Totetemale monga l’ohetoheto l’esambishelo
1 Ɔnɔnyi tshɛ tatɛ lo 1992, Ɛmɛnyi wa Jehowa mbetshaka wenya olekanyi miliyara ɔtɔi lo olimu wa esambishelo ka Diolelo ndo wa mbetɛ anto ambeki lo andja w’otondo. Ande ɔngɛnɔngɛnɔ wele laso lo woho wakatasha lonya lo yɛdikɔ mɔtshi lo olimu wa diambo efula wakasalema ɔsɔ lee!—Mat. 28:19, 20.
2 Lo mɛtɛ, Jehowa latosukɛ ndo latosha kɛnɛ tshɛ kele laso ohomba l’esambishelo kaso ka lo ‘nshi nyɛ ya pâ’ mbashaso losaka ndo lotombo. (2 Tim. 3:1) Kakɔna kahombaso sala naka sho nangaka tetemala ndjasha l’ohetoheto l’olimu w’ohomba efula ɔsɔ?
3 Kɛnɛ katotshutshuya dia monga l’ohetoheto: Ngandji k’efula kokaso Nzambi ndo wonyaso onto kâmɛ ndo nsaki k’oma k’ɛse otema ka nsɛna lo ndjela ndjakimɔ kaso totshutshuyaka l’olimu aso wa Diolelo. (Mat. 22:37-39; 1 Joa. 5:3) Ngandji totshutshuyaka dia sho ndjahombia dia ndeka mbisha lonya l’olimu w’esambishelo.—Luka 9:23.
4 Todje welo dia tetemala monga l’ohetoheto: Otunyi aso Diabolo mbidjaka welo efula dia kitshakitsha ohetoheto aso l’olimu w’esambishelo. Wendjodi wele la anto wa lo ɛtshi kaso ka nkɛtɛ, awui wekola yimba wa lo andja ɔnɛ, ekakatanu wa kotsha ehomba wa lo lɔsɛnɔ wa lushi la lushi ndo ndjakiyanya amboleka lo hemɔ yele laso ekɔ akambo amɔtshi angana wakamba la nde dia tɔkɔmɔla.
5 Koko, sho pombaka mbidja welo dia tetemala monga l’ohetoheto. Ekɔ ohomba efula dia sho monga la “ngandji [kaso] ka ntundu.” Dui sɔ nɔmbaka dia sho mbadiaka ndo kanaka yimba mbala la mbala lo Bible, Ɔtɛkɛta wa Nzambi ndo kambaka la tɛdikɔ tshɛ ta lo nyuma tatosha Jehowa lo tshimbo ya ‘ɔhɔmbɔ wa kɔlamelo ndo wa kɛsɔ.’—Eny. 2:4; Mat. 24:45; Osam. 119:97.
6 Oko wadiɛnya prɔfɛsiya ya lo Bible dimɛna dimɛna, lushi laki Jehowa l’elanyelo k’anto wa kɔlɔ lekɔ lo ndjasukana esadi esadi. (2 Pet. 2:3; 3:10) La dui sɔ lo yimba, nyɛsɔ tosale la wolo dia tetemala monga l’ohetoheto l’esambishelo, lo ndeka mbisha lonya l’olimu w’esambishelo ka Diolelo ndo wa mbetɛ anto ambeki wasalema kakianɛ lo andja w’otondo!