Tetawoya anto etena ketshaso
1. Nkamba dimɛna l’Ɔtɛkɛta waki Nzambi l’esambishelo kɛdikɛdi na?
1 L’ɛnyɛlɔ ka ɔpɔstɔlɔ Paulo, ekambi wa tomanamana waki Nzambi mbeyaka dia ‘nkamba dimɛna l’ɔtɛkɛta w’akambo wa mɛtɛ’ hendana tsho la nshila avɛsa oma l’Afundelo w’Ekila. (2 Tim. 2:15) Etena kakambaso l’Ɔtɛkɛta waki Nzambi, ngande wakokaso ‘mbetawoya’ anto etena ketshaso?—Etsha 28:23.
2. Ngande wakokaso nkimanyiya anto dia vɔ mfudia dilɛmiɛlɔ diele la wɔ l’Ɔtɛkɛta waki Nzambi?
2 Tɛnya ampokami aso kɛnɛ kata Ɔtɛkɛta waki Nzambi: Dui dia ntondo ele, sho pombaka nkotola yambalo y’ampokami aso oya lo Bible dia vɔ monga la dilɛmiɛlɔ lo lomba laki Nzambi lele lɔkɔ. Naka sho ndjaɛkɛ l’Ɔtɛkɛta waki Nzambi, kete dui sɔ kokaka ntshutshuya ampokami aso dia vɔ ndjela wadielo wa divɛsa dimɔtshi la yambalo y’efula. (Heb. 4:12) Sho kokaka mbatɛ ɔnɛ: “Lakɛnyi dimɛna dia sho mbeya kanyi yaki Nzambi lo dikambo nɛ. Nyende kɛnɛ kata Ɔtɛkɛta ande.” Naka kokaka, tɛnya ampokami aso kɛnɛ kata Ɔtɛkɛta waki Nzambi lo mbadia divɛsa oma lɔkɔ.
3. Kakɔna kakokaso nsala l’ɔkɔngɔ wa mbadia divɛsa dia nkimanyiya ampokami aso dia vɔ nshihodia kitshimudi yadiɔ?
3 Dui dia hende ele, tolembetshiya divɛsa diadishaso. Anto efula mongaka l’okakatanu dia nshihodia divɛsa mbala ka ntondo kademadiɔ. Mbala efula, sho pombaka mɛnya woho wɔtɔnɛ divɛsa la ɔtɛ a dui wakɛtshanyaso. (Luka 24:26, 27) Tokotole yambalo y’ampokami aso oya lo tɔtɛkɛta ta lo divɛsa tasukɛ dui diasawolaso. Mbaoka dimbola ayotokimanyiya dia sho mbeya dia kana vɔ wamboshihodia divɛsa diakɔ dimɛna.—Tuk. 20:5; Etsha 8:30.
4. Nna diakɔna di’ekomelo diele ohomba dia mbetawoya anto etena ketshaso?
4 Tokane l’ampokami aso yimba oma l’Afundelo: Dui dia sato ele, tosale la wolo dia munanda yimba ndo otema w’ampokami aso. Tâkimanyiya dia vɔ mɛna woho wendanawɔ la divɛsa diakɔ l’onto ndo l’onto. Nkana l’anto yimba oma l’Afundelo kokaka mbakimanyiya dia vɔ ntshikitanya tokanyi tawɔ. (Etsha 17:2-4; 19:8) Ɛnyɛlɔ, l’ɔkɔngɔ wa mbadiɛ anto amɔtshi Osambu 83:18, sho koka nkana la wɔ yimba lo woho wele mbeya lokombo l’onto ekɔ nna di’ohomba efula dia mbɔtɔ lɔngɛnyi. Oma lâsɔ, sho kokaka mbambola ɔnɛ: “Onde nyu fɔnyaka dia mbeya lokombo laki Nzambi ayokimanyiya dia alɔmbɛlɔ anyu mbetawɔma?” Mbɔtɔnganyiya divɛsa la nsɛnɔ y’ampokami aso lo yoho shɔ mɛnyaka nɛmɔ diele la diɔ. Wetshelo wa ngasɔ wetawoya onto w’oma l’Ɔtɛkɛta waki Nzambi kotolaka anto wele la etema w’ɛlɔlɔ dia vɔ ntɛmɔla Jehowa Nzambi ka mɛtɛ kasɛna.—Jer. 10:10.