Okahanyelo wa lânde wayosalema tatɛ Ngɔndɔ ka 10, 16 polo Ngɔndɔ ka 11, 12!

¹ “Ekomelo ka ɛtɛmwɛlɔ wa kashi kaya suke!” Ɔsɔ mbele ɔtɛ a dui wa Nkumu ya Diolelo No. 37, yayokahanyema l’andja w’otondo tatɛ ngɔndɔ kayaye. Lo nshi dikumi la tshanu ya ntondo ya Ngɔndɔ ka dikumi, tayosha anto Tshoto y’Etangelo la Réveillez-vous! Koko, tatɛ oma lo Lushi l’ɔtɔi, Ngɔndɔ ka dikumi 16 polo Lushi la lomingu, Ngɔndɔ ka dikumi l’ɔtɔi 12, tayoyasha tshɛ l’okahanyelo wa Nkumu ya Diolelo No. 37. Lo nshi ya wikɛndɛ, tayoyikahanyaka kâmɛ la periodikɛ yeke ka tomba.

² Wanɛ wakoka mbisha lonya: Anto tshɛ wasambisha lokumu l’ɔlɔlɔ kokaka sala kɛnɛ tshɛ kakokawɔ sala dia sukɛ okahanyelo ɔsɔ. Amɔtshi wayonga l’akoka wa kamba oko ambatshi mboka wa tshanda. Onde tekɔ l’ana kana la ambeki wa Bible watahame lo nyuma? Tâkimanyiya dia vɔ sawola la dikumanyi dia mbeya kana waya la akoka wa koma apandjudi wahatabatizama. Dikumanyi la dia mbɔsa yɛdikɔ ya sawola la wanɛ wahayosambisha dia mbakeketsha dia vɔ mbisha lonya l’okahanyelo ɔsɔ, ondo lo kamba kâmɛ la apandjudi wambohokɔ akambo.

³ Wayotomɛ tshumanelo tshɛ ekanda k’ɔlɔlɔ ka Nkumu ya Diolelo No. 37 dia apandjudi la ambatshi mboka nongola kɔpi 50. Anto wayasha l’akambo wa mɛtɛ, koko watakome apandjudi kokaka nongola kɔpi 5 dia tokahɛ ase nkumbo yawɔ ndo angɛnyi awɔ. Apandjudi la ambatshi mboka tshɛ la dia funda lofulo lakawasha anto lo lɛkɛ lokina la alapɔlɔ awɔ w’olimu wa Ngɔndɔ ka dikumi ndo ka dikumi l’ɔtɔi. Sekeletɛlɛ ayofunda lofulo tshɛtshɛ lakakahanya etshumanelo ndo ayotomɛ biro ka filialɛ l’ekomelo ka ngɔndɔ tshɛ. Kɔpi tshɛ ya Nkumu ya Diolelo yayotshikala l’ɔkɔngɔ w’okahanyelo ɔsɔ mbeyaka mombama dia ndjokamba la yɔ lo toho tokina t’esambishelo.

⁴ Kɛnɛ kahombaso mbuta: Mbɔtwɛlɔ kayɛ konge ka tshena pe, dia kokimanyiya dia wɛ ndeka dianganya losango lɔnɛ le anto efula. Wɛ kokaka mbuta wate: “Lekɔ lo mbisha lonya l’okahanyelo ɔmɔtshi wasalema lo nkɛtɛ k’otondo wa losango lɔnɛ l’ohomba dia wahɔ w’anto tshɛ. Kɔpi kayɛ kambotokosha ofele tɔ kɛnɛ. Lam’alangayɛ, tohɛke dia kiadia.” Koka sala esambishelo kɛsɔ kânga aha la atapa. Tohɛke dia funda nkombo y’anto wɛnyisha nsaki.

⁵ Woho wa kindjakindja ɛtshi kaso ka nkɛtɛ: Lo dihole dia kahanya Nkumu ya Diolelo lo toshinga, naka kokaka ayonga dimɛna sambisha efula lo luudu la luudu ndo lo bɛtshi dia nkɛtɛ di’amundji w’ekanda. Funda mvudu yele anto bu lawɔ ndo hemba dia kalola lo wonya okina kana lushi lokina. Tatɛ Lushi l’ɔtɔi, Ngɔndɔ ka dikumi l’ɔtɔi 6, sho mbeyaka totshika kɔpi kɛmɔtshi lo luudu tshɛ laki anto komonga lawɔ. Koko, naka etshumanelo ekɔ la ɛtshi ka nkɛtɛ ka woke efula kahakoke kindjakindjama lo etena kakashama, kete dikumanyi mbeyaka shikikɛ dia naka kokaka tshika Nkumu ya Diolelo lo mvudu yele anto bu lawɔ l’etena k’okahanyelo.

⁶ Elanyelo ka “Babilona ka Wuki” kekɔ lo ndjaleke sukana. Anto la dia tomba oma lɔkɔ la ntondo ka tɔ ndanyema. (Eny. 14:8; 18:⁠8) Kongɛ oma ko kakianɛ dia ndeka sambisha lo etena k’okahanyelo ɔsɔ wayosalema l’andja w’otondo dia anto tshɛ mbeya dia ekomelo ka ɛtɛmwɛlɔ wa kashi kaya suke!