Nkumu ya Diolelo No. 38 yayokahanyema lo Ngɔndɔ ka dikumi l’ɔtɔi!

1. Ambola akɔna wayaoka anto lo kɛnɛ kendana l’anto wambovɔ, ndo kakɔna kayosalema dia nkadimola ambola asɔ lo Ngɔndɔ ka dikumi l’ɔtɔi?

¹ Nyɔi ekɔ otunyi w’anto tshɛ oyadi dietawɔ diakɔna diele la wɔ. (1 Kɔr. 15:26) Anto efula ndjambolaka lɛnɛ ele anto wambovɔ ndo ndjambolaka dia kana vɔ wayɛnana la wɔ nto. Diakɔ diele, l’edja ka ngɔndɔ k’otondo tshumanelo dia l’andja w’otondo diayokahanya Nkumu ya Diolelo No. 38 kele l’ɔtɛ a dui ɔnɛ Onde mɛtɛ anto wakavu wayɔsɛna nto? Okahanyelo wa laande ɔsɔ wayotatɛ lo Ngɔndɔ ka dikumi l’ɔtɔi 1. L’ɔkɔngɔ w’okahanyelo wa laande ɔsɔ, tayokambaka la Nkumu ya Diolelo No. 38 l’esambishelo oko traktɛ.

2. Ngande wakalɔngɔswama Nkumu ya Diolelo No. 38?

² Woho wakayalɔngɔswama: Nkumu ya Diolelo No. 38 yakalɔngɔswama dia sho minɛka l’otale l’oyango wa ɔtɛ a dui wakotola yambalo y’anto monga laadiko ndjelana la ambola anɛ: “Onde wɛ ayokadimola wate . . . eelo? keema? ondo?” Etena kayofola ombadi traktɛ Nkumu ya Diolelo, nde ayɛna okadimwelo washa Bible lo dimbola diakenga ɔtɛ a dui ndo kɛnɛ kalembetshiya alaka washa Bible le nde. Nde ayɛna nto ɛkɔkɔ wawotshutshuya dia mbetawɔ Bible. Lɛkɛ l’ekomelo la Nkumu ya Diolelo lekɔ la dimbola di’ohomba diayowotshutshuya dia nkana yimba ndo diawɔlɔmba dia mbeya awui efula.

3. Ngande wayokahanyema Nkumu ya Diolelo No. 38?

³ Woho wayoyokahanyema: Okahanyelo ɔsɔ ayosalema woho watotokahanyaka akatshi wa leeta l’oya lo Eohwelo ndo oya lo Losanganya la distrikɛ. Dikumanyi wayosha ɛlɔmbwɛlɔ ka woho wayotokindjakindja ɛtshi kaso ka nkɛtɛ dia nkahanya akatshi akɔ lo yoho yɔtɔnɛ la mukanda wakawalongola wa Ngɔndɔ ka nɛi 1, 2013. Tshumanelo diele la ɛtshi ka nkɛtɛ ka tshitshɛ koka nkimanyiya tshumanelo diosukanyi la wɔ diele la bɛtshi dia nkɛtɛ dia weke efula. Etena kayoyɔsa lofulo layɛ la Nkumu ya Diolelo No. 38, tohɛke dia wɛ pombaka mbɔsa paka lofulo layoyokahanya l’edja ka lomingu ɔtɔi. L’edja tshɛ kayosalema okahanyelo ɔsɔ, tayoyokahanya traktɛ kɛsɔ l’ahole watanema anto efula paka l’ɔkɔngɔ wa sho nshidiya kikahanya lo luudu la luudu l’ɛtshi kaso ka nkɛtɛ k’otondo. Naka nyamboshidiya kahanya traktɛ yanyu la ntondo ka ngɔndɔ nshila, ko nyu ntatɛ mbisha anto ekanda wahombaso mbisha anto lo ngɔndɔ kakɔ. Lushi la samalo la ntondo la ngɔndɔ kakɔ, tayoleka mbidja yimba l’okahanyelo wa laande ɔsɔ lo dihole dia ntshɔ dia tɔlɔmba anto dia mbeka la wɔ Bible. Lo wikɛndɛ, sho pombaka nto nkahanya periodikɛ naka kokaka. Shi wɛ koka ntatɛ ndjalɔngɔsɔla dia ndjosha lonya tshɛ lo tshɛ l’okahanyelo wa laande ɔsɔ?