Tatɔfɔnyake dia hatokoke nɔmbɔla wekelo wa Bible l’ɔtɛ weso l’awui efula wa nsala

1. Lande na kengenga apandjudi amɔtshi dia nɔmbɔla wekelo wa Bible?

¹ Apandjudi amɔtshi mengengaka dia nɔmbɔla wekelo wa Bible l’ɔtɛ wewɔ l’awui efula wa nsala. Vɔ mbutaka ɔnɛ nɔmbɔla wekelo wa Bible mbɔsaka wenya. Ndo nto, vɔ mbutaka dia nɔngɔsɔla wekelo, mbɔlɔmbɔla ndo nkimanyiya ombeki dia nkandola ekakatanu ande mbɔsaka wenya. Ɔpɔstɔlɔ Pɔɔlɔ akate dia nde akayashaka tshɛ l’olimu ɔsɔ l’oyango wa nkimanyiya ase Tɛsalɔnika dia mbeya Jehowa. (1 Tɛs. 2:7, 8) Ngande wakokaso nɔmbɔla wekelo wa Bible oyadi tekɔ l’awui efula wa nsala?

2. Shɛngiya yakɔna yele la ngandji kokaso Jehowa lo woho wakambaso la wenya aso?

² Kambɛ Jehowa mbɔsaka wenya efula: Kɛnɛ kele mɛtɛ ele, nɔmbamaka wenya dia kambɛ Jehowa. Ɛnyɛlɔ sho tshungolaka etena mbala la mbala dia mbɔtɔ lo nsanganya, ntshɔ l’esambishelo, mbadia Bible ndo dia nsala dɔmbɛlɔ. Olonganyi ɔmɔtshi wele l’awui efula wa nsala tshungolaka etena ka monga kaamɛ l’olonganyi ande. Sho pombaka ndeka ngɛnangɛna dia ‘ndjatshungolɛ’ etena ka ntɛmɔla Jehowa l’ɔtɛ wa ngandji kawokaso. (Ɛf. 5:15-17; 1 Jni. 5:3) Lo ndjela Yeso, olimu wa mbetɛ anto ambeki wekɔ etenyi k’ohomba k’ɔtɛmwɛlɔ aso. (Mat. 28:19, 20) Nkana yimba l’ɛtɛkɛta ɛsɔ ayotokimanyiya diaha sho mengenga dia nkotsha ɔkɛndɛ wa mbeka l’anto Bible wakatalongola.

3. Ngande wakokaso nɔmbɔla wekelo wa Bible oyadi akambo amɔtshi futanyaka ekongelo kaso k’esambishelo?

³ Ko kakɔna kayotosala naka olimu, hemɔ kahakɔnɔ kana ɛkɛndɛ wa l’etshumanelo wekɔ lo mbidja wekamu l’ekongelo kaso? Apandjudi amɔtshi watshɔ lo nkɛndɔ lo tena dimɔtshi mbekaka l’ambeki awɔ Bible lo nkamba la telefɔnɛ. Apandjudi wele hemɔ yahakɔnɔ futanyaka ekongelo kawɔ mbokanaka l’ambeki awɔ dia vɔ mbayelaka lawakawɔ dia tekaka Bible. Ndo etena kewɔ bu la diaaso, amɔtshi l’atei awɔ mbokanaka l’apandjudi akina dia vɔ mbakimanyiyaka la nɔmbɔla wekelo wa Bible.

4. Naa ɛtshɔkɔ wakondjaso lo mbisha lonya l’olimu wa mbeka l’anto Bible?

⁴ Pɔɔlɔ akakondja ɔngɛnɔngɛnɔ w’efula lo nkamba la wenya ndo wolo ande dia nkimanyiya anto akina dia mbeya akambo wa mɛtɛ. (Etsha 20:35) Etena kakandakanyiyaka dikambo di’anto wakandakimanyiya la Tɛsalɔnika, nde akatshutshuyamaka dia mboka Jehowa losaka. (1 Tɛs. 1:2) Tayoleka monga l’ɔngɛnɔngɛnɔ, naka hatetawe di’awui wele la so toshimba dia mbisha lonya l’olimu wa mbeka l’anto Bible.