Hatoyɔsɛna nto dikambo diaso shoamɛ
“[Kristo] akavwela tshe, ne dia waku weli la lumu, tawuyalaki la lumu dia dikambu diawo vame.”—2 KORETO 5:15.
1, 2. Didjango diakɔna dia l’Afundelo diakatshutshuya ambeki waki Yeso wa lo ntambe ka ntondo diaha vɔ monga la lokaki?
AKI otsho wa ekomelo wa lɔsɛnɔ laki Yeso la nkɛtɛ. Wenya engana la ntondo ka nde kimɔ lɔsɛnɔ lande lo wahɔ w’anto tshɛ wakahombe ndjonga la mbetawɔ le nde. L’otsho ɔsɔ, Yeso akatɛ ambeki ande wa kɔlamelo akambo efula w’ohomba. L’atei w’akambo asɔ mbaki ndo didjango diakendanaka la dionga di’ohomba efula diakahombe ambeki ande mbeyama. Nde akawatɛ ate: “Olembe w’uyuyu mbamumunyusha, dia nyu mbukana ngandji. Nyukani ngandji uku akamanyuki ngandji. Uma lu dikambu ne, antu tshe wayeya vati: Ambeki ami mbenyu, naka nyu nyayukana ngandji.”—Joani 13:34, 35.
2 Akristo wa mɛtɛ pombaka kɛnɛmɔla ngandji ka ndjahombia lam’asa onto la onyande ndo mbetshaka ehomba w’asekawɔ ambetawudi la ntondo k’ehomba awɔ. Vɔ hawohombe mengenga kânga dia ‘kimɔ nsɛnɔ yawɔ lo wahɔ wa angenyi awɔ.’ (Joani 15:13) Ngande wakasale Akristo wa ntondo lam’akawoke didjango sɔ di’oyoyo? Lo dibuku diande dimɔtshi dia lokumu dielɛwɔ Apologétique, Tertullien laki ofundji wa lo ntambe ka hende akate kɛnɛ kakataka anto lo dikambo di’Akristo ɔnɛ: ‘Ohonyenda woho wokanawɔ ngandji ndo wewɔ suke dia onto mvwɛ onyande.’
3, 4. a) Lande na kahombaso ndɔshana la lokaki? b) Kakɔna kayotɔsɛdingola lo sawo nɛ?
3 Sho lawɔ pombaka ‘mɛmbanela wetsho onto la onyande, dia kotsha ɔlɛmbɛ wa Kristo.’ (Ngalatiya 6:2) Koko, lokaki ekɔ wekamu ɔmɔtshi wa woke efula watoshimba dia kitanyiya ɔlɛmbɛ waki Kristo ndo ‘nanga Jehowa Nzambi kaso l’anima aso tshɛ ndo la yimba yaso tshɛ, ndo nanga onyaso oko wayalangaso.’ (Mateu 22:37-39) Oko weso kema kokele, tekɔ la mbekelo ka mongaka la lokaki. Lâdiko dia lâsɔ, ekakatanu wa lushi la lushi, yimba ya shɛmanedi ya la kalasa kana lo dihole di’olimu, ndo welo wadjama dia kotsha ehomba wa lo lɔsɛnɔ, ndekaka pamia mbekelo kakotɔ la so kɛsɔ. Mbekelo ka lokaki kɛsɔ hakitakita. Ɔpɔstɔlɔ Paulo akewola ate: “Lo nshi ya nkomeelo . . . anto wayoonga nkaki.”—2 Timɔteyo 3:1, 2, Dyookaneelo dy’Oyooyo.
4 Otsha l’ekomelo k’olimu ande wa lanɛ la nkɛtɛ, Yeso akatɛ ambeki ande akambo asato wakahombe mbakimanyiya diaha monga la lokaki. Akambo akɔna asɔ na, ndo ngande wakokaso kondja wahɔ oma lo wetshelo ande?
Okanga wa shikaa!
5. Etena kakawasambishaka lo nɔrdɛ ka Ngalileya, dikambo diakɔna diakatɛ Yeso ambeki ande, ndo lande na kakadianyangiya?
5 Yeso akasambishaka suke la Kayisariya Filipi ka lo nɔrdɛ ka Ngalileya. Ɛtshi ka nkɛtɛ ka wɔladi ndo kele la ɛnamelo ka dimɛna kɛsɔ akaleke mɛnama oko dihole dia tɔsa lɔpɛpɛ koko aha dia toyahombia. Koko lam’akinde lɛkɔ, Yeso akatatɛ mbitɛ ambeki ande ate: “Dieli la mi dia ntsho la Jerusalema dia nsuyama asui efula le dikumanyi, elombedi a waki la afundji, dia ndjakema, la dia mbulwama lushi la satu.” (Mateu 16:21) Kɛnɛ kakatɛ Yeso ambeki ande kɛsɔ kakahombe mɛtɛ mbanyangiya efula, nɛ dia polo l’etena kɛsɔ vɔ wakalongamɛka dia Owandji awɔ shikikɛ Diolelo diande la nkɛtɛ!—Luka 19:11; Etsha 1:6.
6. Lande na kakahangwɛ Yeso Petero la wolo tshɛ?
6 Mbala kakɔ ɔtɔi Petero “akatshu la [Yeso], akatate mbulaka, ata ati: [“yasalɛ ɔlɔlɔ,” NW] Khumadiondjo! Dikambu diako tadiuyalaki pundju le ye!” Ngande wakokadimola Yeso na? “Keli ndi akasikiso, akatela Petero ati: Satana, utshimbi l’okongo ami! Utamba a ntakanyami mbeye, ne dia we kema lu leke la [Nzambi] paka lu leke l’antu.” Ande otshikitanu wakonge lam’asa waonga asɔ ahende! Yeso aketawɔ la lolango tshɛ yoho ya lɔsɛnɔ la ndjahombia lakawosha Nzambi ndo lakahombe mbokonya lo nyɔi ka l’otamba w’asui l’ɔkɔngɔ wa ngɔndɔ ngana tsho. Petero akɔlɔmbɛ dia nde monga la lɔsɛnɔ la dimɛna. Nde akawotɛ ate: “Yasalɛ ɔlɔlɔ.” Aha la tâmu Petero aki la tokanyi ta amɛna. Koko, Yeso akohangwɛ mbala kakɔ ɔtɔi nɛ dia Petero aketawɔ dia sɛngiyama oma le Satana. Petero komonga la ‘kanyi yaki Nzambi, koko yaki anto.’—Mateu 16:22, 23.
7. Oko wofundamidiɔ lo Mateu 16:24, yoho yakɔna ya lɔsɛnɔ yakɛnya Yeso ambeki ande dia ndjela?
7 Weho w’ɛtɛkɛta wakatɛ Petero Yeso kokaka mbokɛma ɛlɔ kɛnɛ. Mbala efula anto wa l’andja ɔnɛ tshutshuyaka anto dia ‘ndjasalɛ ɔlɔlɔ’ kana dia ‘nsɛna lɔsɛnɔ laha l’ekakatanu.’ Koko, Yeso akalɔmbɛ dia monga la dionga diotshikitanyi la sɔ. Nde akatɛ ambeki ande atɛ: “Endaka onto nangaka njelami, ayaasɛkɛ, ɛɛmbɛ otamba waakinde w’aswi kele anjele.” (Mateyo 16:24, Dyookaneelo dy’Oyooyo.) Dibuku dimɔtshi (The New Interpreter’s Bible) mbutaka ɔnɛ: “Ɛtɛkɛta ɛsɔ kema leeta la monga ombeki, koko ɔsɔ ekɔ leeta lakɛnɛmɔla kitshimudi y’ombeki le wanɛ mɛtɛ wamboshilaka la mbetawɔ leeta la Kristo.” Akambo asato wakɛnya Yeso oko wofundamidiɔ lo divɛsa nɛ la dia kitanyiyama oma le ambetawudi. Nyɛsɔ tende dikambo ɔtɔi ɔtɔi.
8. Lembetshiya kɛnɛ kalembetshiya ndjasɛka shoamɛ.
8 Dikambo dia ntondo ele sho pombaka ndjâsɛka shoamɛ. Tshɛkɛta ya lo Grɛkɛ “ndjâsɛka” nembetshiyaka onto lele suke dia tona nsaki ya lokaki yele lande kana kɛnɛ kɔngɛnyangɛnya. Ndjâsɛka shoamɛ halembetshiya nsɛka ɛngɛnɔngɛnɔ ɛmɔtshi lo tena dimɔtshi, kana ndjadima ɛngɛnɔngɛnɔ tshɛ wa lo lɔsɛnɔ kana ndjalanya. Alemba aso ‘aya bu waso shoamɛ’ lo woho ɔnɛ wele tambetawɔ dia kimɔ nsɛnɔ yaso ndo diangɔ diaso tshɛ le Jehowa. (1 Koreto 6:19, 20) Lo dihole dia sho ndjalɔmbɔla shoamɛ, nsɛnɔ yaso yɔlɔmbwama oma le Nzambi. Ndjâsɛka shoamɛ kɛdikɛdi mbɔsa yɛdikɔ ya ntsha lolango laki Nzambi, oyadi kânga dikambo sɔ hɔtɔnɛ la kɛnɛ kalangaso. Sho mɛnyaka dia tamboyakimɔ la tshondo tshɛ le Nzambi etena kayakimɔso le nde ndo kalongolaso batismu. Oma lâso sho salaka la wolo dia nsɛna lo yoho yɔtɔnganɛ la ndjakimɔ kaso lo lɔsɛnɔ laso l’otondo.
9. a) Etena kaki Yeso la nkɛtɛ, otamba w’asui akawalembetshiyaka? b) Lo woho akɔna wɛmbaso otamba aso w’asui?
9 Dikambo dia hende ele sho pombaka mɛmba otamba aso w’asui. Lo ntambe ka ntondo, otamba w’asui akalembetshiyaka shɔkɔ, diɔnyɔ ndo nyɔi. Mbala efula, paka andjakanyi ato mbakawadiakaka l’otamba w’asui kana mbakawahanɛka alemba awɔ l’otamba. Etena kakandate ɛtɛkɛta ɛsɔ, Yeso akɛnya dia Okristo pombaka ndjalɔngɔsɔla dia mbetawɔ ɛhɛnyɔhɛnyɔ, diɔnyɔ ndo kânga nyɔi, nɛ dia nde kema la lo andja ɔnɛ. (Joani 15:18-20) Atɔndɔ aso w’Akristo totshikitanyaka la andja ɔnɛ, diakɔ diakoka ase andja ɔnɛ ‘tɛkɛta kɔlɔ lo dikambo diaso.’ (1 Petero 4:4) Dikambo sɔ mbeyaka tomba la kalasa, l’ahole aso w’olimu, ndo kânga l’atei wa nkumbo. (Luka 9:23) Koko sho tekɔ suke dia mbikikɛ diɔnyɔ dia lo andja ɔnɛ nɛ dia sho hatoyɔsɛna nto dikambo diaso shoamɛ. Yeso akate ate: “Lam’ayuwunyotenga, lam’ayuwunyusuya, lam’ayuwunyumamanyia wehu tshe w’akambu wa kolo dia dikambu diami, nyeko la [ɔngɛnɔngɛnɔ]. Nyongenengene, nyutamanya ngenangena, ne dia difutu dianyu dieko efula l’ulungu.” (Mateu 5:11, 12) Lo mɛtɛ, mbetawɔma le Nzambi mbele dikambo dioleki ohomba.
10. Kakɔna kalɔmbama dia tetemala ndjela Yeso?
10 Dikambo dia sato ele Yeso akate dia sho pombaka tetemala mboyela. Lo ndjela Diksiɔnɛrɛ dialembetshiya tɔtɛkɛta ta lo dikelemba di’oyoyo (Angɛlɛ) diaki William E. Vine, ndjela onto kɛdikɛdi monga ɔngɛnyi ande, mbuta ate “ɔnɛ latakɛndakɛnda woho akɔ wâmɛ.” 1 Joani 2:6 mbutaka ɔnɛ: “Untu lata ati: Dimi leko [kâmɛ la Nzambi], dieli la ndi dia nkendakenda uku [akakɛndakɛnda Kristo].” Ngande wakakɛndakɛnda Yeso? Yeso komonga kânga la yema ya lokaki tshitshɛ lo ngandji kaki la nde otsha le She lele l’olongo ndo otsha le ambeki ande. Paulo akafunde ate: “Kristu kundjangenyangenya ndame.” (Romo 15:3) Kânga etena kakandakɔmɔka demba kana kakinde la ndjala, Yeso aketshaka ehomba w’anto akina la ntondo ka wakinde hita. (Mako 6:31-34) Yeso akayashaka ndamɛ la wolo tshɛ nto l’olimu w’esambishelo ka Diolelo ndo wa wetshelo. Onde hatohombe mbôkoya etena kakotshaso ɔkɛndɛ aso l’ohetoheto dia ‘mbetɛ anto wa lo wedja tshɛ ambeki ndo mbaetsha dia vɔ sɛdingola wadjango tshɛ wakatodjangɛ Yeso’? (Mateu 28:19, 20) Lo dionga diande di’otondo, Yeso akatotshikɛ ɛnyɛlɔ, ndo sho pombaka “mbuyela lu wanya andi.”—1 Petero 2:21.
11. Lande na kele ekɔ ohomba dia sho ndjâsɛka, mɛmba otamba aso w’asui ndo tetemala ndjela Yeso Kristo?
11 Ekɔ ohomba efula dia sho ndjâsɛka, mɛmba otamba aso w’asui ndo tetemala ndjela ɔnɛ lele Ɛnyɛlɔ kaso. Sala ngasɔ ekɔ okanga wa shikaa wa shidiya lokaki, mbuta ate wekamu wa woke washimba dia kɛnɛmɔla ngandji ka ndjahombia. Lâdiko dia lâsɔ, Yeso akate ate: “Untu tshe lalanga mamela lumu landi, ayulushisha. Keli untu tshe lashisha lumu landi dikambu diami, ayulutana. Naka untu ayukundja andja tshe, la nshisha lumu landi, waho andi lend’ewo? Engo kakona kayengonya untu la lumu landi?”—Mateu 16:25, 26.
Hatokoke kambɛ ewandji ehende
12, 13. a) Dikambo diakɔna diakambola ɔlɔngɔ waki owandji Yeso? b) Dako diakɔna diakasha Yeso ɔlɔngɔ a pami ɔsɔ, ndo lande na?
12 Ngɔndɔ mɔtshi l’ɔkɔngɔ wa Yeso mɛnya ohomba w’ambeki ande ndjâsɛka vɔamɛ, ɔlɔngɔ ɔmɔtshi waki owandji w’ɔngɔnyi akaye le nde ndo akawotɛ ate: “Umbetsha, dikambu di’ololo diakona diayumutsha dia ndjala la lumu la pundju?” Yeso akawotɛ dia nde ‘kitanyiya ɛlɛmbɛ’ ndo nde akôshilɛ ɛlɛmbɛ ɛmɔtshi. Ɔlɔngɔ waki owandji ɔsɔ akawotɛ ate: “Akambu aso tshe mbatumutshaka.” Akɛnamaka dia onto ɔsɔ akataka mɛtɛ ndo akatshe la wolo ande tshɛ dia kitanyiya wadjango wa lo Ɛlɛmbɛ. Diakɔ diakandambola ate: “Dikambu diakona diambutshikala?” Yeso akakadimola ɔlɔngɔ a pami ɔsɔ lo mbosha leeta lɔmɔtshi la lânde ate: “Naka we nangaka ndjala [“kokele”, Dyookaneelo dy’Oyooyo] tshe, utshu, utusundja dieli la ye tshe. Udisha akanga a wula, ku we ayuyala la diango l’ulungu. Kuyi, kuyundjeli.”—Mateu 19:16-21.
13 Yeso akɛnya ɔnɛ, dia ɔlɔngɔ a pami ɔsɔ kambɛ Jehowa l’anima ande tshɛ, nde akahombe tshika dikambo dia woke diakawekolaka yimba lo lɔsɛnɔ lande, mbuta ate ɔngɔnyi ande wa l’emunyi. Ombeki waki Kristo wa mɛtɛ hakoke kambɛ ewandji ehende. Nde hakoke “kambela [Nzambi] la ukundji ulimu.” (Mateu 6:24) Nde pombaka monga la ‘sso di’ɔsɛlɛngɛ’ diosembwe lo akambo wa lo nyuma. (Mateu 6:22) Shisha diangɔ diakinde lo mbisha ase wola ekɔ tshelo ya ndjahombia. Etena kakatɛ Yeso ɔlɔngɔ waki owandji ɔsɔ dia nde kaha diangɔ sɔ dia l’emunyi, nde akawosha diɛsɛ dia lânde dia ndjaombɛ diangɔ l’olongo, mbuta ate diangɔ di’oshinga wolo diakalembetshiyaka lɔsɛnɔ la pondjo le nde ndo kɛsɔ otohomba ndjowosha diaaso dia tolɛ kâmɛ la Kristo l’olongo. Ɔlɔngɔ a pami ɔsɔ komonga suke dia ndjâsɛka. “Ndi akatshu la lunyangu, ne dia ndi aki la diango efula.” (Mateu 19:22) Koko, ambeki akina waki Yeso kosala oko nde.
14. Ngande wakasale amundji anɛi wa nse etena kakawaete Yeso dia mboyela?
14 Ɛnɔnyi ehende la ntondo, Yeso akasha leeta la woho akɔ wâmɛ le amundji anɛi wa nse mbuta ate: Petero, Andɛlɛ, Jakɔba la Joani. Ahende l’atei awɔ waki lo munya ɛtɛi dia munda nse l’etena kɛsɔ, koko ahende akina wakalɔngɔsɔlaka ɛtɛi awɔ. Yeso akawatɛ ate: “Nyundjeli, layunyuhiluya amundji w’antu.” Vɔ akɔ anɛi wakatshike olimu awɔ wa munda nse ko wonya akɔ ndo wakayele Yeso l’edja tshɛ ka nsɛnɔ yawɔ.—Mateu 4:18-22.
15. Ngande wakayahombia Ɔmɛnyi wa Jehowa ɔmɔtshi wa nshi nyɛ dia ndjela Yeso?
15 Akristo efula ɛlɔ kɛnɛ wambokoya ɛnyɛlɔ k’amundji anɛi wa nse asɔ koko aha kaki ɔlɔngɔ waki owandji w’ɔngɔnyi. Vɔ wakatshike ɔngɔnyi ndo waaso wa monga la lɔsɛnɔ la lokumu l’andja ɔnɛ dia kambɛ Jehowa. Deborah mbutaka ate: “Lam’akimi l’ɛnɔnyi 22, dimi lakahombe mbɔsa yɛdikɔ ya woke efula.” Nde nembetshiyaka ate: “Dimi lakeke Bible l’edja ka ngɔndɔ oko shamalo, ndo lakalange kimɔ lɔsɛnɔ lami le Jehowa, koko ase nkumbo kami wakatone la wolo tshɛ. Vɔ wakikɔ l’ɔngɔnyi heyama, ɔnkɔnɛ wakɛnyi dia naka dimi monga Ɔmɛnyi, kete dui sɔ diayowasha sɔnyi. Vɔ wakambisha wenya a tango 24 dia dimi mbɔsa yɛdikɔ yakamalange, mbuta ate sɔna lɔsɛnɔ l’ɔngɔnyi kana akambo wa mɛtɛ. Naka dimi hakakitɔnyi la Ɛmɛnyi wa Jehowa, kete nkumbo kami wayɔsɛka. Jehowa akakimanyiya dia dimi mbɔsa yɛdikɔ ya dimɛna ndo akambisha wolo wa dimi ndjikotsha. Dimi lambetsha ɛnɔnyi 42 wetshi ɛnɛ l’olimu wa lo tena tshɛ, ndo dimi bu la lonyangu ndoko yema. Oko wakamatone ɔngɔnyi wa l’emunyi ndo yoho ya lɔsɛnɔ ya lokaki ya tayangaka ɔngɛnɔngɛnɔ, dimi lakewɔ lɔsɛnɔ l’anyanya ndo laha l’ɔngɛnɔngɛnɔ lɛnami ase nkumbo kami lalɔ. Kâmɛ l’omɛmi, lakakimanyiya anto ndekana lokama dia mbeka akambo wa mɛtɛ. Ana asɔ wa lo nyuma wekɔ oshinga wolo efula le mi oleki ɔngɔnyi wa l’emunyi.” Nunu dikina dia Ɛmɛnyi wa Jehowa wekɔ la tokanyi ta woho akɔ wâmɛ. Kayotota dikambo diayɛ na?
16. Ngande wakokaso mɛnya dia hatoyɔsɛna nto lo dikambo diaso shoamɛ?
16 Nsaki kaha nsɛna lo dikambo diawɔ vɔamɛ kakatshutshuya nunu dia Ɛmɛnyi wa Jehowa dia vɔ kamba olimu w’ombatshi mboka, kana apandjudi wa Diolelo wa lo tena tshɛ. Akina wele bu la diaaso dia kamba olimu wa lo tena tshɛ, wakakɛnɛmɔla yimba y’ombatshi mboka ndo wakasukɛ olimu w’esambishelo ka Diolelo la wolo tshɛ lo ndjela akoka awɔ. Ambutshi kɛnɛmɔlaka yimba ya woho akɔ wâmɛ lam’etshawɔ wenya awɔ efula ndo watshikawɔ wahɔ awɔ hita dia mbetsha anawɔ awui wa lo nyuma. Lo yoho mɔtshi kana kina, onto tshɛ la l’atei aso kokaka mɛnya dia wahɔ wa Diolelo mbele lo dihole dia ntondo lo nsɛnɔ yaso.—Mateu 6:33.
Ngandji kaki na katotshutshuya?
17. Kakɔna katotshutshuya dia sho ndjahombia?
17 Kɛnɛmɔla ngandji ka ndjahombia bu dikambo dia wɔdu. Koko tokanyiya kɛnɛ katotshutshuya dia kikɛnɛmɔla. Paulo akafunde ate: “Ne dia ngandji ka Kristu [atototshutshuyaka], ne dia shu mbetawoka shati: Otoi kakavwela tshe . . . Ndi akavwela tshe, ne dia waku weli la lumu, tawuyalaki la lumu dia dikambu diawo vame, keli dia one lakâvwela, lakulwama dikambu diawo.” (2 Koreto 5:14, 15) Ekɔ ngandji ka Kristo katotshutshuya diaha sho tetemala la nsɛna lo dikambo diaso shoamɛ. Ɔsɔ ekɔ mɛtɛ dikambo dia wolo diatotshutshuya! Lam’ele Kristo akavu dikambo diaso, onde hatoyaoke dia sho lawɔ pombaka nsɛna dikambo diande? Mɛtɛ, lowando lele laso lo ngandji ka woke kakatɛnya Nzambi nde la Kristo totshutshuyaka dia kimɔ nsɛnɔ yaso le Nzambi lo koma ambeki wa Kristo.—Joani 3:16; 1 Joani 4:10, 11.
18. Lande na kele yimba ya ndjahombia ekɔ ohomba efula?
18 Onde ekɔ ohomba diaha sho nsɛna nto lo dikambo diaso shoamɛ? L’ɔkɔngɔ wa ɔlɔngɔ waki owandji w’ɔngɔnyi tona leeta laki Kristo ko nde ntshɔ, Petero akatɛ Yeso ate: “Enda, shu tambutshika diango tshe, tambukuyela. Kayutukundja na?” (Mateu 19:27) Petero nde la apɔstɔlɔ akina mɛtɛ wakayasɛkɛ vɔamɛ. Kakɔna kakahombe monga difuto diawɔ na? Yeso akatɛkɛta ntondo dia diɛsɛ diakahombe monga lawɔ dia tolɛ kâmɛ la nde l’olongo. (Mateu 19:28) Lo diaaso diakɔ diamɛ, Yeso akohɔ ɛtshɔkɔ wele ombeki ande tshɛ akahombe nongola. Nde akate ate: “Nduku untu layutshika luudu, anangu, akadiyendi, nyangu, shi, ana kana [di]kambo dikambu diami ndu ne dia lukumu l’ololo, lahulungula kakiane l’etena kene: . . . tena lukama, kame l’asui; ku l’etena kayayi, lumu la pundju.” (Mako 10:29, 30) Sho nongolaka diangɔ efula oleki ndo nɛ diakatashisha. Onde ambutshi aso, anyangɛso, anangɛso, akadiyɛso, ndo anaso wa lo nyuma bu la nɛmɔ dioleki ndo diangɔ tshɛ diakatashisha l’ɔtɛ wa wahɔ wa Diolelo? Akɔna akalongola difuto dioleki lo lɔsɛnɔ, onde Petero kana ɔlɔngɔ waki owandji w’ɔngɔnyi?
19. a) Oma lende aya ɔngɛnɔngɛnɔ wa mɛtɛ? b) Kakɔna kayotɔsɛdingola lo sawo diayela?
19 Oma l’ɛtɛkɛta ndo l’etsha ande, Yeso akɛnya dia ɔngɛnɔngɛnɔ ndjaka oma lo mbisha ndo kambɛ anto akina koko aha oma lo lokaki. (Mateu 20:28; Etsha 20:35) Etena kasɛnaso aha lo dikambo diaso shoamɛ koko katetemalaso ndjela Kristo, sho kondjaka ɔngɛnɔngɛnɔ w’efula lo nsɛnɔ yaso kakianɛ ndo tekɔ l’elongamelo ka lɔsɛnɔ la pondjo lo nshi yayaye. Diakɔ diele, etena kayasɛkaso shoamɛ, sho mongaka Anto waki Jehowa. Sho komaka ɛhɔmbɔ wa Nzambi. Lande na kele lɔhɔmbɔ lɔsɔ la difuto na? Ngande wele dikambo sɔ la shɛngiya lo tɛdikɔ tɔsaso lo lɔsɛnɔ? Sawo diayela diayokadimola ambola asɔ.
Onde wɛ akohɔ?
• Lande na kahombaso ndɔshana la nsaki yaso ya lokaki?
• Kakɔna kalembetshiya ndjâsɛka, mɛmba otamba aso w’asui, ndo tetemala ndjela Yeso?
• Kakɔna katotshutshuya diaha nsɛna nto lo dikambo diaso shoamɛ?
• Lande na kele nsɛna lɔsɛnɔ la ndjahombia ekɔ ohomba efula?
[Osato wa lo lɛkɛ 9]
‘Yasalɛ ɔlɔlɔ, Nkumadiɔndjɔ’
[Esato wa lo lɛkɛ 11]
Ngandji tshutshuyaka Ɛmɛnyi wa Jehowa dia vɔ sambisha oko apandjudi wa Diolelo wele la ohetoheto