Toyaɛkɛ Le Jehowa Dia Nde ‘Mbodia’
1 “[Dimi lakoke] ɔlɔ mbala ka ntondo lam’akamasha lonya dia mbata etshumanelo k’oyoyo. Dikambo sɔ diakatɔsɛ ɛnɔnyi ndekana ehende w’olimu wa wolo, w’alɔmbɛlɔ ndo wa ndjaɛkɛ le Jehowa, nde ɔnɛ ‘lodia.’ ” Ɔsɔku mbakate ombatshi mboka ɔmɔtshi wakeye ohomba wa ndjaɛkɛ le Jehowa dia nde ‘mbodia.’ (1 Kor. 3:5-9) Lam’atatayange anto wayasha l’akambo wa lo nyuma, ndo sho lawɔ mongaka l’ohomba w’osukɔ wa Nzambi naka sho nangaka dia olimu aso ntɔ elowa.—Tuk. 3:5, 6.
2 Pombaka Monɛ: Dia ntɔngɔ y’akambo wa mɛtɛ mbola, yɔ pombaka monɛma. Membola onto l’ɔkɔngɔ a lushi ɔtɔi kana wa nshi hiende oma lam’akatasawola la nde mbala ka ntondo, tondjaka etombelo w’ɔlɔlɔ tena efula. Tonge l’osalosalo ndo l’elungi ka lɔngɛnyi. Tôlangiya lam’alangande. Tatɔtɛkɛtake shamɛ ato. Tôtshike diaaso dia nde ntêya ndo towɛnya ɔnɛ sho ndjashaka le nde.
3 Ngɔndɔ ka Divwa k’otondo, tayotetemala mbisha anto tobukubuku ta weho weho oko akatasale lo Ngɔndɔ k’Enanɛi. Koko, sho pombaka nto membola anto wakɛnya saki kana wakalongola biukubuku mɔtshi. Woho akɔna? Lo tshɔka atowaenda ndo lo mbâsɛngɔlaka dia mbeka la wɔ Bible. (Mat. 28:19, 20) Dia sala dikambo sɔ, sho kokaka kamba la biukubuku Katɔlɔmba ndo ndjakimanyiya la toho tɔnɛi tɔnɛ.
4 Naka wɛ akasawola l’onto layambola lɛnɛ atatshu andj’ɔnɛ, kete wɛ mbeyaka ndjotetemala la sawo ɔnkɔnɛ:
◼ “Dimi mbetawɔka dia ndo wɛ kayakiyanya oko dimi lo woho wambolana lɔkɛwɔ l’anto tshɛ. Tekɔ lo mboka nsango ya kɔlɔ y’akambo wa ngala l’atei a nkumbo; mbut’ate ana, ambutshi kana atshukanyi wekɔ lo pɛnyahɛnyama. Lo wedi okina, anto efula mɛnaka dia bu kɔlɔ mbuta kashi kana mbiva dia kotsha nsaki yawɔ hita. Oko le yɛ, onde kɛnɛ kasala anto la lɔsɛnɔ lawɔ ekɔ ohomba lo asho wa Nzambi? [Tshikande akadimule.] Nzambi akadje adjango amɔtshi dia onto mbayela, ndo adjango akɔ kema wolo nɛmiya.” Adia 1 Joani 5:3. L’ɔkɔngɔ ɛnyande biukubuku Katɔlɔmba ndo fola lo wekelo 10. Kotola yambalo yande lo ditshelo diofundami l’alɛta wa lolasha wele l’etatelo k’odingɔ 2 polo 6, ndo mbolande etshelo kakɔna kɛnande ɔnɛ tɔ koleki nanya anto. Adia odingɔ akɔ ndo divɛsa ɔtɔi kana ahende naka diaaso diekɔ. Dihiya la mbadia odingɔ 7 ko wɛ mbokana la nde dia nyu ndjosawola mbala kekina.
5 Wɛ kokaka mbutɛ wanɛ wayakiyanya lo dikambo dia nkumbo yawɔ wate:
◼ “Onde wɛ fɔnyaka dia sunganaka sho mendɛ le Otungi dia lɔsɛnɔ laso la nkumbo ngɔna?” Tshikande akadimule. Fola biukubuku Katɔlɔmba lo wekelo 8 ko wɛ mbolembetshiya ɔnɛ awui w’oma lo Bible wendana l’ose nkumbo tshɛ fundama lɔkɔ. Ɛnyande woho wakambawɔ la biukubuku yakɔ kamɛ la Bible dia kondja wahɔ efula oma lɔkɔ. Yela alako wele lo lɛkɛ 2. Ɔsa tɛdikɔ dia wɛ kalola la ndjoshidiya wekelo akɔ kana, naka nyakashidiyisha wekelo akɔ, ko ndjeka wekelo okina wayondɔsɔna.
6 Yoho ya tshena pe nyɛ ya sɛngɔla onto dia mbeka la nde Bible. Ɛnyande biukubuku “Katɔlɔmba” ko wɛ mbuta wate:
◼ “Biukubuku nyɛ nembetshiyaka wetshelo w’ohomba efula wele lo Bible. Lo lɛkɛ tshɛ la dikatshi, wɛ ayotana okadimwelo lo wembola watshindja anto yimba oma ko deko ko deko. Ɛnyɛlɔ: Kakɔna kasangoya Nzambi sala lo dikambo dia nkɛtɛ na?” Fola lo wekelo 5 ko wɛ mbadia wembola wele l’etatelo. Mbolande wɔnɛ waleka kotola yambalo yande, ko wɛ mbadia odingɔ (kana edingɔ) wɔtɔnɛ la wombola akɔ kâmɛ ndo avɛsa wasungana. Lembetshiyande ɔnɛ nde kokaka tana ekadimwelo ekina esadi eto woho wotanyinyu wa ntondo. Lɔmbande dia wɛ ndjowenda nto dia nyu ndjɔsɛdingola dimbola dikina.
7 Ondo wɛ ayoleka nanga yoho nyɛ ya wɔdu efula dia tatɛ mbeka l’onto Bible:
◼ “Onde wɛ mbeyaka dia lo taahe tongana toto wɛ kokaka kondja okadimwelo lo dimbola dimɔtshi di’ohomba efula diele lo Bible? Ɛnyɛlɔ. . . “ Ta dimbola dimɔtshi diele l’etatelo ka wekelo ɔmɔtshi wa lo biukubuku, dimbola diɛnayɛ ɔnɛ onto akɔ ndjambolakadiɔ. Dia wɛ monga la tokanyi ta wembola akɔ, enda l’odingɔ 15 la 16 lo dikatshi di’okotsha di’Olimu Aso wa Diolelo wa Ngɔndɔ ka Nɛi 1997 l’ɔtɛ a dui w’ɔnɛ: “Tokeketale dia Sala Waendelo w’Eyoyo.”
8 Shidiya tɔfwɛfwɛ l’ɔngɛnɔngɛnɔ, tɔfwɛfwɛ tendana la sala waendelo w’eyoyo ndo mbeka l’anto Bible ekɔ lotumu lɔmɔtshi lakamba wanɛ wele “ekambi kame” la Nzambi. (1 Kor. 3:9) Ɔnkɔnɛ, tosalake tshɛ dia monɛ saki, ko sho ndjoyaɛkɛ le Nzambi dia nde ‘mbodia.’ Naka tayosala ɔsɔku, kete tayokondja ɔngɛnɔngɛnɔ wa mɛtɛ wahatakondjaki oma l’olimu okina pondjo.