Eolwelo​—kayonga diɛsɛ l’oshinga w’etshungwelo

Eohwelo ka nyɔi ka Yeso toshaka diaaso dia dimɛna dia nkana yimba lo ɛtshɔkɔ wayonga laso lo nshi yayaye diɛsɛ l’oshinga w’etshungwelo, ɛnyɛlɔ eolwelo ekɔ diɛsɛ dimɔtshi l’atei wa waɛsɛ asɔ. Jehowa kokongɛ pondjo di’anto mvɔka. Diakɔ diele, kandji kaleka monga l’anto ele lɔkɔnyɔ la nyɔi ka lakiwɔ la ngandji. (1Kɔ 15:26) Yeso akandama la kandji lam’akandɛnyi ambeki ande walela Lazaro. (Jni 11:33-35) Lam’ele Yeso kɛnɛmɔlaka lonto la She lo yoho ya kokele, sho koka monga l’eshikikelo k’ɔnɛ Jehowa nde lawɔ mongaka la kandji etena katɛnande la lɔkɔnyɔ lam’avushaso wakiso wa ngandji. (Jni 14:7) Jehowa nomɔlomɔka dia mɛna etena kayondolola ekambi wakinde wa kɔlamelo oma lo nyɔi ndo sho lawɔ mbalomɔlomɔ dia mɛna dikambo sɔ.​—Jb 14:14, 15.

Lam’ele Jehowa ekɔ Nzambi kadja awui l’ɛnɔngɔ, keema kɔlɔ sho mbetawɔ dia eolwelo kayosalema lo yoho yaha l’ofukutanu. (1Kɔ 14:33, 40) Lo dihole dia nsala etanda, ɔsɔ ayonga etena ka nongola anto wayolwama. Onde wɛ kanaka yimba lo dikambo dia eolwelo, djekoleko etena keyɛ la lɔkɔnyɔ? (2Kɔ 4:17, 18) Onde wɛ mbishaka Jehowa losaka lo woho wakandakimɔ oshinga w’etshungwelo ndo lo woho watosholɛnde l’Afundelo di’anto wakavu wayɔsɛna nto?​—Kɔl 3:15.

• Naa angɛnyi ayɛ kana ewotɔ ayɛ walekayɛ nkombola dia ndjɛnana lawɔ nto?

• Naa anto amɔtshi watɛkɛtama lo Bible walekayɛ nkombola dia ndjɛnana lawɔ ndo ndjosawola lawɔ?