Tetsha anto lo nkamba la biukubuku Lokumu l’ɔlɔlɔ

1. Ngande wakalɔngɔswama biukubuku Lokumu l’ɔlɔlɔ l’oma le Nzambi?

¹ Oko wakatakɛtshanya l’Olimu aso wa Diolelo wa Ngɔndɔ k’esambele, ehomɔ kɛmɔtshi k’ohomba katanema lo ɛngɔ kombaso dihomɔ dia mbetsha ekɔ biukubuku Lokumu l’ɔlɔlɔ l’oma le Nzambi! Hawodjisha ɛtɛkɛta wa lo avɛsa dia kele ampokami wangɛnɛngɛnɛ mbadia oma lo Bible twamɛ. Lam’ele ekanda aso efula wekaso l’anto wakafundama lo yoho yakoka ombadi mbeka lo ndamɛ, okanda ɔnɛ wakalɔngɔswama dia nkɛtshanya kaamɛ l’ombetsha. Ɔnkɔnɛ, etena kashaso onto okanda akɔ, sho pombaka nsala la wolo dia mbɛnya woho wekaso l’anto Bible dia nkimanyiya ompokami dia nde monga l’ɔngɛnɔngɛnɔ waya lo mbeya lokumu l’ɔlɔlɔ l’oma lo Bible.—Mat. 13:44.

2. Ngande wakokaso nkamba la biukubuku Lokumu l’ɔlɔlɔ mbala ka ntondo kasambishaso onto?

² Mbala ka ntondo kasambishaso onto: Wɛ koka mbotɛ ɔnɛ: “Lakaye lanɛ nɛ dia anto efula wekɔ lo ndjakiyanya lo dikambo dia nshi yayaye. Onde wɛ fɔnyaka dia awui wa kɔlɔ wayotetemala mfula? [Tshikande akadimole.] Bible kekɔ la lokumu l’ɔlɔlɔ lakoka tosha elongamelo. Bible kadimolaka lo ambola amɔtshi anɛ.” Sha ompokami biukubuku ndo lɔmbande dia nde nsɔna dimbola dimɔtshi diele lo lohoso l’ekomelo. Oma laasɔ, ɛnyande woho wekaso l’anto Bible lo nkamba la odingɔ wa ntondo wa lo wekelo akɔ. Yoho kina ele mboka ompokami dimbola diakotola yambalo yande lo wekelo wayoyɔsɔna ndo ɛnyande woho wakoka biukubuku nyɛ mbokimanyiya dia nde ntana ekadimwelo washa Bible. Naka wekelo akɔ mbɔtɔnɛka la vidɛo ya lo jw.org, kete apandjudi amɔtshi koka ndjiɛnya etena kasawolawɔ l’onto.

3. Lembetshiya woho wa nɔmbɔla wekelo wa Bible lo nkamba la biukubuku Lokumu l’ɔlɔlɔ.

³ Woho wa nɔmbɔla wekelo: 1) Adia lofulo la ambola wele l’alɛta w’edima dia nkimanyiya ompokami dia nde mbidja yimba lo dui di’ohomba. 2) Adia odingɔ wayela. 3) Adia avɛsa wakalashema ndo nkamba la ambola wa l’ɔkɔmi dia nkimanyiya ompokami dia nde mɛna woho wakadimola avɛsa lo ambola efula. 4) Naka odingɔ okina wekekɔ l’ɛse ka dimbola, kete kalolɛ dui 2 ndo 3. Naka vidɛo mbɔtɔnɛka la dimbola ndo naka wɛ atayiɛnya ompokami, kete nsala dui sɔ etena kakɛtshanyanyu. 5) L’ekomelo, lɔmba ompokami dia nde mbisha ekadimwelo lo lofulo la ambola dia ndjashikikɛ dia kana nde akoki.

4. Kakɔna kayotokimanyiya dia nkamba la ehomɔ ka nɛmɔ kɛnɛ lo yoho ya dimɛna?

⁴ Yaekesanyiya la ehomɔ ka nɛmɔ efula kɛnɛ. Kamba la tɔ lo diaaso tshɛ diakoka. La ntondo ka mbeka, nkana yimba lo dikambo di’ombeki ndo lo yoho ya dimɛna ya nkana yimba la nde lo avɛsa wele lo wekelo. (Tuk. 15:28; Ets. 17:2, 3) Etena katayaleke nkondja diewo ndo akoka, wɛ koka mbɔsa biukubuku nyɛ oko ehomɔ kalekayɛ nanga nkamba la tɔ dia mbetsha anto akambo wa mɛtɛ.