Ekadimwelo lo ambola anyu

◼ Onde ekɔ dimɛna nɔngɔsɔla dikambo dimɔtshi diakeketsha anto dia kɔngɔla falanga dia kimanyiya etshumanelo?

Tena efula, ekongamelo w’ɛtɛmwɛlɔ nɔngɔsɔlaka akambo amɔ dia anto kimɔka ɛkɔngɔ, ɛnyɛlɔ oko: dambo, osondjelo wa diangɔ, kana fɛtɛ. Kânga mbakoka anto amɔ fɔnya dia tshelo shɔ yekɔ l’oyango wa dimɛna, awui asɔ koka ndjonga oko yoho mɔtshi ya djɔmbɔ. Ɛmɛnyi wa Jehowa hawoyange ekimanyielo ka falanga lo yoho shɔ.

Numɛlɔ ka hende ka Tshoto y’Etangelo, ya Ngɔndɔ k’enanɛi 1879, mbutaka lo kɛnɛ kendana la woho watonaso dia mbokoya ase ɛtɛmwɛlɔ wa l’andja ɔnɛ ndo nɔmba falanga ɔnɛ: “Tekɔ la mbetawɔ dia JEHOWA mbasukɛ otombelo wa ‘Tshoto y’Etangelo ya Siɔna.’ Ndo edja tshɛ kayodiongaka ngasɔ, yɔ halɔmbaki kana hasɛngasɛngaki anto pondjo dia kondja ekimanyielo. Etena kayohekɔ Ɔnɛ lata ate: ‘Fɛsa la paunyi ya l’akona yekɔ yami’ mbisha falanga yahombama, tayoshihodia dia etena kambokoka ka tshika ndjitondja.”

Sho tetemalaka ndjela tɔndɔ dia lo Afundelo diata ɔnɛ: “Untu l’untu akimo uku akandati l’utema andi, aha la lonyangu, aha la khudu, ne dia [Nzambi] nangaka untu latukimoka l’ongenongeno.” (2 Kor. 9:⁠7) Tɔshɛtɛshɛtɛ ta weshasha tekɔ lo Mbalasa ya Diolelo dia anto mbidjaka weshasha naka onto alanga. (2 Khum. 12:⁠9) Weshasha hawɔlɔmbama lɔlɔmba, kana kimɔma l’oyango wa ndjokondja ɛngɔ kɛmɔtshi.