Tolowanya akoka aso wa nsambisha—Lo ndjashaka le ampokami aso
Ohomba wa dikoka sɔ: Yeso akayashaka la ngandji tshɛ le ampokami ande ndo akawaokaka ngandji l’onto ndo l’onto. Ɛnyɛlɔ, lo diaaso dimɔtshi Yeso akoke pami kɛmɔtshi ka ehoke kandji, diakɔ diele etena kakandɔɔkɔnɔla, nde akasale dui sɔ lam’asawɔ vɔ ahende ato mangana la olui w’anto. (Makɔ 7:31-35) Nde akɛnyaka dia nde mbɔsaka ambeki ande la nɛmɔ lo mbeya elelo awɔ ndo lo mbewɔ mbapɔpa la lokema l’akambo. (Jni. 16:12) Kaanga etena kende l’olongo, Yeso ekɔ lo ndjasha le anto. (2 Tim. 4:17) Oko weso ambeki wa Kristo, sho pombaka mbookoya. (1 Pet. 2:21; 1 Jni. 3:16, 18) Laadiko dia laasɔ, tayokondja etombelo w’amɛna lo esambishelo naka sho ndjasha le ompokami aso lo nsɛdingola akambo wele la nde, awui wayashande ndo wayakiyanyande. Nde ayonga suke dia tohokamɛ naka nde mbeya dia hatoye tsho dia ndjosambisha kana dia ndjotshikɛ okanda, koko sho ndjashaka le nde.
Woho wa nsala dui sɔ:
• Yalɔngɔsɔlaka dimɛna. Sawolaka dimɛna, mɔnamɔnaka, ndo ɔsande oko ɔngɛnyi.
• Sɛdingolaka. Onde awui amɔtshi wekɔ wɛnya dia onto akɔ ekɔ la ana, dia nde ngɛnangɛnaka jardɛ kana awui wa dongalonga, dia nde ekɔ la waetawɔ wa l’ɔtɛmwɛlɔ ɔmɔtshi? Ondo wɛ koka ntshikitanya mbɔtwɛlɔ kayɛ dia mbɔtɔnganyiya la awui wele la nde.
• Mbolande kanyi yande ndo hokamɛnde la yambalo tshɛ aha la mbohemboya ɔtɛkɛta. Endakande dia mɛnya dia wɛ ekɔ lo mbohokamɛ. Kaloyande losaka lo elembetshiyelo ande ndo andolande l’otema ɔtɔi naka kokaka. Ewɔ dia mbidjana la nde taamu.
• Yaɔtɔnganyiya. Naka ekɔ ohomba, kete tshikitanya mbɔtwɛlɔ kayɛ dia sawola l’onto awui wendana la nde. Dui sɔ koka monga wɔdu efula lam’ele traktɛ, ekanda ndo periodikɛ yaso mongaka la asawo wotshikitanyi. Naka wɛ amboya lo etena kende bu suke, ɛnyɛlɔ etena kende la olimu, susa sawo diayɛ ndo tshikɛnde diaaso.
Hemba nsala nganɛ lo ngɔndɔ kɛnɛ:
• Nyoholake mbɔtwɛlɔ nyɛ lo ɔtɛmwɛlɔ anyu wa lo nkumbo, kana etena kenyu lo esambishelo, kalɔmba dia opandjudi mbɔtɔnganyiya mbɔtwɛlɔ kande la dui dimɔtshi diata ompokami.
• Lo nsanganya y’otsha l’esambishelo, ɔnangɛso lalɔmbɔla losanganya lakɔ koka nembetshiya kana nsala wɛnyɛlɔ wɛnya toho takokaso ndjashaka le ompokami aso.