Tokambe la “yombo ya nyuma” dimɛna
“Nyose . . . yombo ya nyuma, yako yeli diui dia [Nzambi].”—EF. 6:17.
1, 2. Ahombaso nsala lam’ele tekɔ l’ohomba w’apandjudi efula wa Diolelo?
ETENA kakandɛnyi ehomba wa lo nyuma waki la elui w’anto, Yeso akatɛ ambeki ande ate: “Diango dia dinela dieko efula, keli ekambi mbeli tshitshe. Okone nyolombe Khumadiondjo, kanga dinela, keli ndi atumi ekambi lu dinela diandi.” Yeso kokomɛ tsho lo mbuta ɛtɛkɛta ɛsɔ. L’ɔkɔngɔ wa nde mbuta ɛtɛkɛta ɛsɔ, “Jesu aketi ambeki andi dikumi la ahendi” ndo akâtome l’olimu w’esambishelo ndo wa ‘dinela.’ (Mat. 9:35-38; 10:1, 5) L’ɔkɔngɔ diko, Yeso “akasonola akina akumi esambeli, akâtumi ahendi ahendi” dia nkamba olimu akɔ wâmɛ.—Luka 10:1, 2.
2 Ndo ɛlɔ kɛnɛ, tekɔ l’ohomba wa mamba w’apandjudi efula wa Diolelo. L’ɔnɔnyi w’olimu wa 2009, anto 18 168 323 mbakɔtɔ lo Eohwelo l’andja w’otondo. Lofulo lɔsɔ ndeka lofulo l’Ɛmɛnyi wa Jehowa tshɛtshɛ ndekana miliyɔ 10. Dikambɔ mɛtɛ diambɛla dia muna. (Joa. 4:34, 35) Ɔnkɔnɛ, sho pombaka nɔmba dia nkondja ekambi efula. Ko ngande wakokaso nsala akambo lo yoho yɔtɔnɛ la kɛnɛ kalɔmbaso kɛsɔ na? Sho kokaka nsala dikambo sɔ lo nkoma ekambi wa tomanamana etena kayashaso la ohetoheto tshɛ l’olimu w’esambishelo ka Diolelo ndo wa mbetɛ anto ambeki.—Mat. 28:19, 20; Mako 13:10.
3. Ngande watokimanyiya nyuma kaki Nzambi dia sho nkoma ekambi wa tomanamana?
3 Sawo dia mbala ketshi diakɛnya dia nɔmbwama la nyuma kaki Nzambi mbatokimanyiya dia ‘nsambisha Ɔtɛkɛta wa Nzambi la dihonga.’ (Etsha 4:31) Nyuma kɛsɔ kokaka tokimanyiya nto dia sho nkoma ekambi wa tomanamana. Yoho mɔtshi yakokaso nyomoleka nkondja etombelo w’ɛlɔlɔ l’esambishelo ele, nkamba dimɛna la ehomɔ koleki ɔlɔlɔ kakatosha Jehowa Nzambi, mbuta ate Bible, Ɔtɛkɛta ande wakafundama. Tɔ kakafundama lo wolo wa nyuma k’ekila. (2 Tim. 3:16) Losango lele lɔkɔ lakasambiyama oma le Nzambi. Ɔnkɔnɛ, etena kakambaso dimɛna la Bible dia nsukɛ wetshelo aso, sho nɔmbɔmaka la nyuma k’ekila. La ntondo ka sho mɛna woho wakokaso nsala dui sɔ, nyɛsɔ tokane yimba lo wolo wele l’Ɔtɛkɛta ɔsɔ.
‘Ɔtɛkɛta wa Nzambi wekɔ la wolo’
4. Losango la lo Bible kokaka mbela otshikitanu akɔna lo lɔsɛnɔ l’onto?
4 Losango kana Ɔtɛkɛta wa Nzambi wekɔ mɛtɛ la wolo! (Heb. 4:12) Lo yoho ya didjidji, losango la lo Bible lekɔ la mpɛmɔ koleki yɔɔmbɔ tshɛ yakasale onto nɛ dia lo yoho ya didjidji, lɔ nyɔngɔmɛka polo lo lɔ nkakitola weka la ehihɔ awɔ. Akambo wa mɛtɛ wa l’Afundelo munandaka lonto l’onto la l’etei k’otema ndo tokanyi tande lo ntondja sɛkɛ lonto lande la mɛtɛ la l’etei k’otema. Akambo wa mɛtɛ asɔ kokaka monga la shɛngiya le onto ndo ntshikitanya mɛtɛ lonto lande. (Adia Kolosai 3:10.) Eelo, Ɔtɛkɛta wa Nzambi kokaka ntshikitanya nsɛnɔ!
5. Lo toho takɔna takoka Bible tɔlɔmbɔla, ndo etombelo akɔna wakoka monga la dui sɔ?
5 Ndo nto, Bible ekɔ dibuku diele la lomba lahakoke ntanema kânga lo dihole ɔtɔi. Tɔ kekɔ la awui w’ohomba wakoka mɛnya anto woho wakokawɔ nsɛna l’andja ɔnɛ woludi la ekakatanu. Ɔtɛkɛta wa Nzambi hawotongamulɛ osase tsho l’ekolo aso, koko ndo lo mboka kele la ntondo kaso. (Osam. 119:105) Vɔ wekɔ ekimanyielo ka woke le so etena kahomanaso la ekakatanu kana kɔsaso tɛdikɔ tendana la ɔsɔnwɛlɔ w’angɛnyi, tɔkɛnyɔ, olimu, ɔlɔtɔ ndo awui akina. (Osam. 37:25; Tuk. 13:20; Joa. 15:14; 1 Tim. 2:9) Nkamba la atɔndɔ wele l’Ɔtɛkɛta wa Nzambi tokimanyiyaka dia sho mbidjasɛ l’anto akina dimɛna. (Mat. 7:12; Fil. 2:3, 4) Etena ketawɔso dia Ɔtɛkɛta wa Nzambi tongamulɛ osase lo mboka kele la ntondo kaso, sho mongaka la akoka wa mɛna etombelo wakoka monga la tɛdikɔ tɔsaso lo nshi yayaye. (1 Tim. 6:9) Afundelo tewoyaka nto sangwelo diaki Nzambi diendana la nshi yayaye dia tokimanyiya dia sho nsɛna lo yoho yɔtɔnɛ la sangwelo diakɔ. (Mat. 6:33; 1 Joa. 2:17, 18) Onto kokaka mɛtɛ monga la lɔsɛnɔ lele la oyango naka nde mbetawɔ nɔmbwama la atɔndɔ waki Nzambi!
6. Lo yoho yakɔna yele Bible ehomɔ ka wolo lo ta dialɔso lo nyuma?
6 Tokanyiya nto woho wele Bible ekɔ ehomɔ ka wolo lo ta dialɔso lo nyuma. Paulo akelɛ Ɔtɛkɛta wa Nzambi ɔnɛ: “Yombo ya nyuma.” (Adia Efeso 6:12, 17.) Losango la lo Bible kokaka ntshungola anto oma lo lɔhɔmbɔ laki Satana naka sho liewoya dimɛna. Lɔ lekɔ yɔɔmbɔ yakokɛ nsɛnɔ y’anto lo dihole dia ndjilanya. Shi sho pombaka nkamba la yɔɔmbɔ shɔ dimɛna?
Tokambe la wɔ dimɛna
7. Lande na kele ekɔ ohomba dia sho mbeka dia kamba la “yombo ya nyuma” dimɛna?
7 Ɔsɔlayi kokaka nkamba dimɛna la dihomɔ diande dia ta naka nde akatadihembi ndo akeke woho wa nkamba la diɔ dimɛna. Ngasɔ mbediɔ ndo lo kɛnɛ kendana l’okambelo wa la “yombo ya nyuma” lo ta dialɔso lo nyuma. Paulo akafunde ate: ‘Sala tshɛ dia wɛ mbetawɔma le Nzambi oko okambi waha la dikambo dia mbotshama sɔnyi ndo walembetshiya ɔtɛkɛta w’akambo wa mɛtɛ dimɛna.’—2 Tim. 2:15.
8, 9. Kakɔna kayotokimanyiya dia sho nshihodia kɛnɛ kata Bible? Sha ɛnyɛlɔ.
8 Kakɔna kayotokimanyiya dia ‘nembetshiya ɔtɛkɛta w’akambo wa mɛtɛ dimɛna’ l’olimu aso w’esambishelo? La ntondo ka sho monga la akoka wa nembetshiya anto akina kɛnɛ kata Bible, sho pombaka takishihodisha dimɛna shoamɛ. Kɛsɔ tɔlɔmbaka dia mbidja yimba lo avɛsa wodingi divɛsa diasɛdingolaso.
9 Dia sho nshihodia divɛsa dimɔtshi dimɛna, sho pombaka nsɛdingola avɛsa wodingi divɛsa diakɔ. Ɛtɛkɛta waki Paulo watanaso lo Ngalatiya 5:13 mɛnyaka ohomba wa dikambo sɔ. Nde akafunde ate: “Anyasu, nyu nyaketama dia ndjala [la lotshungɔ], dikambu otoi, [lotshungɔ l]anyu tayalaki dia akambu wa dimba, keli nyukambaneli la ngandji.” Naa lotshungɔ lakatɛkɛtaka Paulo lanɛ? Onde nde akatɛkɛtaka dia lotshungɔ l’oma lo pɛkato la nyɔi, l’oma lo wetshelo wa kashi, ko kana lotshungɔ l’oma lo ɛngɔ kekina? Avɛsa wodingi divɛsa nɛ mɛnyaka dia Paulo akatɛkɛtaka dia lotshungɔ laya oma lo woho ‘wambototshungɔ oma lo mananu k’Ɛlɛmbɛ.’ (Ngal. 3:13, 19-24; 4:1-5) Nde akatɛkɛtaka dia lotshungɔ l’Okristo. Wanɛ wakangɛnangɛnaka lotshungɔ lɔsɔ wakakambanɛka la ngandji. Wanɛ waki komonga la ngandji wakahomoyanaka ndo wakalɛnaka lam’asawɔ.—Ngal. 5:15.
10. Dia sho nshihodia kitshimudi y’Afundelo dimɛna, awui akɔna wahombaso nsɛdingola, ndo ngande wakokaso mbeya awui akɔ?
10 Dia nshihodia kitshimudi ya divɛsa dimɔtshi dimɛna, sho pombaka nsɛdingola akambo wendana la onto lakafunde dibuku dia lo Bible diakɔ, etena kakandadifunde ndo l’atei w’akambo akɔna wakandadifunde. Ekɔ nto ohomba dia sho mbeya oyango wakafundama dibuku diakɔ ndo naka kokaka, teye nto mbekelo yaki la anto, lɔkɛwɔ lawɔ, ndo yoho y’ɔtɛmwɛlɔ yakawatɛmɔlaka.a
11. Yewo yakɔna yahomba monga la so etena kalembetshiyaso avɛsa?
11 ‘Nembetshiya ɔtɛkɛta w’akambo wa mɛtɛ dimɛna’ halembetshiya tsho nembetshiya akambo wa mɛtɛ wa l’Afundelo dimɛna. Sho pombaka monga la yewo diaha nkamba la Bible dia mbotsha anto wɔma. Kânga mbele sho kokaka nkamba l’Afundelo dia mamɛ akambo wa mɛtɛ, oko wakasale Yeso etena kakandahembama oma le Diabolo, Bible kema lofimbɔ lahombaso nkamba la lɔ dia mbotsha ampokami aso wɔma. (Euh. 6:16; 8:3; 10:20; Mat. 4:4, 7, 10) Sho pombaka nkitanyiya dako diaki ɔpɔstɔlɔ Petero diata ɔnɛ: “Nyukidia Kristu uku Khumadiondjo lu etema anyu. Nyutayalongosodi dia nyu mbeya lama nkaluya diui le untu tshe lanyumbula, dia elungamelu keli l’etema anyu. Keli nyutshi okone la memakana [ndo la dilɛmiɛlɔ di’efula].”—1 Pet. 3:15.
12, 13. Naa ‘diangɔ diakonɛma wolo’ diakoka Ɔtɛkɛta wa Nzambi monula? Sha ɛnyɛlɔ.
12 Etombelo akɔna wakoka monga la Ɔtɛkɛta wa Nzambi w’akambo wa mɛtɛ naka sho nkamba la wɔ dimɛna? (Adia 2 Koreto 10:4, 5.) Akambo wa mɛtɛ wa l’Afundelo kokaka monula ‘diangɔ diakonɛma wolo,’ mbuta ate ntondja wetshelo wa kashi, ditshelo dia kɔlɔ ndo filozofi yakɛnɛmɔla lomba l’anto wele kema kokele sɛkɛ. Sho kokaka nkamba la Bible dia minya tokanyi ‘talɔshana la ewo ka Nzambi’ oma lo timba t’anto. Sho kokaka nkamba la Bible dia nkimanyiya anto akina dia vɔ mbɔtɔnganyiya tokanyi tawɔ la akambo wa mɛtɛ.
13 Tɔshi ɛnyɛlɔ ka womoto ɔmɔtshi lele l’ɛnɔnyi 93 lasɛna lo wodja wa Inde. Oma ko dikɛnda diande, wakawetsha wetshelo w’ɔnɛ onto sangɔsangɔka. Etena kakandatatɛ mbeka Bible kâmɛ la ɔnande laki lo wodja okina lo tshimbo ya mikanda, nde aketawɔ aha la tshimbatshimba awui wakandekaka lo kɛnɛ kendana la Jehowa ndo asangwelo ande. Koko, wetshelo w’ɔnɛ onto sangɔsangɔka wakakakatɛ lo yimba yande woho ɔnɛ wele nde kombetawɔ kɛnɛ kakofundɛ ɔnande lo dikambo dia eongelo ka wanɛ wavɔ. Nde akate ate: “Dimi halashihodia mɛtɛ ka avɛsa ayɛ. Ɛtɛmwɛlɔ tshɛ mbetshaka dia ekɔ ɛngɔ kɛmɔtshi kele lo demba diaso kahavu. Dimi loketawɔka nshi tshɛ dia demba mvɔka ndo ɔnɛ etenyi kɛmɔtshi ka demba kahɛnama sangɔka lo alemba akina mbala ko mbala ndo dui sɔ kokaka salema mbala kânga 8 400 000. Ngande wakokaso mbuta dia dui sɔ bu mɛtɛ? Onde efula k’ɛtɛmwɛlɔ wetsha dikambo sɔ kashi mbatawɔ?” Onde “yombo ya nyuma” kokaka monula dietawɔ diamboshikimala wolo ngasɔ? L’ɔkɔngɔ wa vɔ nkɛtshanya awui akina w’oma l’Afundelo lo dikambo sɔ, nde akayofunda mingu mɔtshi l’ɔkɔngɔ ate: “Lambotatɛ nshihodia kakianɛ kɛnɛ kele mɛtɛ lo dikambo dia nyɔi. Dui sɔ diambombisha ɔngɛnɔngɛnɔ w’efula dia dimi mbeya dia lam’ayonga eolwelo, tayoyɛnana la wakiso wa ngandji wakavu. Lekɔ lo nkombola dia Diolelo diaki Nzambi ndja esadi.”
Tokambe la wɔ dia mbetawoya anto
14. Mbetawoya ampokami aso kɛdikɛdi na?
14 Nkamba dimɛna la Bible l’esambishelo halembetshiya tsho nshila awui w’oma lo avɛsa. Paulo akeyaka ‘mbetawoya anto,’ ndo sho pombaka nsala oko nde. (Adia Etsha 19:8, 9; 28:23.) “Mbetawoya” kɛdikɛdi “nɛndja.” Onto lambetawoyama “mongaka la eshikikelo k’efula woho ɔnɛ wele nde mongaka la wɛkamu lo dikambo diambondetawɔ.” Etena ketawoyaso onto wetshelo ɔmɔtshi w’oma lo Bible, sho mbokonyaka dia nde nkitsha wɛkamu ande lo wetshelo akɔ. Dia nsala dikambo sɔ, sho pombaka mbetawoya ompokami aso mɛtɛ ka kɛnɛ kawotɛso. Sho kokaka nsala dikambo sɔ lo toho tɛnyami l’edingɔ wayela ɛnɛ.
15. Ngande wakokayɛ nkotola yambalo y’onto lo Bible lo yoho yayokonya onto akɔ dia kiɔsa la nɛmɔ?
15 Kotola yambalo y’onto oya lo Ɔtɛkɛta wa Nzambi lo yoho yayowotshutshuya dia nde nɛmiya Ɔtɛkɛta akɔ. Etena kɔtshiyayɛ divɛsa, kotola yambalo y’onto l’ohomba wa mbeya kanyi yaki Nzambi lo dikambo diakɔ. L’ɔkɔngɔ wa wɛ mboka dimbola ndo nkondja okadimwelo w’ompokami ayɛ, wɛ mbeyaka mɛna ɔlɔlɔ mbuta ɛnyɛlɔ ɔnɛ: ‘Ɛsɔ tende woho wakokaso mbeya kanyi yaki Nzambi lo dikambo nɛ.’ Kana wɛ mbeyaka mombola ɔnɛ: ‘Nzambi akokande mbuta lo dikambo nɛ?’ Mbɔtshiya divɛsa lo yoho shɔ mɛnyaka dia Bible ndja oma le Nzambi ndo kimanyiyaka dia ompokami kiɔsa la nɛmɔ di’efula. Nsala dikambo sɔ ekɔ ohomba, djekoleko etena kasambishaso onto letawɔ Nzambi koko heye dimɛna kɛnɛ ketsha Bible.—Osam. 19:7-10.
16. Kakɔna kayotokimanyiya dia nembetshiya avɛsa lo yoho ya dimɛna?
16 Tokomɛke tsho lo mbadia avɛsa, koko lembetshiyawɔ. Paulo aki la mbekelo ka ‘nembetshiya ndo mbisha rɛferansɛ’ wendana la awui wakandetshaka. (Etsha 17:3) Divɛsa mongaka mbala efula la akambo efula ndo wɛ mbeyaka mɛna ɔlɔlɔ nsɔtɔla ditelo di’ohomba diɔtɔnɛ la kɛnɛ kenyu lo nkɛtshanya. Wɛ kokaka nsala dikambo sɔ lo kalolɛ tɔtɛkɛta tele la awui woleki ohomba kana lo mboka ambola wayokimanyiya ompokami dia mbishola awui woleki ohomba lo divɛsa diakɔ. Oma lâsɔ, lembetshiya kitshimudi ya etenyi ka divɛsa sɔ. L’ɔkɔngɔ wa wɛ nsala dikambo sɔ, nkimanyiya ompokami ayɛ dia nde mɛna woho wendanande la divɛsa diakɔ.
17. Ngande wakokayɛ nkana l’onto yimba oma l’Afundelo lo yoho yetawoya?
17 Kana l’onto yimba oma l’Afundelo lo yoho yakoka mbêtawoya. Lo nkamba la ɛtɛkɛta w’ɛsɛngɔsɛngɔ w’oma k’ɛse otema ndo la tokanyi t’eshika, Paulo ‘akakanaka l’anto yimba oma l’Afundelo’ lo yoho yetawoya. (Etsha 17:2, 4) L’ɛnyɛlɔ kande, sala la wolo dia munanda otema w’ompokami ayɛ. ‘Sala la wolo dia mbeya’ kɛnɛ kele l’otema ande lo nkamba la ambola w’eshika wɛnya dia wɛ ndjashaka l’otema ɔtɔi le nde. (Tuk. 20:5) Ewɔ dia ntondja ɛtɛkɛta w’otondjatondja. Ɔmbɔla tokanyi tayɛ lo yoho yokɛma hwe ndo ya shikaa. Tokanyi takɔ pombaka sukamɛ la tolembetelo ta shikaa. Ɛtɛkɛta ayɛ pombaka ntomba tshɛ lo tshɛ oma lo Ɔtɛkɛta wa Nzambi. Ndeka dimɛna nkamba la divɛsa ɔtɔi ko dilembetshiya dimɛna ndo mbisha ɛnyɛlɔ kɛmɔtshi, lo dihole dia mbadia avɛsa ahende kana asato lokakatanya. Nkamba la djembetelo yɛnya mɛtɛ ka dikambo kokaka tokimanyiya nto dia ‘nkamba la ɛtɛkɛta wetawoya.’ (Tuk. 16:23) Tena dimɔtshi, mbeyaka monga ohomba nsala eyangelo ndo nyomosha elembetshielo ekina. Womoto l’ɛnɔnyi 93 lakatatɛkɛtshi dikambo diande la diko aki l’ohomba wa mbeya lande na kambodiangana wetshelo w’ɔnɛ anima havu. Dia mbetawoya womoto ɔsɔ kɛnɛ ketsha Bible lo dikambo sɔ, aki ohomba nde mbeya oma lɛnɛ akatɔngɔ wetshelo ɔsɔ ndo woho wakawɔtɔ lo ɛtɛmwɛlɔ efula wa l’andja.b
Totetemale nkamba la wɔ dimɛna
18, 19. Lande na kahombaso ntetemala nkamba la “yombo ya nyuma” dimɛna?
18 Bible mbutaka ɔnɛ: ‘Akambo wa l’andja ɔnɛ wekɔ lo tatshikitana.’ Anto wa kɔlɔ wekɔ lo tahame otsha lo kɔlɔ koleki. (1 Kor. 7:31; 2 Tim. 3:13) Diakɔ diele, ekɔ ohomba dia sho ‘mbitola diangɔ diakonɛma wolo’ lo nkamba la “yombo ya nyuma, yako yeli diui dia [Nzambi].”
19 Ande ɔngɛnɔngɛnɔ wele la so dia monga la Bible, Ɔtɛkɛta wa Nzambi ndo nkamba la losango la lɔkɔ lele la wolo w’efula dia monula wetshelo wa kashi ndo munanda etema w’anto w’ɛlɔlɔ lee! Ndoko ɛngɔ kakonɛma wolo kele la wolo woleki losango lɔsɔ. Ɔnkɔnɛ, nyɛsɔ todje welo w’efula dia nkamba la “yombo ya nyuma” dimɛna l’olimu wakatosha Nzambi wa nsambisha Diolelo.
[Nɔtɛ ya l’ɛse ka dikatshi]
a Dihomɔ di’amɛna efula diatokimanyiya dia mbeya awui efula wendana la abuku wa Bible ko “ Toute Écriture est inspirée de Dieu et utile, ” Étude perspicace des Écritures, ndo asawo wa lo Tshoto y’Etangelo wele oko “Ɔtɛkɛta wa Jehowa wekɔ la lɔsɛnɔ.”
b Enda biukubuku Ngande wayalaso lam’avɔso? lɛkɛ 5-16.
Kakɔna kamboyeka?
• Wolo wa ngande wele l’Ɔtɛkɛta wa Nzambi?
• Ngande wakokaso ‘nembetshiya ɔtɛkɛta w’akambo wa mɛtɛ dimɛna’?
• Kakɔna kakoka losango la lo Bible nsala lo kɛnɛ kendana la ‘diangɔ diakonɛma wolo’?
• Ngande wakokayɛ nyomoleka monga la akoka wa mbetawoya anto l’esambishelo?
[Kiombo/Osato wa lo lɛkɛ 12]
Woho wa nkamba l’Ɔtɛkɛta wa Nzambi dia mbetawoya anto
▪ Konya onto dia nde nɛmiya Bible
▪ Lembetshiya Afundelo
▪ Kana l’onto yimba lo yoho yetawoya dia munanda otema ande
[Osato wa lo lɛkɛ 11]
Wɛ pombaka mbeka dia nkamba la “yombo ya nyuma” dimɛna