Elongamelo ka eolwelo alembetshiyatɔ le yɛ?

‘Wɛ ayokukola lonya layɛ, ko ayokotsha nsaki ka ɛngɔ tshɛ kele la lɔsɛnɔ.’​—OSAMBU 145:16.

1-3. Elongamelo kakɔna kendana la nshi yayaye kaki la anto amɔtshi? Sha ɛnyɛlɔ.

CHRISTOPHER, Ɔmɛnyi wa Jehowa ɔmɔtshi waki la ɛnɔnyi divwa kâmɛ la enondo ande la pami waketsha pindju k’otondo l’olimu w’esambishelo ka lo luudu la luudu vɔ la nyangɛwɔ nkadi ndo nyangɛwɔ pami kâmɛ la ɔna nyangɛwɔ nkadi ndo ɔna nyangɛwɔ pami, suke l’osomba wa Manchester lo wodja wa Angleterre. Réveillez-vous! nembetshiyaka kɛnɛ kakâkomɛ. “L’ɔkɔngɔ a midi, vɔ tshɛ wakatshu dia tenda Blackpool, dihole dimɔtshi dia l’omamu wa ndjale diakalɔngɔswama dimɛna efula dikambo dia anto tshɛ, djekoleko dia wanɛ walanga tetsha tovakashi tawɔ lɛkɔ. Vɔ akɔ 6 waki l’atei w’anto 12 wakadiakema la shashimoya lo aksida ɔmɔtshi wa lo mboka wakelɛ apulushi ɔnɛ: Elanyelo kakashile anto oshiki.”

² La dikɔlɔ dia la ntondo ka mpokoso kɛsɔ, nkumbo kawɔ kakɔtɔ lo Wekelo wa dibuku wa l’etshumanelo, ndo lo wekelo akɔ wakakɛtshanya dikambo dia nyɔi. She ekɔ lo kɔndɔla ate: “Chistopher aki yana yakakanaka yimba dimɛna efula. La dikɔlɔ sɔ, nde akatɛkɛta hwe dikambo dia andja w’oyoyo ndo dia elongamelo kande kendana la nshi yayaye. Oma lâsɔ, lam’akatatetemalaka ɔkɛtshanyelo aso, Christopher akate la shashimoya ate: ‘Kɛnɛ kele ɔlɔlɔ monga Ɔmɛnyi wa Jehowa ele, naka nyɔi ambotokakitola sho mbeyaka shate tayoyɛnana lushi lokina la nkɛtɛ.’ Sho wanɛ wakahokamɛ ɛtɛkɛta ɛsɔ kɔfɔnyaka dia vɔ wayotshikala edja lo timba taso.”a

³ Ɛnɔnyi ɛmɔtshi la ntondo, lo 1940, Franz Ɔmɛnyi ɔmɔtshi wa lo wodja wa Autriche, akeye dia nde akahombe pembɔma ɔtɛ la mashinyi ɔmɔtshi l’ɔtɛ wakandatone shisha kɔlamelo yande le Jehowa. Franz akafundɛ nyango mukanda oma lɛnɛ akinde lo lokanu lɔmɔtshi la lo osomba wa Berlin ate: “Lo menda ewo kele lami, otomotshiba dia monga [ɔsɔlayi], tshike lotosala pɛkato kakoka onto ndjodiakema. Lotosala kɔlɔ ka mamba ndo totomonga la elongemelo ka eolwelo. . . . Kakianɛ, mama kami ka ngandji ndo anangɛmi la akadiyɛmi tshɛ, tanyokake wɔma, koko nyeye dia ɛlɔ wakambute dia dimi pombaka ndjakema, ndo layodiakema loyi la pindju. Jehowa ekɔ lo mbishami wolo wele lami ohomba, wolo wakandashaka Akristo wa mɛtɛ wa lo nshi y’edjedja. . . . Naka nyu tshikala la kɔlamelo polo lo nyɔi, kete tayoyɛnana lo eolwelo. . . . Polo lam’ayotoyɛnana nto.”b

4. Shɛngiya yakɔna yele la awui wɔkɔndwami lanɛ le yɛ, ndo kakɔna kayangaso sɛdingola?

⁴ Elongamelo ka eolwelo kaki la nɛmɔ di’efula le Christopher nde la Franz. Tɔ kaki mɛtɛ le wɔ. Lo mɛtɛ, ɛkɔndɔ ɛsɔ minandaka etema aso! Dia sho nyomoleka monga la lowando le Jehowa ndo dia keketsha elongamelo kaso lo eolwelo, nyɛsɔ tɔsɛdingole lande na kahomba eolwelo monga ndo woho wahomba dikambo sɔ monga la shɛngiya le so lo onto ndo l’onto.

Ɛnɛlɔ ka eolwelo ka la nkɛtɛ

5, 6. Kakɔna kɛnya ɛnɛlɔ kakɛnyi ɔpɔstɔlɔ Joani kele lo Enyelo 20:12, 13?

⁵ Lo ɛnɛlɔ kendana la awui wayosalema lo Diolelo di’ɛnɔnyi kinunu diaki Yeso Kristo, ɔpɔstɔlɔ Joani akɛnyi eolwelo ka la nkɛtɛ kasalema. Nde akate ate: “Dimi lakenyi antu wakavu, wa waki ndu wa tshitshe. Ashi a waki wakatundja edu waki loko, ndu nyoi la [“Hadɛsɛ,” NW] wakatundja edu waki loko.” (Enyelo 20:12, 13) Oyadi dihole diakɔna diele lawɔ, mbuta ate anto a “waki” kana wa “tshitshe,” wanɛ tshɛ wakandama oko fumbe lo Hadɛsɛ (Sheɔlɛ), diombo dia anto tshɛ wayotshungwama. Wanɛ wakashisha nsɛnɔ yawɔ lo ashi a wake wayonga nto la lɔsɛnɔ etena kɛsɔ. Dikambo sɔ dia diambo diekɔ etenyi kɛmɔtshi ka sangwelo dia Jehowa.

⁶ Lam’ayotatɛ Diolelo dia Kristo di’ɛnɔnyi kinunu, nde ayokeleka Satana ndo ayowodja lo difuku diaha la ekomelo. Ndoko onto l’atei a wanɛ wayolɔ kana wayohandɔ oma lo fɔnu ka woke layonganyiyama oma le Satana l’edja ka lowandji lɔsɔ, nɛ dia nde hosala ndoko dikambo. (Enyelo 20:1-3) Wɛ mbeyaka mbɔsa ɛnɔnyi kinunu oko etena k’otale efula, koko lo washo wa Jehowa vɔ wekɔ “uku lushi otoi.”​—2 Petero 3:8.

7. Lo Diolelo dia Kristo di’ɛnɔnyi kinunu onto ayolomboyama lo ndjela na?

⁷ Lo ndjela ɛnɛlɔ kɛsɔ, Diolelo dia Kristo di’ɛnɔnyi kinunu diayonga etena ka elomboyelo. Ɔpɔstɔlɔ Joani akafunde ate: “Dimi lakenyi antu wakavu, wa waki ndu wa tshitshe, wemadi la ntundu ka kiti ka diulelu; wakafula abuku. Ku wakafula buku dikina, diaki buku dia lumu. Wakalumbuya antu wakavu uma l’akambu wakafundama lu abuku, uku waki etsha awo. . . . Wakalumbuya untu l’untu uku aki etsha andi.” (Enyelo 20:12, 13) Tolembete dia onto hatolomboyama lo ndjela kɛnɛ kakandasalaka kana kakinde kosala la ntondo ka nyɔi kande. (Romo 6:7) Koko, tɔ mendanaka la “abuku” wayotofwama. Etsha w’onto l’ɔkɔngɔ wa nde mbeka awui wofundami lo abuku mbayoshikikɛ dia kana lokombo lande fundama lo “buku dia lumu.”

“Eulwelu ka lumu” kana ka “elumbwelu”

8. Akambo akɔna ahende wakoka komɛ wanɛ wayolɔ?

⁸ La ntondo lo ɛnɛlɔ kaki Joani, Yeso kɔndɔma oko onto lele la “sapi ya nyoi ndu ya [“Hadɛsɛ,” NW].” (Enyelo 1:18) Nde ekɔ lo kamba oko “Uwandji a lumu,” waki Jehowa, wakalongola wolo wa nomboya “wasena ndu wakavu.” (Etsha 3:15; 2 Timote 4:1) Ngande wayondosala dikambo sɔ? Lo mbolola wanɛ woladi djɔ lo nyɔi. Yeso akatɛ elui w’anto wakandasambishaka ate: “Tanyambaki dia dikambu so, ne dia etena ka[y]ukuka, kayuka wane weli lu waumbu tshe [“wa eohwelo,” NW] diui diandi, ku vo wayutumba.” Nde akakotsha ate: “Wane wakatshaka ololo, wayulo lu eulwelu ka lumu. Ku wane wakatshaka kolo, wayulo l’elumbwelu.” (Joani 5:28-30) Lâsɔ, nshi yayaye ya ngande yakongɛ apami ndo wamato wa kɔlamelo waya esombe?

9. a) Etena kayowolɔ kakɔna kayeka anto efula aha la tâmu? b) Olimu akɔna a woke wa wetshelo wayokambema?

⁹ Lam’ayolɔ anto asɔ wa kɔlamelo w’edjedja, vɔ wayɛna dia alaka wakiwɔ la mbetawɔ lɔkɔ wambokotshama. Ande ɔlɔ wayonga lawɔ dia mbeya ɔnɛ lele Kanula ya womoto la Nzambi, yɔtɛkɛtami lo prɔfɛsiya ka ntondo ka lo Bible, lo Etatelu 3:15 lee! Ande ɔngɛnɔngɛnɔ wayonga lawɔ dia mbeya dia Yeso, Mɛsiya wakalakema akatshikala la kɔlamelo polo lo nyɔi, lo kimɔ lɔsɛnɔ lande oko olambo wa tshungo lee! (Mateu 20:28) Wanɛ wayowalongola lo lɔsɛnɔ wayonga la ɔngɛnɔngɛnɔ wa mamba dia mbakimanyiya dia vɔ shihodia dia tshungo ekɔ djembetelo ya lɔsɛngɔ ndo ya kɛtshi ka mamba kaki Jehowa. Etena kayɛna wanɛ wayolɔ kɛnɛ kasala Diolelo diaki Nzambi dia kotsha sangwelo dia Jehowa diendana la nkɛtɛ, aha la tâmu etema awɔ wayolola tɔɔ la ɛtɛkɛta wa lotombo otsha le Jehowa. Vɔ wayonga la waaso efula wa mɛnya kɔlamelo yawɔ le Shɛwɔ ka ngandji lele l’olongo ndo le Ɔnande. Anto tshɛ wayonga la lɔsɛnɔ lo etena kɛsɔ wayɔngɛnangɛna dia kamba olimu a woke wa wetshelo wa mbetsha miliyara y’anto wayolɔ oma lo waombo, yele ndo vɔ wayonga nto la ohomba wa mbetawɔ yɛdikɔ yakɔshi Nzambi yendana la tshungo.

10, 11. a) Waaso akɔna wayonga la anto tshɛ wa la nkɛtɛ l’edja k’Ɛnɔnyi kinunu? b) Shɛngiya yakɔna yahomba dikambo sɔ monga layɔ le so?

¹⁰ Etena kayolɔ Abarahama, nde ayokeketshama heyama dia monga la lɔsɛnɔ la oshika lo lowandji la “usumba” wakandalongamɛka. (Heberu 11:10) Jɔbɔ lakasɛnaka lo nshi y’edjedja la kɔlamelo ayɔngɛnangɛna efula lam’ayondeya dia yoho yande ya lɔsɛnɔ yakakeketsha ekambi wa Jehowa efula wakahomana la ehemba wendana la olowanyi awɔ! Danyɛlɛ nde lawɔ ayonga la mposa k’efula ka mbeya ekotshamelo ka prɔfɛsiya yakandasambiyama dia funda!

¹¹ Lo mɛtɛ, wanɛ tshɛ wayonga la lɔsɛnɔ lo andja w’oyoyo wa losembwe, oyadi oma lo eolwelo kana lo pandɔ lo fɔnu ka woke, wayonga la awui efula wa mbeka lo kɛnɛ kendana la sangwelo dia Jehowa lo dikambo dia nkɛtɛ ndo dia wanɛ wodjashi lɔkɔ. Elongamelo ka nsɛna pondjo pondjo ndo ka tombolaka Jehowa lo pondjo ayetɛ ekongelo ka wetshelo k’Ɛnɔnyi kinunu dikambo di’ɔngɛnɔngɛnɔ wa mɛtɛ. Koko kɛnɛ kayotosala la awui wayoteka oma lo abuku mbayonga ohomba efula le so lo onto ndo l’onto. Onde tayotokamba la kɛnɛ kayototeka? Onde tayotokanaka yimba la awui akɔ ndo kamba la wetshelo w’ohomba wayotokeketsha dia sho shika tanga lo ohemba w’ekomelo waki Satana wa tonganyiya oma lo akambo wa mɛtɛ?

12. Kakɔna kayokimanyiya onto la onto dia ndjasha tshɛ lo olimu wa wetshelo ndo wa kadimola nkɛtɛ paradiso?

¹² Hatohombe mbohɛ pondjo ɛtshɔkɔ wa diambo w’oma lo ɛlɔlɔ w’olambo wa Kristo wa tshungo. Anto wayolɔ hawotonga la weho wa dikɔmɔ diele lo lɔsɛnɔ la nshi nyɛ. (Isaya 33:24) Yonge ya demba ya dimɛna ndo elongamelo ka monga la yonge ya kokele ayokimanyiya wanɛ tshɛ wayodjasɛ lo andja w’oyoyo dia vɔ ndjasha tshɛ l’olimu wa mbetsha miliyara y’anto wayolɔ mboka ka lɔsɛnɔ. Anto asɔ wayoyasha nto l’olimu woleki woke wayosalema dia kadimola nkɛtɛ k’otondo paradiso dikambo dia lotombo la Jehowa.

13, 14. Lande na kayotshungwama Satana l’ohemba wa komelo, ndo dikambo sɔ koka monga la etombelo akɔna le ɔmɔmɔ la l’atei aso?

¹³ Etena kayotshungwama Satana oma lo difuku diaha la ekomelo dia ndjohemba anto mbala k’ekomelo, nde ayoyanga dia munganyiya anto nto. Lo ndjela Enyelo 20:7-9, ‘wedja tshɛ wayokesama,’ kana elui w’anto wayɔkɔ lo tɔsɛngiya ta kɔlɔ taki Satana wayokoka mɛtɛ nanyema, mbuta ate ‘dja yayoholɔ oma l’olongo ko mbâtshumba.’ L’atei awɔ, wanɛ wakôlɔ lo Ɛnɔnyi kinunu, elanyelo kɛsɔ kayetɛ eolwelo kawɔ eolwelo ka elomboyelo. Koko, wanɛ wayolɔ ko vɔ nama olowanyi awɔ wayolongola woshasha wa lɔsɛnɔ la pondjo. Lo mɛtɛ, eolwelo kawɔ kayonga “eulwelu ka lumu.”​—Joani 5:29.

¹⁴ Ngande wakoka elongamelo ka eolwelo tokeketsha kânga kakianɛ? Ko kakɔna kahombaso sala dia sho ndjashikikɛ dia tayolongola ɛtshɔkɔ atɔ lo nshi yayaye?

Wetshelo wakokaso kondja ɛlɔ kɛnɛ

15. Ngande wakoka dietawɔ lo eolwelo tokimanyiya ɛlɔ kɛnɛ?

¹⁵ Ondo wɛ eke ka mvusha onto ɔmɔtshi lalangayɛ efula ndo ondo wɛ ekɔ lo sala la wolo dia ndjaekesanyiya la lɔsɛnɔ l’ɔkɔngɔ wa oshishelo wa woke wa ngasɔ. Elongamelo ka eolwelo kokimanyiyaka dia monga la wɔladi wa l’etei k’otema ndo wolo wele bu la wanɛ waheye akambo wa mɛtɛ. Paulo akakeketsha ase Tɛsalɔnika ate: “Shu nangaka nyu mbeya dikambo dia wane wakavu, diaha nyu ndjala la lunyangu uku akina, wane waha la elungamelu.” (1 Tesalonika 4:13) Onde wɛ ndjaɛnaka wɛmɛ lo andja w’oyoyo ɛna woho wôlɔ anto? Naka ɔsɔku, kete wɛ kokaka kondja ekeketshelo kakianɛ lo kana yimba lo elongamelo kele layɛ ka tonga nto kâmɛ la wakiyɛ wa ngandji.

16. Ngande wayoyaoka ondo etena kayonga eolwelo?

¹⁶ Mbeyaka monga ko wɛ ekɔ lo sowa la etombelo wa kɔlɔ w’oma lo ɔtɔmbɔkwɛlɔ wa Adama, ondo la hemɔ kɛmɔtshi. Tetawɔke dia pâ kakosha hemɔ kɛsɔ kokonya dia wɛ mbohɛ elongamelo ka ɔngɛnɔngɛnɔ ka wɛ ndjolɔ ndo ndjonga nto la lɔsɛnɔ la yonge y’oyoyo ndo la demba dia wolo lo andja w’oyoyo. Lâsɔ etena kayodihɔ washo ayɛ ndo kayoyɛna dungi dia ɛmɔnɔmɔnɔ diele la mposa ka wolo ka ngɛnangɛna kâmɛ la yɛ etena kayoyolɔ, wɛ ayosha Nzambi losaka l’ɔtɛ wa ngandji kande ka lɔsɛngɔ.

17, 18. Naa wetshelo ehende wahombaso mbohɔka?

¹⁷ Lo etena kâkatakongɛ, tende wetshelo ehende wahombaso mbohɔka. Wetshelo ɔmɔtshi ko, ohomba wa kambɛ Jehowa olimu la anima aso tshɛ oma ko kakianɛ. Etena kokoyaso ɛnyɛlɔ ka Owandji aso, Yeso Kristo, lɔsɛnɔ laso la ndjahombia mɛnyaka ngandji kokaso Jehowa ndo asekaso anto. Naka ɔlɔshamelo kana ɛhɛnyɔhɛnyɔ wambotoshishɛ olimu aso kana lotshungɔ laso, kete sho pombaka ndjaketembolaka dia tshikala nge lo mbetawɔ oyadi ehemba akɔna wayotokomɛ. Naka mɛnamaka di’oko atunyi wayotokonya lo nyɔi, kete lâsɔ elongamelo ka eolwelo kayotosamba ndo kayotokeketsha dia sho tshikala la kɔlamelo le Jehowa ndo lo Diolelo diande. Eelo, ohetoheto aso lo olimu wa esambishelo ka Diolelo ndo wa mbetɛ anto ambeki toshaka elongamelo ka ndjokondja ɛtshɔkɔ wa pondjo wambombɛ Jehowa akanga a losembwe.

¹⁸ Wetshelo wa hende mendanaka la woho watokomɛso ehemba woye oma lo woho weso bu kokele. Ewo kaso ka elongamelo ka eolwelo ndo lowando laso lo lɔsɛngɔ la mamba la Jehowa keketshaka yɛdikɔ yaso ya tshikala nge lo mbetawɔ. Ɔpɔstɔlɔ Joani akasha ɔhɛmwɛlɔ ɔnɛ ate: “Tanyulangaki akambu wa la kete kuyanga diango dia la kete. Naka untu alanga akambu wa la kete, ku ngandji ka Shesu kema l’utema andi. Ne dia akambu wa la kete, saki ka dimba, ndu saki ka ashu, ndu utaku a lumu, vo waha uma le Shesu, keli weko uma la kete. Akambu wa la kete la saki yawo wayushila. Keli one latutshaka lulangu la [Nzambi], atuyalaka pundju.” (1 Joani 2:15-17) Hatotokutwama efula lo lomombo la l’andja ɔnɛ naka sho mbɛdika lomombo lakɔ la ‘lɔsɛnɔ la mɛtɛ.’ (1 Timote 6:17-19) Naka tambohembama dia sala awui wa mindo, kete tayoshika tanga la wolo tshɛ. Sho mbeyaka dia naka tambovɔ la ntondo ka Aramangɛdɔna, kete yoho ya lɔsɛnɔ yahangɛnyangɛnya Jehowa kokaka tokonya dia sho monga woho wamɛ la anto wele bu la elongamelo ka eolwelo.

19. Diɛsɛ diakɔna dia woke diahatahombe mbohɛ?

¹⁹ Lâdiko dia tshɛ, hatohombe mbohɛ diɛsɛ dia woke dia ngɛnyangɛnyaka otema wa Jehowa oma ko kakianɛ ndo pondjo pondjo. (Tukedi 27:11) Kɔlamelo yaso polo lo nyɔi ndo woho wayotolama olowanyi aso polo l’ekomelo ka dikongɛ nɛ dia kɔlɔ dia akambo mɛnyaka Jehowa dia sho tekɔ lo wedi ande lo dikambo diendana la lowandji la andja w’otondo. Lâsɔ, ayonga mɛtɛ ɔngɛnɔngɛnɔ efula nsɛna lo Paradiso ka la nkɛtɛ oyadi lo pandɔ lo fɔnu ka woke kana lo mbolwama lo yoho ya dihindo!

Ayokotsha nsaki yaso

20, 21. Kakɔna kayotokimanyiya dia sho tshikala la kɔlamelo kânga naka tekɔ la ambola ɛmɔtshi wele bu la ekadimwelo lo kɛnɛ kendana la eolwelo? Lembetshiya.

²⁰ Ɔkɛtshanyelo aso wendana la eolwelo hasha okadimwelo lo ambola aso tshɛ. Ngande wayɔlɔngɔsɔla Jehowa akambo lo kɛnɛ kendana la wanɛ wakatatshuki kana wakatatshukamaki ntondo ka vɔ mvɔ? (Luka 20:34, 35) Onde anto wayolɔ lo ahole anɛ wakawavu? Onde wanɛ wayolɔ, wayolɔ suke la nkumbo yawɔ? Ambola akina efula wendana la eolwelo hawokadimwami. Koko, sho pombaka nama lo yimba ɛtɛkɛta ɛnɛ waki Jeremiya wata ɔnɛ: “Jehowa] atutshelaka wane watukungelaka ololo, ndu one latûyangaka. Ololo untu nungamela, la nkunga panda ka [Jehowa].” (Delu dia Jeremiya 3:25, 26) Lo etena kakashikikɛ Jehowa, ambola aso tshɛ wayokadimwama dia kotsha nsaki yaso. Lande na kahombaso monga la eshikikelo lo dikambo sɔ na?

²¹ Kana yimba lo osambo wakasambiyama waki omembi w’esambo lakembɛ Jehowa ate: ‘Wɛ ayokukola lonya layɛ ko wɛ ayokotsha nsaki ka ɛngɔ tshɛ kele la lɔsɛnɔ.’ (Osambu 145:16) Etena katatole, nsaki yaso tatshikitanaka. Kɛnɛ kakatalongamɛka teke ana w’akɛnda kema nsaki yaso ɛlɔ kɛnɛ. Akambo wambotokomɛ ndo walongamɛso mongaka la shɛngiya lo woho wɔsaso lɔsɛnɔ. Koko, oyadi nsaki y’ɛlɔlɔ yayototonga layɔ lo andja w’oyoyo, Jehowa ayototokotshɛ yɔ.

22. Lande na keso la ɔkɔkɔ w’oshika wa tombolaka Jehowa?

²² Kɛnɛ kele ohomba le onto tshɛ la l’atei aso ɛlɔ kɛnɛ ele monga la kɔlamelo. “Li alami, dieli la untu l’untu dia ndjala la kolamelu.” (1 Koreto 4:2) Tekɔ alami wa lokumu l’ɔlɔlɔ la Diolelo diaki Nzambi. Etete kaso lo sambisha lokumu lɔsɔ l’ɔlɔlɔ le anto tshɛ wahomana la so tokimanyiyaka dia tetemala lo mboka katɔla otsha lo lɔsɛnɔ. Tohɔke nshi tshɛ dia “tena ndo akambo wa shashimoya” tokomɛka sho tshɛ. (Undaki 9:11, NW) Dia tondoya ekiyanu tshɛ w’oma lo akambo wa shashimoya wa lo lɔsɛnɔ, paka wɛ kukutɛ elongamelo ka diambo ka eolwelo la wolo. Yashikikɛ dia naka wɛ ambovɔ la ntondo k’etatelo ka Diolelo dia Kristo di’Ɛnɔnyi kinunu, kete wɛ kokaka kondja esambelo l’eshikikelo ɔnɛ etshungwelo kayoya. Lo etena kakashikikɛ Jehowa wɛ ayonga la akoka wa nyomota ɛtɛkɛta waki Jɔbɔ wata ɔnɛ: “We ayumbeta, ku dimi layuketawo.” Jehowa mbakoka nongola lotombo tshɛ, nɛ dia nde mbakombola mbolola wanɛ wohɔnde lo yimba yande!​—Jobo 14:15.

[Nɔtɛ ya l’ɛse ka dikatshi]

Onde wɛ âkohɔ?

• Lo ndjela akambo akɔna wayolomboyama anto lo Ɛnɔnyi kinunu?

• Lande na kele amɔtshi wayolɔ lo “eulwelu ka lumu” ndo akina ka “elumbwelu”?

• Ngande wakoka elongamelo ka eolwelo tokeketsha ɛlɔ kɛnɛ?

• Ngande watokimanyiya ɛtɛkɛta wa lo Osambu 145:16 dia sho mbeya kɛnɛ kasala la ntondo ka ambola wendana la eolwelo wele hawokadimwami?

[Esato wa lo lɛkɛ 27]

Ngande watokimanyiya mbetawɔ lo eolwelo ɛlɔ kɛnɛ?