Todianganya Nkumu Ya Diolelo No. 35 Efula
1 Sho tshɛ tayonga la lotumu efula lo Ngɔndɔ ka Dikumi l’Ɔtɔi la ka Dikumi l’Ahende. Lo nshi 8 y’oma l’etatelo ka Ngɔndɔ ka Dikumi l’Ɔtɔi, tayosha anto Tshoto y’Etangelo la Réveillez-vous ! Ko, oma lo Lushi la Lomingu, Ngɔndɔ ka Dikumi l’Ɔtɔi 9 polo lo Lushi la Lomingu, Ngɔndɔ ka Dikumi l’Ahende 14, tayokamba olimu wa dianganya Nkumu ya Diolelo No. 35 l’andja w’otondo. Tayonga la diɛsɛ dia mbewoya anto tshɛ wodjashi lo mbilo (territoire) kaso losango l’ohomba efula. Losango lakɔ kadimulaka dimbola di’ɔnɛ “Onde Anto Tshɛ Wokokana Ngandji Lushi Lɔmɔtshi?” L’edja ka lotumu lɔsɔ la lânde, tayodianganya Nkumu ya Diolelo nshi ya l’atei a lomingu; ko l’ekomelo ka lomingu tayokotshaka ndo periodikɛ yeke ka tomba.
2 Akɔna Okoki Ndjidianganya? Oko okowodisalaka tena tshɛ, dikumanyi mbayonga ka ntondo l’olimu ɔsɔ. Onto l’onto ngɛnangɛnaka dianganya Nkumu ya Diolelo, ndo aha la tamu apandjudi efula wayokamba olimu w’ombatshi mboka wa tshanda ngɔndɔ kɛmɔtshi kana yakɔ hiende yayokambema lotumu lɔsɔ l’odianganyelo. Apandjudi akina wayolanga mbetsha wenya efula l’esambishelo oleki woho watowosalaka.
3 Onde tekɔ lo mbeka l’onto ɔmɔtshi laya tshale lo dibuku Ewo ndo layanga kotsha kɛnɛ kalɔmbama dia sambisha? Ondo nde mbeyaka koma opandjudi wahatabatizama la ntondo k’olimu w’odianganyelo ɔsɔ tatɛ dia nde lawɔ ndjôkamba. Ɛngɔ ɔtɔi kahombama dia mbisha onto Nkumu ya Diolelo ele sawo dia tshena pe diaha l’okakatanu. Sho koka mbuta kânga ɔnɛ: “Losango lɔnɛ lekɔ ohomba efula, diɔ diakɔ diambolewoyama l’andja w’otondo ngɔndɔ kɛnɛ l’ɛtɛkɛta 169. Nte kosha kiatshi yayɛ wɛmɛ.” Kânga ana w’akɛnda koka ndjasha l’olimu ɔsɔ w’ɔngɛnɔngɛnɔ.
4 Anɔmbɔdi wa wekelo wa dibuku kawokeketsha anto tshɛ wele l’olui awɔ wa wekelo dia vɔ ndjasha efula l’odianganyelo ɔsɔ wa Nkumu ya Diolelo No. 35. Ondo nde ekɔ ndo l’apandjudi amɔtshi wahayosalangana wakoka salangana naka vɔ kondja ekimanyielo kahombawɔ. Lâsɔ, la ntondo k’odianganyelo ɔsɔ tatɛ, dikumanyi pombaka ntshɔ dia tenda ɔm’ɔmɔ a l’atei w’apandjudi asɔ dia mbeya woho wa mbâkimanyiya dia vɔ tshindɛ apandjudi wa tomanamana l’olimu ɔsɔ.
5 Etena Kakɔna Kokokiso Nsangana dia Ntshɔ Atosambisha? Lotumu lɔsɔ mpikaka dia randevu w’esambishelo salema lo wenya wasungana ndo wahombama. Etena tshɛ kayongaka diaaso, randevu w’esambishelo pombaka salemaka lushi tshɛ la lo lomingu, lo wikɛndɛ (lushi la samalo la la lomingu) ndo la dikɔlɔ. Randevu akɔ la dia salemaka lo tena diayoshaka apandjudi l’ambatshi mboka diaaso dia vɔ kamba la wonya tshɛ wakalɔngɔsɔma di’esambishelo. Randevu koka nɔngɔsɔma nto l’ɔkɔngɔ w’eshidi ehende wa dikɔlɔ lo dikambo di’ɛlɔngɔlɔngɔ wakɔtɔ kalasa, wanɛ wakamba olimu l’olui ndo anto akina. Omendji w’olimu ayodja yimba dia mbilo (territoire) ya sambisha lo luudu la luudu monga efula ndo mbilo ya wa kɔmɛlɛsa, dia onto tshɛ kamba olimu ɔsɔ l’ohetoheto. L’ahole wele apandjudi efula, kanyonge totshundju di’aha ndolanɛ l’etenyi ɔtɔi ka mbilo dia sambisha.
6 Ko Ngande Wayototsha di’Anto Wahatonga Lawɔ? Kɛnɛ kakombolaso ele shamɛ mɛnana l’anto efula dia mbâlembetshiya bonde kahombawɔ mbadia Nkumu ya Diolelo No. 35. Lâsɔ, naka tambɔkɔkɔla ko ndoko onto, tofunde adrɛsɛ dia sho ndjoya nto wonya okina ko lushi lakɔ. Naka tambosala tshɛ dia mɛnana l’anto ko hatowaɛnyi polo lo lomingu la ndjihelo l’odianganyelo, kete sho koka kitsha kiatshi mɔtshi ya Nkumu ya Diolelo la soko dia luudu lande, ko sala di’aha ambetshitshi ndjiɛna. Lo ahata (quartiers) wadjasɛ anto, tatotshimbatshimbake dia mbisha anto weteta l’ɔsɛsɛ Nkumu ya Diolelo. Naka tekɔ lo sambisha lo toshamba ko mbilo kakɔ kekɔ woke efula heyama kikindola tshɛ lo nshi y’odianganyelo, kete sho kokaka tshikɛ wanɛ wele bu lawɔ kiatshi mɔtshi ya Nkumu ya Diolelo kam’etaso mbala ka ntondo dia towaenda.
7 Naa Oyango Aso? Tshumanelo la dia sala tshɛ dia dianganya Nkumu ya Diolelo tshɛ yayowolongola lo mbilo kawɔ k’otondo la ntondo k’odianganyelo ɔsɔ shila, Ngɔndɔ ka Dikumi l’Ahende 14. Naka mbilo k’etshumanelo kaso kekɔ woke efula ko kema wâle di’onto sambisha ndamɛ lo dihole dia tomba anto ahende, kete ondo ayoleka dimɛna sala ngasɔ. Dui sɔ diayotokimanyiya dia sho mbewoya lokumu l’ɔlɔlɔ le anto efula mɛtɛ wasungana la lɔ. (Mat. 10:11) Ondo ayonga ohomba sho mɛmba tokatshikatshi tɔmɔ tayotokimɛka l’anya ndo Bible lo dibenga kana lo tshapatapa yaso ya l’anya, lo dihole dia mɛmba tapa dia woke. Todje yimba dia funda dimɛna saki kɛnyisha onto.
8 Onde Tamboyalɔngɔsɔla dia Tatɛ? Dikumanyi diayotashikike la ntondo lofulo la periodikɛ ya lâdiko yayohomba etshumanelo ko vɔ toma kɔmandɛ. Kema ohomba toma kɔmandɛ ka Nkumu ya Diolelo nɛ dia wayoyitomɛ etshumanelo tshɛ. Ambatshi mboka wa lânde, wa pondjo la wa tshanda wayolongola onto l’onto tokatshi 250 ta kahɛ anto, koko apandjudi wayolongola onto l’onto 50. Tekɔ la lotumu efula. Onde tekɔ lo nomɔlomɔ dia kamba lotumu lɔsɔ l’ɔngɛnɔngɛnɔ? Ɔsɔku mbediɔ! Lâsɔ, nyɛsɔ todianganya losango l’oma lo Bible la Nkumu ya Diolelo No. 35 efula!