Onde anayɛ wekɔ suke?
1. Lande na kahomba ana wayanga nkalola lo kalasa ndjalɔngɔsɔla?
1 L’ɔkɔngɔ wa ngɔndɔ hiende, ambeki wayanga nkalola lo kalasa. Aha la tâmu, anayɛ wayohomana l’ekakatanu ɛmɔtshi ndo tɔsɛngiya t’oma le asekawɔ. Lâdiko dia lâsɔ, vɔ wayonyomokondja waaso wa “mvuta akambu wa mete.” (Joa. 18:37) Onde vɔ wekɔ suke dia ntsha dui sɔ?
2. Kakɔna kahomba anayɛ mbeya dia vɔ ndjalɔngɔsɔla?
2 Onde anayɛ shihodiaka dimɛna lande na kahawahombe ndjatambiya lo sɛlɛmɔnyi yendana l’awui wa wodja ndo l’afɛstɔ w’apanganu ndo lande na kele akambo asɔ kɔlɔ? Onde vɔ wamboyalɔngɔsɔla dia nshika tanga la ntondo ka tɔsɛngiya t’oma le wanyawɔ ta mbɔtɔ kalasa ya lâdiko, ta ntatɛ diembwanelo dia kɔlɔ kana ta nnɔ wanu kana didjoyadjoya? Onde vɔ wayota tsho di’ɔtɛmwɛlɔ awɔ mbâshimba dia nsala awui asɔ ko kana vɔ wayonga l’akoka wa nembetshiya lande na kahawâsale?—1 Pet. 3:15.
3. Ngande wakoka ambutshi nkamba l’Ɔtɛmwɛlɔ wa lo nkumbo wa la dikɔlɔ dia mbetsha anawɔ?
3 Nyosalake Ɔtɛmwɛlɔ wa lo nkumbo wa la dikɔlɔ: Lo mɛtɛ, ananyu wayohomana l’ekakatanu wendana la dietawɔ diawɔ la kalasa. Koko naka nyu mbidja welo wa lânde dia nsɛdingola la wɔ ekakatanu wayotohomana la wɔ la kalasa la ntondo ka tɔ ndjihɔ, kete nyayowakimanyiya dia vɔ mbeya nshika tanga. Shi nyu kokaka nsɛdingola ekakatanu ɛsɔ lo diaaso ɔtɔi kana ahende etena kasalanyu Ɔtɛmwɛlɔ wa lo nkumbo wa la dikɔlɔ? Nyu kokaka mbambola akambo waleka mbakiyanya la ntondo ka kalasa ndjihɔ. Nyu kokaka mvusola akambo wakanyeke ɛnɔnyi wetshi l’ɔkɔngɔ w’ananyu mbola yema ndo mfudia eokelo kawɔ. (Osam. 119:95) Nyu kokaka nsala la wɔ tɔkɛnyɔ tɔmɔtshi takokanyu nyu ambutshi mbɔsa dihole di’ombetsha, di’onto ɔmɔtshi lakalongola ɔkɛndɛ wa mbishaka ana alako la kalasa kana di’osekawɔ ombeki. Nyetsha ananyu woho wa nkamba la Bible dia nkadimola, la woho wa vɔ nkamba la dihomɔ diele oko Comment raisonner ndo Les jeunes s’interrogent. Ombutshi ɔmɔtshi akakambe la tena diasalawɔ tɔkɛnyɔ dia nde mbetsha anande woho wakokawɔ nsambisha embetsha awɔ l’ɔkɔngɔ wa kalasa ndjihɔ ndo mbatɛ dia vɔ wekɔ Ɛmɛnyi wa Jehowa.—Enda Tshoto y’Etangelo ya Ngɔndɔ ka dikumi l’ahende 15, 2010, lɛkɛ 3-5.
4. Kakɔna kayosala ambutshi wele la lomba?
4 Ekakatanu wahomba akɛnda w’Akristo mpomana la wɔ lo nshi y’ekomelo nyɛ wekɔ lo taleke ‘monga wolo mbikikɛ.’ (2 Tim. 3:1) Ambutshi wele la lomba pombaka talakanyisha anawɔ woho wahombawɔ ndɔshana l’ekakatanu ɛsɔ la ntondo ka kalasa ndjihɔ. (Tuk. 22:3) La ntondo k’ɔnɔnyi w’oyoyo wa kalasa ntatɛ, nyosale kɛnɛ tshɛ kakokanyu nsala dia nkimanyiya ananyu dia vɔ monga suke.