Kɛnɛ kakoka kokimanyiya dia mbekaka mbala la mbala
ONDE wɛ ekɔ l’okakatanu dia nsala wekelo ayɛ wa Bible w’onto ndamɛ ndo ngɛnangɛna la wɔ? Ondo tena dimɔtshi sho tshɛ toyaokaka ngasɔ. Koko, nkana yimba lo dikambo di’awui akina wasalaso mbala la mbala ɛnyɛlɔ oko mbɔka. Mbɔka mbɔsaka etena ndo nɔmbaka mbidja welo koko l’ɔkɔngɔ wa sho mbɔka, sho ndjaokaka dimɛna efula! Wekelo wa Bible koka vɔ lawɔ monga oko “ashi lo tshimbo ya ɔtɛkɛta.” (Ɛf. 5:26) Tɔsɛdingole bɛnyɛlɔ dimɔtshi diakoka kokimanyiya:
Sala ekongelo. Wekelo wa Bible w’onto ndamɛ ekɔ l’atei wa “akambo woleki ohomba” wahahombe Okristo minya yimba. (Flpɛ. 1:10) Dia kokimanyiya dia wɛ ndjela ekongelo kayɛ, lande na kahayakihanɛ lo dihole diɛnama ɛnyɛlɔ oko lo dibaya kana lo ehele? Kana wɛ koka mbidja sɔnɛri lo telefɔnɛ kayɛ yema tshitshɛ la ntondo ka wonya wa wekelo.
Ɔtɔnganyiya l’ehomba ayɛ. Onde ekɔ wɔdu le yɛ dia monga la yambalo l’etena k’otale? Wɛmɛ mbaleka ndjaeya. Ɔtɔnganyiya wekelo ayɛ lo ndjela akoka ayɛ. Naka wɛ mengengaka dia mbeka l’etena kakayakongɛ, lande na kahayɔsɛ yɛdikɔ ya mbekaka kaanga l’edja ka minitɛ dikumi tsho? Lo mbeka kaanga l’etena ka tshitshɛ kɛsɔ, wɛ koka mbeka awui efula. Ndo lam’ayoyotatɛ, wɛ mbeyaka ndjotshutshuyama dia ntetemala.—Flpɛ. 2:13.
Sɔna la ntondo awui wayoyeka. Naka wɛ ayokonga polo wonya ayɛ wa wekelo dia ndjɔsɔna kɛnɛ kayoyeka, kete wɛ mbeyaka monga ko ‘hakambi la wenya ayɛ lo yoho yoleki dimɛna.’ (Ɛf. 5:16) Lande na kahayasale listɛ l’asawo kana l’awui wahombayɛ mbekaka? Etena tshɛ kakoyelɛ dimbola lo yimba funda diɔ. Ndo l’ekomelo ka wekelo ayɛ, wɛ koka nkotsha tokanyi tokina lo listɛ l’awui ayɛ wayoyolanga mbeka.
Sala etshikitanu naka kokaka. Hemba dia mbidja etshikitanu l’ekongelo kayɛ, ɛnyɛlɔ edja ka ngande kayoyetshaka dia mbeka kana awui wasɔnayɛ. Kɛnɛ kele ohomba bu etena, edja, kana kɛnɛ kekayɛ koko woho wekayɛ mbala la mbala mboleki ohomba.
Sho kondjaka mɛtɛ wahɔ oma lo ekongelo ka dimɛna ka wekelo wa Bible wa mbala la mbala. Sho ndjasukanyaka la Jehowa, mbekaka dia nsala akambo la lomba ndo sho keketshamaka.—Jas. 1:8.