Onde wɛ amboyalɔngɔsɔla dikambo dia kalasa?
1. Waaso akɔna wakokongɛ etena katatɛyɛ mbɔtɔ kalasa?
1 Oyadi lo kalasa ka ntondo kana kekina kayonyɔtɔ, nyu akɛnda w’Akristo nyayohomana l’ekakatanu ndo la tɔsɛngiya t’eyoyo. Koko, nyekɔ ndo la diaaso di’oyoyo dia ‘sambisha akambo wa mɛtɛ.’ (Joa. 18:37) Onde wɛ amboyalɔngɔsɔla dimɛna ndo ekɔ suke dia sambisha?
2. Lo toho takɔna tamboyalɔngɔsɔla dikambo dia kalasa?
2 Dia kokimanyiya dia wɛ tondoya lo lɔsɛnɔ, wɛ ambolongolaka wetshelo efula oma le Jehowa, oma le ambutshi ayɛ ndo oma le ɔhɔmbɔ wa kɔlamelo ndo wa kɛsɔ. (Tuk. 1:8; 6:20; 23:23-25; Ef. 6:1-4; 2 Tim. 3:16, 17) Aha la tâmu, kakianɛ wɛ eya ekakatanu wakokongɛ la kalasa. L’ekimanyielo ka wetshelo w’oma le Nzambi ndo oma lo woho weyayɛ kɛnɛ kakokongɛ, yalɔngɔsɔla dia sambisha. (Tuk. 22:3) Dja yimba efula lo wetshelo ndo lo alako w’oma l’Afundelo watanema lo tɔvɔlimɛ tohende ta dibuku diele l’ɔtɛ a dui ɔnɛ: Les jeunes s’interrogent kâmɛ ndo lo asawo akina watomba mbala la mbala lo Réveillez-vous !
3. Lo toho takɔna tayoyonga l’akoka wa sambisha?
3 Ɛtshi kayɛ ka nkɛtɛ ka lânde kɛsɔ kayokokimanyiya dia wɛ sambisha lo toho efula. Etena kɛna anto akina woho walɔtayɛ ndo walɔngɔsɔlayɛ divo dimɛna, lɔkɛwɔ layɛ ndo woho watɛkɛtayɛ, woho walɛnyayɛ asekayɛ akina wa la kalasa ndo embetsha, walɛnyayɛ nondo diayɛ ndo woho wɛnawɔ dia wɛ ekɔ la lɔsɛnɔ la dimɛna, anto amɔtshi mbeyaka kombola ɔnɛ: “Lande na kele wɛ tshikitana la ambeki akina?” (Mal. 3:18; Joa. 15:19) Wɛ mbeyaka kondja diaaso dia mbâsambisha ndo mbâlembetshiya dietawɔ diayɛ. (1 Tim. 2:9, 10) L’ɔnɔnyi w’otondo, wɛ mbeyaka pomana l’ekakatanu wele oko sala fɛtɛ kana sɛlɛmɔnyi nkina ya wodja. Etena kakombolawɔ lande na kahayasha lo akambo asɔ, onde wɛ ayokadimola tsho ɔnɛ: “Awui asɔ hɔtɔnɛ l’ɔtɛmwɛlɔ ami; dimi lekɔ Ɔmɛnyi wa Jehowa,” ko kana wɛ ayokamba la diaaso sɔ dia sambisha awui wendana la Jehowa Shɔ ka ngandji kele l’olongo? Ndjalɔngɔsɔla dimɛna l’ɛlɔmbwɛlɔ ka Jehowa ayokokimanyiya dia wɛ monga suke dia sambisha embetsha, asekayɛ ndo anto akina.—1 Pet. 3:15.
4. Lande na kahombayɛ monga l’eshikikelo dia wɛ ayokoka mbɔtɔ kalasa dimɛna ɔnɔnyi w’otondo?
4 Kânga mbele wɛ ayonga la yema ya wɔma dia ntshɔ la kalasa, eya dia anto akina efula kombolaka dia wɛ mbɔtɔ kalasa dimɛna ɔnɔnyi w’otondo. Ndo nto, tekɔ lo ngɛnangɛna kâmɛ la yɛ lo waaso wele la yɛ wa sambisha anto akina lo ɛtshi kayɛ ka nkɛtɛ ka lânde kɛsɔ. Ɔnkɔnɛ, onga la dihonga ndo yalɔngɔsɔla dikambo dia kalasa!