Akatshi wa leeta wa Eohwelo wayokahanyema l’andja w’otondo!
1. Naa okahanyelo wa lânde wayosalema l’andja w’otondo la ntondo ka Eohwelo?
1 “Kanyutshaki okone, dia mbuho[ka]mi.” (Luka 22:19) Dia nkitanyiya didjango diaki Yeso sɔ, atɛmɔdi waki Jehowa wayosangana kâmɛ la angɛnyi wa lo mɛtɛ Ngɔndɔ ka sato 30, 2010, dia mbohɔ nyɔi ka Yeso. Akatshi wa leeta wa lânde wendana la Eohwelo wayokahanyema l’andja w’otondo ntatɛ Ngɔndɔ ka sato 13 polo Ngɔndɔ ka sato 30.
2. Ngande wakokaso mbisha anto akatshi wa leeta?
2 Woho wa mbisha anto akatshi wa leeta: Wɛ kokaka ntshuma ompokami dikatshi dia leeta lo mbɛnya osato wa lâdiko ko oma lâsɔ wɛ mbotɛ ɔnɛ: “La dikɔlɔ dia ngɔndɔ ka sato 30, miliyɔ y’anto wa l’andja w’otondo wayosangana dia mbohɔ nyɔi ka Yeso. Lamboya ndjokosha wɛ la nkumbo kayɛ akatshi anyu wa leeta dia nyu ndjosangana kâmɛ la so. Ndo angɛnyi ayɛ kokaka ndja. L’etshumanelo kaso, Eohwelo kɛsɔ kayosalema lo dihole ndo wonya ɔnɛ.” Lo ndjela diaaso diele la ompokami, wɛ mbeyaka mɛna ɔlɔlɔ mbadia Luka 22:19 dia mbɛnya didjango di’oma l’Afundelo. Koko, ohɔ dia lam’ele sho bu la nshi efula ya nkindjakindja ɛtshi kaso ka nkɛtɛ, ayoleka dimɛna wɛ ntɛkɛta lo tshena pe.
3. Anto akɔna wakokaso mbelɛ lo Eohwelo?
3 Naka etshumanelo kanyu kekɔ la ɛtshi ka nkɛtɛ ka woke, kete dikumanyi mbeyaka nyɔlɔmba dia nyu ntshika akatshi wa leeta lo mvudu yele anto bu lawɔ lo wendelo anyu wa ntondo. Naka kokaka, nyosha anto periodikɛ kâmɛ la akatshi wa leeta. Nyoyashikikɛ dia mbelɛ anto watonyembolaka, ambeki wa Bible, asekanyu wa l’olimu, wa la kalasa, ewotɔ, asukanyi ndo anto akina weyanyu.
4. Lowando lele la so lo yɛdikɔ yoludi la ngandji yakɔshi Jehowa yendana la tshungo layototshutshuya dia nsala dikambo diakɔna?
4 Toyalɔngɔsɔlɛ dia ndeka ndjasha efula l’okahanyelo: Nshi ya Eohwelo yekɔ diaaso dia dimɛna efula dia sho mfudia olimu aso w’esambishelo. Onde wɛ kokaka ntshikitanya ekongelo kayɛ dia monga ombatshi mboka wa tshanda? Onde wɛ ekɔ la ana kana ambeki wa Bible watahame dimɛna lo nyuma? Naka ngasɔ, kete tɛ dikumanyi dia vɔ menda kana vɔ wambokotsha kɛnɛ kalɔmbama dia vɔ mbisha lonya l’okahanyelo wa lânde ɔsɔ oko apandjudi wahatabatizama. Lowando lele la so lo yɛdikɔ yoludi la ngandji yakɔshi Jehowa yendana la tshungo layototshutshuya aha tsho dia monga lo Eohwelo, koko ndo dia mbelɛ anto efula dia ndjonga kâmɛ la so lo losanganya lɔsɔ.—Joa. 3:16.