Toyasha le anto akina: —Lo shishimaka kɛnɛ keta
1 Jehowa Nzambi ndo Kristo Yeso mboleki mbeya ehomba wa shikaa wele l’anto ndo vɔ mboleki mbakimanyiya. (2 Ek. 16:9; Mako 6:34) Naka sho mbeya ehomba ndo ekiyanu wele la wanɛ wasawola laso l’olimu aso w’esambishelo, kete sho mbeyaka monga l’akoka wa mbɔtɔnganyiya mbɔtwɛlɔ kaso ka lokumu l’ɔlɔlɔ la awui wele la onto.
2 Katodjake yimba lo kiambokambo tshɛ: Yeso akendaka. (Mako 12:41-43; Luka 19:1-6) Woho akɔ wâmɛ mbele, etena kasukanaso la luudu l’ompokami aso ndo kɛnaso diangɔ dia ɛtɛmwɛlɔ diɔlɛnginde lo luudu, efundelo wafundawɔ lo waa mituka kana diangɔ diatɔkɛnyaka l’ana lo sɛkɛ, sho mbeyaka kondja waaso wa sambisha dimɛna lokumu l’ɔlɔlɔ.
3 Elundji k’onto ndo ɛnamelo kande koka mbishola dui dimɔtshi lo nsaki yande. (Tuk. 15:13) Dui sɔ mbeyaka mɛnya dia nde ambovusha lakinde ɔmɔtshi la ngandji kana ɔkɛyi okina wɛnya dia nde ekɔ l’ohomba wa ekeketshelo. Mbadiɛ onto ɔsɔ avɛsa amɔtshi mbeyaka mbɔngɛnyangɛnya. (Tuk. 16:24) Onde ompokami ekɔ lo sala esadi esadi dia ntshɔ dihole dimɔtshi kana nde mɛmba ɔna lalela? Naka ɔsɔku, kete mbeyaka monga dimɛna efula wɛ ndjowembola etena kekina. Lo mbisha onto nɛmɔ ndo lo ‘ndjadja lo dihole diande,’ sho koka mbokimanyiya dia nde ndjotohokamɛ etena kayotoya ndjowenda.—1 Pet. 3:8.
4 Ɔtɔnganyiya kɔmatɛrɛ yayɛ la awui wele la onto: Ɔpɔstɔlɔ Paulo akɛnyi dia osomba wa Atɛna aki l’ediakelo kaki la efundelo w’ɔnɛ: “Le Etemolatemola kahaweyi.” Dui sɔ diakonge la shɛngiya lo yoho yakandewoya lokumu l’ɔlɔlɔ, nɛ dia nde akate ate: ‘Kɛnɛ kamamemanyu aha la mbeya, tɔ mbanyewoyami.’ Yoho yakasambisha Paulo la ɔkɔmi tshɛ akatshutshuya anto amɔtshi waki lawɔ dia vɔ mbidja yimba lo losango la Diolelo ndo koma ambetawudi.—Etsha 17:23, 34.
5 Woho akɔ wâmɛ mbele, naka sho shishimaka kɛnɛ keta, kete dui sɔ diayotokimanyiya dia sho shihodia ehomba w’onto ndo mbɔtɔnganyiya mbɔtwɛlɔ kaso la ehomba ande. Kamba la ambola wakoka keketsha ompokami dia tɛkɛta. Kanyiya avɛsa wakoka kamba layɛ dia nomialomia nsaki kande. (Tuk. 20:5) Naka tayoshishimaka kɛnɛ keta ndo ndjasha la otema ɔtɔi le anto akina, kete dui sɔ diayotokimanyiya dia mbewoya lokumu l’ɔlɔlɔ la ɔkɔmi tshɛ.