lo ndjasha lo elimu ɛsɔ, sho ‘salɛka asekaso ambetawudi kɛnɛ kele ɔlɔlɔ.’—Ngal. 6:10.
“Dimi leko la nyu nshi tshe”
17. Ɛngɔ kakɔna kayoyokimɔ dia kondja lɔsɛnɔ la pondjo?
17 Tshunda di’anto wanganyi la Nzambi diayanga komɛ. Hateye shikaa etena kakɔna kayosalema dui sɔ. Koko, sho mbeyaka dia ‘etena kambotshikala kaya mondo’ ndo ‘akambo wa l’andja ɔnɛ wekɔ lo tatshikitana.’ (Adia 1 Koreto 7:29-31.) Kɛsɔ ndekaka mɛnya ohomba wa dimbola diakoke Yeso ɔnɛ: “Engo kakona kukuki untu mengonya la lumu landi?” Aha la tâmu, tayetawɔ kimɔ ɛngɔ tshɛ katɔlɔmba Jehowa dia sho kondja ‘lɔsɛnɔ l’oshika.’ (1 Tim. 6:19) Lo mɛtɛ, ekɔ ohomba efula kitanyiya dako diaki Yeso dia ‘tetemala mboyela’ ndo dia ‘nyanga ntondo diolelo.’—Mat. 6:31-33; 24:13.
18. Wɛkamu akɔna wakoka monga laso, ndo lande na?
18 Ekɔ mɛtɛ dia ndjela Yeso hatongaka nshi tshɛ dikambo dia wɔdu ndo oko wakadite Yeso, anto amɔtshi wayoshisha nsɛnɔ yawɔ lo dikongɛ di’akambo nɛ l’ɔtɛ wa dikambo sɔ. Koko, l’ɛnyɛlɔ ka Yeso, sho mbewɔka djonga ya ‘ndjasalɛ ɔlɔlɔ.’ Tekɔ la mbetawɔ l’eshikikelo kakandasha ambeki ande w’akitami wa lo ntambe ka ntondo ɔnɛ: “Dimi leko la nyu nshi tshe, edja ndu ekumelu k’andja.” (Mat. 28:20) Ɔnkɔnɛ, nyɛsɔ tokambake la wenya aso ndo la akoka aso l’olimu w’ekila lo yɛdikɔ yoleki. Naka sho sala ngasɔ, kete tayɛnya wɛkamu aso ɔnɛ Jehowa ayotokokɛ lo fɔnu ka woke kana ayotolola lo andja w’oyoyo. (Heb. 6:10) Lo sala ngasɔ, tayɛnya dia sho mbɔsaka woshasha wa lɔsɛnɔ la nɛmɔ di’efula.
Ngande wayoyokadimola?
• Ngande wakɛnya Yeso nsaki k’efula ka kambɛ Nzambi ndo anto?
• Lande na kahombaso ndjasɛka, ndo ngande wasalaso dui sɔ?
• L’Isariyɛlɛ w’edjedja, paka elambo wa ngande waketawɔmaka le Jehowa, ndo wetshelo akɔna wakondjaso lo dikambo sɔ ɛlɔ kɛnɛ?
• Lo toho takɔna takokaso kamba la wenya aso la lomba?
[Esato wa lo lɛkɛ 26]
Yeso akasalaka nshi tshɛ akambo wakangɛnyangɛnyaka Nzambi
[Osato wa lo lɛkɛ 28]
Ase Isariyɛlɛ waki la lowando wakashaka Jehowa diangɔ diakaleke dimɛna dia sukɛ ɔtɛmwɛlɔ wa mɛtɛ
[Esato wa lo lɛkɛ 29]
Sho ngɛnyangɛnyaka Nzambi etena kakambaso la wenya aso la lomba