Tatengengake dia mbeka l’onto Bible!
1. Lo yoho yakɔna yeso bu ‘enyishi wa kɛnɛ kele ɔlɔlɔ’?
1 Lo ndjasha tshɛ lo esambishelo ka lokumu l’ɔlɔlɔ la Diolelo diaki Nzambi, sho mɛnyaka dia sho bu ‘enyishi wa kɛnɛ kele ɔlɔlɔ’ otsha le anto wele lo bɛtshi diaso dia nkɛtɛ. (Tuk. 3:27) Ndoko losango loleki dimɛna lakokaso mbewoya anto ko mbɛdima la losango lendana la lɔsɛnɔ loleki dimɛna layonga laso lo ɛlɔmbwɛlɔ kaki Nzambi. Kânga mbakokaso mbewoya anto akina losango la Diolelo lo sambishaka lo tshakitudi kana lo mbishaka anto ekanda, lande na kahatayadjɛ oyango wa tatɛ mbeka l’onto ɔmɔtshi Bible, naka tatasale dikambo sɔ?
2. Kakɔna kakoka toshimba dia tatɛ mbeka l’onto ɔmɔtshi Bible?
2 Tena dimɔtshi, wekamu woleki woke wakoka toshimba dia mbeka la onto ɔmɔtshi Bible ele woho wɔsaso dikambo sɔ. Anto amɔtshi mengengaka dia mbeka l’onto ɔmɔtshi Bible nɛ dia vɔ ndjaokaka dia vɔ bu l’akoka kana wekɔ la elimu efula. Alako wayela anɛ mbeyaka tokimanyiya diaha sho mengenga dia ndjasha l’olimu wa mbeka la anto Bible.—Mat. 28:19; Etsha 20:20.
3. Lande na keso l’akoka wa mbetsha anto akina Bible?
3 Wɔma: Ondo sho kɔmbɔtɔ kalasa efula kana l’ɔtɛ w’ɛkɔkɔ ekina sho ndjaokaka dia sho bu l’akoka wa mbeka l’onto Bible. Ekambi w’Akristo wa tomanamana wa lo ntambe ka ntondo ‘kombeyaka mukanda efula ndo waki anto k’anto.’ Kakɔna kakâkimanyiya dia mbetsha anto akina akambo wa mɛtɛ? Vɔ “waki la Jesu.” (Etsha 4:13) Vɔ waketshama oma le Ombetsha a Woke, Yeso, ɔnɛ lele wetshelo ande ndo toho tande ta mbetsha takalamema lo Afundelo dikambo diaso. Oyadi sho kɔmbɔtɔ kalasa efula, tekɔ lo nongola wetshelo wa lo nyuma woleki wetshelo ekina tshɛ.—Is. 50:4; 2 Kor. 3:5.
4. Wetshelo akɔna wakokaso kondja oma l’ɛnyɛlɔ kaki Amɔsɛ?
4 Lo tena dimɔtshi, Jehowa akakambe la aprɔfɛta dia pangwɛ ewandji ndo ɛlɔhɛ ekina wakatakɔka mboka. Amɔtshi, ɛnyɛlɔ oko Amɔsɛ aki onto k’onto. Amɔsɛ akate ate: “Dimi taki umvutshi kuyanga on’a umvutshi, keli dimi laki ulami wa dungalunga, la umunyi w’etamba wa khumu.” (Am. 7:14) Koko, Amɔsɛ komengenga dia mbewoya Amaziya, ɔlɔmbɛdi ɔmɔtshi wakatɛmɔlaka ekishi ka yana ya ngɔmbɛ losango l’elombwelo laki Jehowa. (Am. 7:16, 17) Sho pombaka mbohɔka nshi tshɛ dia tekɔ lo kamba olimu waki Nzambi ndo ɔnɛ nde ayotosha akoka wa kamba olimu wakandatosha.—2 Tim. 3:17.
5. Lande na kahombaso sala la wolo dia tatɛ mbeka l’onto Bible oyadi tekɔ la elimu efula wa sala?
5 Elimu efula: Kânga mbeyɛ la elimu efula wa sala, ondo wɛ ndjatshungwɛka etena ka sambishaka mbala la mbala. Mbeka l’onto Bible kokaka monga yoho mɔtshi y’olimu yaleka mbisha ɔngɛnɔngɛnɔ. Ekɔ diɛsɛ dia lânde dia mɛna etombelo wonga la Ɔtɛkɛta wa Jehowa lo lɔsɛnɔ l’onto. (Heb. 4:12) Jehowa ngɛnangɛnaka etena kɛnande tayahombia l’oyango wa kimanyiya onto dia nde ‘koma lo ewo k’oshika k’akambo wa mɛtɛ.’ (1 Tim. 2:4) Kânga andjelo ngɛnangɛnaka etena kayatshumoya onto ɔmɔtshi dikambo dia yoho yande ya lɔsɛnɔ ya ntondo ndo kahamande lo nyuma.—Luka 15:10.
6. Naa diɛsɛ dia woke diele laso dia sala lolango la Nzambi?
6 Nzambi “nangaka [dia] antu tshe nshimbamela ndu nkuma lu ewu ka mete.” (1 Tim. 2:4) Tekɔ mɛtɛ la diɛsɛ dia woke dia kamba lo yoho yɔtɔnɛ la lolango laki Nzambi lo mbeka la anto Bible aha la mengenga!