Olimu woleki ohomba
1. Lowando l’efula lele la so lo dikambo di’olimu w’esambishelo totshutshuya dia nsala na?
1 Lande na kakeketshamaso mbala la mbala dia nkamba la wenya aso, wolo aso, ndo la diangɔ diaso l’olimu w’esambishelo? Nɛ dia ndoko olimu woleki olimu ɔsɔ ohomba! Naka sho nkana yimba lo etombelo wele la olimu ɔsɔ, kete dui sɔ diayofudia mposa kaso ka ndjasha l’olimu ɔsɔ wahakambemaki nto pondjo.—Etsha 20:24.
2. Ngande watombola olimu aso w’esambishelo lokombo loleki woke laki Jehowa?
2 Olimu w’esambishelo tombolaka lokombo laki Jehowa: Olimu w’esambishelo mbikaka epole ɔsɛkɛ dia Diolelo diaki Jehowa diayɔlɔmbwama oma le Kristo Yeso diayɔhɛna mandji y’ana w’anto ndo diayokandola ekakatanu tshɛ wele l’anto. (Mat. 6:9, 10) Jehowa ekɔ lo tombwama nɛ dia nde oto mbele l’akoka wa totshungola oma lo hemɔ ndo oma lo nyɔi. (Is. 25:8; 33:24) Lam’ele tekɔ lo tɛmbɛ lokombo lande, anto akina wɛna dionga diaso di’ɔlɔlɔ ndo ohetoheto aso mbeyaka mbôtombola. (1 Pet. 2:12) Ande ɔngɛnɔngɛnɔ wele la so dia mbeyanya lokombo laki Jehowa, Nkum’Olongo l’andja w’otondo lee!—Osam. 83:18.
3. Ɛtshɔkɔ akɔna wayokondja wanɛ wetawɔ losango la Diolelo?
3 Olimu w’esambishelo shimbɛka nsɛnɔ: Jehowa “halangi nduku omotshi nshisho, keli ndi nangaka tshe wakadimuli etema.” (2 Pet. 3:9) Koko naka onto ɔmɔtshi hawaetshisha, ngande wayeya anto ɔnɛ lɔkɛwɔ lɔnɛ lekɔ mindo kana pudipudi lo washo waki Jehowa? (Jona 4:11; Romo 10:13-15) Etena ketawɔ anto lokumu l’ɔlɔlɔ, vɔ ndowanyaka nsɛnɔ yawɔ lo ntshika ditshelo dia kɔlɔ. (Mika 4:1-4) Ndo nto, vɔ kondjaka elongamelo k’ɔngɛnɔngɛnɔ ka lɔsɛnɔ la pondjo. Olimu aso w’esambishelo ndo wa wetshelo wayotoshimbɛ ndo wayoshimbɛ wanɛ watohokamɛ. (1 Tim. 4:16) Ande ɔkɛndɛ wa nɛmɔ wele la so l’olimu woleki ohomba ɔsɔ lee!
4. Lande na kahombaso ndjasha tshɛ l’olimu w’esambishelo ka Diolelo ndo wa mbetɛ anto ambeki?
4 Kem’edja, fɔnu ka woke kayanga komiya andja ɔnɛ wa kɔlɔ la shashimoya. Wanɛ weta lo wedi wa Jehowa wayoka. Ɔnkɔnɛ, olimu w’esambishelo ndo wa mbetɛ anto ambeki wakambema ɛlɔ kɛnɛ mbele olimu woleki ohomba ndo wahomba kambema la shamanya. Nyɛsɔ tetsha olimu akɔ lo dihole dia ntondo lo nsɛnɔ yaso!—Mat. 6:33.