Rɛferansɛ wa lo Dikatshi dia losanganya la Lɔsɛnɔ ndo olimu aso
NGƆNDƆ KA DIKUMI L’ƆTƆI 5-11
AKAMBO W’OHOMBA W’OMA L’ƆTƐKƐTA WA NZAMBI | JOANI 20-21
“Onde wɛ mbokakami ngandji oleki diangɔ nɛ?”
nwtsty, nɔtɛ ya wekelo ya lo Joani 21:15, 17
Yeso akambola Simɔna Petero ate: Sawo dia lam’asa Yeso la Petero sɔ, diakete yema tshitshɛ l’ɔkɔngɔ wa nde manguna Yeso mbala shato. Yeso akoke Petero ambola asato dia mbeya woho wakandawokaka ngandji, ko “Petero akanyange.” (Jni 21:17) L’ɔkɔndɔ wa Joani wofundami lo Joani 21:15-17, Yeso akambola Petero ate: “Onde wɛ mbokakami ngandji” ndo mbala yakɔ shato nto, Petero akashikikɛ l’otema ɔtɔi dia nde akokaka Yeso “ngandji.” Mbala yakɔ tshɛ, Petero aketawɔka dia nde akokaka Yeso ngandji, Yeso akatɔtɔmiya dia ngandji kɛsɔ kakahombe ntshutshuya Petero dia ndesha ndo ‘namaka’ ambeki wa Yeso lo nyuma, mbuta ate ɛkɔkɔ ande wa “totshitshɛ.” (Jni 21:16, 17; 1Pe 5:1-3) Yeso aketawɔ dia Petero nshikikɛ ngandji kɛsɔ mbala shato ndo oma laasɔ, nde akayowosha ɔkɛndɛ wa nkokɛ ɛkɔkɔ. Lo yoho shɔ mbakanya Yeso taamu tshɛ taki la Petero tɛnya di’ɔnɛ nde akodimanyiya lo woho wakandawanguna mbala shato.
onde wɛ mbokakami ngandji oleki diangɔ nɛ?: Lo ndjela Gramatika, etelo k’ɔnɛ “oleki diangɔ nɛ” kokaka mbokɛma lo toho efula. Nomb’ewo mɔtshi mbutaka dia dui sɔ nembetshiyaka ɔnɛ “onde wɛ mbokakami ngandji oleki woho wokayɛ ambeki akina anɛ?” kana “onde wɛ mbokakami ngandji oleki woho wamboka ambeki anɛ?” Koko, ondo etelo kɛsɔ nembetshiyaka ɔnɛ “onde wɛ mbokakami ngandji oleki diangɔ nɛ,” mbuta ate nse yakawandaka kana awui wendana la olimu wa wondelo wa nse. Ondo kanyi ya lo divɛsa nɛ ele: ‘Onde wɛ mbokakami ngandji oleki oweso wa diangɔ dia l’emunyi? Naka ngasɔ, leshaka ɛkɔkɔ ami wa totshitshɛ.’ Ondo dimbola sɔ diakendanaka la woho wakasale Petero akambo lo nshi yakete. Kaanga mbaki Petero ɔmɔtshi l’atei w’ambeki wa ntondo wa Yeso, (Jni 1:35-42), nde kondjela Yeso mbala kakɔ ɔtɔi lo pondjo. Koko, nde akayokalola l’olimu ande wa munda nse. Ngɔndɔ ngana oma laasɔ, Yeso akelɛ Petero dia nde ntshika olimu w’ohomba ɔsɔ l’oyango wa nde monga ‘omundji w’anto.’ (Mat 4:18-20; Luka 5:1-11) Ndo nto, l’ɔkɔngɔ wa nyɔi ka Yeso, Petero akakalola l’olimu ande wa munda nse ndo apɔstɔlɔ akina wakoyele. (Jni 21:2, 3) Ɔnkɔnɛ, mɛnamaka di’ondo Yeso ekɔ lo mɛnya Petero ohomba wa mbɔsa yɛdikɔ y’ohomba nyɛ: Onde nde akahombe mbetsha olimu wa munda nse lo dihole dia ntondo lo lɔsɛnɔ lande, mbuta ate tota dia nse diaki la ntondo kawɔ kana nde akahombe mbetsha olimu wa ndeshaka ɛkɔkɔ wa Yeso wa totshitshɛ lo nyuma, mbuta ate ambeki ande?—Jni 21:4-8.
mbala ka sato: Petero akanguna Nkumɛnde mbala shato, wony’ɔnɛ Yeso ambosha Petero diaaso dia nde nshikikɛ ngandji kakandawokaka mbala shato. Lam’akasale Petero dui sɔ, Yeso akawotɛ dia nde mɛnya ngandji kɛsɔ lo mbetsha olimu w’ekila la ntondo ka diangɔ dikina tshɛ. Kaamɛ l’anango akina waki l’ɛkɛndɛ, Petero akahombe ndesha, nkeketsha ndo nama ɛkɔkɔ, mbuta ate ambeki wa kɔlamelo wa Kristo. Vɔ waki akitami w’esɔ, koko waki l’ohomba wa ntetemala ndeshama lo nyuma.—Luka 22:32.
Toyange diangɔ di’oshinga wolo dia lo nyuma
nwtsty, nɔtɛ ka wekelo ka lo Joani 20:17
Tokumbatɛke: Ondo vɛrbɛ ya lo Grɛkɛ ya haʹpto·mai kokaka nembetshiya “minanda” kana “nkumbatɛ; nkukutɛ.” Dikadimwelo dimɔtshi kadimolaka ɛtɛkɛta wa Yeso ɛsɔ ɔnɛ: “Tominandake.” Koko, Yeso koshimba Mariya w’ose Mangadala dia nde mbonanda ntsho nɛ dia nde koshimba wamato akina wakawɛnyi l’ɔkɔngɔ wa nde mbolɔ dia “[mbo]kimɛ l’ekolo.” (Mat 28:9) Ondo Mariya w’ose Mangadala akoke wɔma ɔnɛ Yeso olanga mbidɛ otsha l’olongo. Lam’ele nde aki la nsaki k’efula ka monga kaamɛ la Nkumɛnde, Mariya akasamanya dia nkumbatɛ Yeso dia mboshimba diaha nde ntshɔ. Dia mboshikikɛ ɔnɛ nde atatshu, Yeso akashimbe Mariya diaha nde mbokumbatɛ, koko akotome dia tewoya ambeki ande losango lendana la eolwelo kande.
nwtsty, nɔtɛ ka wekelo ka lo Joani 20:28
Nkumɛmi ndo Nzambi kami!: Tshɛk., “Nkumi kami ndo Nzambi [ho the·osʹ] kakimi!” Nomb’ewo mɔtshi mbɔsaka ɛtelo kɛnɛ oko ɛtɛkɛta wa diambo wakatama lo dikambo dia Yeso, ko tetele wakendanaka mɛtɛ la Nzambi, She. Nomb’ewo kina mbutaka dia Grɛkɛ k’edjedja mɛnyaka di’ɛtɛkɛta ɛsɔ wakendana la Yeso. Kaanga mbediɔ ngasɔ, onto latɛwɔ etelo ka “nkumɛmi ndo Nzambi kami!” mbeyamaka dimɛna lo ndjela avɛsa akina l’Afundelo wakasambiyama. Lam’ele ɔkɔndɔ mɛnyaka dia Yeso aki oma la tomɛ ambeki ande losango l’ɔnɛ: “Dimi layanga mbidɛ le Papa kami ndo Papa kanyu, le Nzambi kami ndo Nzambi kanyu,” ndooko dui diɛnya dia Tɔma akate dia Yeso mbele Nzambi kanga-wolo-tshɛ. (Nɔtɛ ka wekelo ka lo Jni 20:17.) Tɔma akoke Yeso alɔmba ‘She,’ lo mbelɛ ɔnɛ “Nzambi ɔtɔi ka mɛtɛ.” (Jni 17:1-3) Ondo Tɔma akelɛ Yeso ɔnɛ “Nzambi kami” l’ɔtɛ w’ɛkɔkɔ wayela ɛnɛ: Nde akɔsaka Yeso oko “nzambi,” koko aha Nzambi kanga-wolo-tshɛ. (Enda nɔtɛ ka wekelo ka lo Jni 1:1.) Kana ondo nde akelɛ Yeso yoho yakelɛka ekambi waki Nzambi andjelo wakɛmbaka losango la Jehowa oko wofundamidiɔ lo Afundelo wa lo Hɛbɛru. Ondo Tɔma akeyaka ɛkɔndɔ w’anto amɔtshi kana afundji wa Bible amɔtshi wakakadimola kana wakatɛkɛta la ondjelo lo mbɔɔsa oko Jehowa Nzambi. (Ɛdika la Eta 16:7-11, 13; 18:1-5, 22-33; 32:24-30; Emb 6:11-15; 13:20-22.) Diakɔ diele, Tɔma akakoke mbelɛ Yeso ɔnɛ “Nzambi kami” nɛ dia nde akeyaka Yeso oko onyimpala ndo yɛmba awui ya Nzambi ka mɛtɛ.
NGƆNDƆ KA DIKUMI L’ƆTƆI 12-18
AKAMBO W’OHOMBA W’OMA L’ƆTƐKƐTA WA NZAMBI | ETSHA 1-3
“Nyuma k’ekila kambotshulɔma l’etshumanelo k’Akristo”
Weshasha wangɛnyangɛnya otema
Lo lushi la ntondo ka eotwelo k’etshumanelo k’Akristo lo 33 T.D., anto 3 000 waki weke ka batizama ‘waki kaamɛ lam’asawɔ, lo oleelo ndo l’alɔmbɛlɔ. L’oyango akɔna? Dia vɔ keketshanya lo mbetawɔ ndo ‘ntetemala ndjasha tshɛ lo wetshelo w’apɔstɔlɔ.’—Ets 2:41, 42.
Ase Juda ndo ase wedja wakakome ambetawudi wakaye la Jɛrusalɛma dia ndjotshikala paka l’etena kɛmɔtshi keto lo Fɛtɛ ka Pɛntɛkɔsta. Koko wanɛ wakayala Akristo wakalange ntshikala edja ndo mbeka awui efula dia nkeketsha mbetawɔ kawɔ. Dui sɔ diakakonya dia vɔ monga l’okakatanu dia nkondja mbo ya ndɛ ndo mvudu ya mbidjasɛ. Amɛngɔdi amɔtshi l’atei awɔ komonga la falanga efula etena kele akina waki la yɔ efula. Ɔnkɔnɛ, vɔ wakasanganya diangɔ tshɛ diaki lawɔ lo tshanda mɔtshi ndo wakakahanya wanɛ waki lo dihombo diangɔ dia l’emunyi.—Ets 2:43-47.
Osondjelo ndo okahanyelo wa diangɔ sɔ tshɛ wakasalemaka paka la lolango. Ndooko onto lakawatshutshuyaka dia nsondja kana nkimɔ woshasha; oyango komonga wa nkonya anangɛso weola. Kanyi yele lanɛ ele, anangɛso waki ɛngɔnyi takawahombe nsondja kɛnɛ tshɛ kaki la wɔ, ko ndjonga weola. Koko, oma lo kɛtshi kaki la wɔ otsha le asekawɔ ambetawudi l’ɔtɛ w’awui wakakomɛ l’etena kɛsɔ, vɔ wakasondja diangɔ diawɔ ndo wakakimɔ kɛnɛ tshɛ kaki ohomba dia mbetsha wahɔ wa Diolelo la ntondo.—Ɛdika la 2 Kɔr 8:12-15.
Toyange diangɔ di’oshinga wolo dia lo nyuma
Yeso Kristo
“Owandji wa Woke wa lɔsɛnɔ.” Olambo wakakimɔ Yeso wa lɔsɛnɔ lande l’onto la kokele, aki ndjembetelo ya woshasha waheyama mbɛdika wa She. Dui sɔ diakakimanyiya di’ambeki waki Kristo wakandasɔnɛ mbolɛ lande kaamɛ l’olongo ndo dui sɔ diakasale dia tɛdikɔ mbɔsama lo dikambo di’ambolami wa la nkɛtɛ wa ɛlɔmbwɛlɔ ka Diolelo diande. (Mat 6:10; Jni 3:16; Ɛf 1:7; Hɛb 2:5; enda OSHINGA W’ETSHUNGWELO.) Lo yoho shɔ mbakayala Yeso “Owandji wa Woke [“Owandji,” KJ; JB] wa lɔsɛnɔ” dikambo di’anto tshɛ wa la nkɛtɛ. (Ets 3:15) Etelo ka lo Grɛkɛ kokambi la wɔ lanɛ nembetshiyaka, “owandji wa lɔmbɔla,” etelo kɔtɔnɛ la woho waki Mɔsɛ (Ets 7:27, 35) “ɔnɔmbɔdi” l’Isariyɛlɛ.
cl 265 od. 14
Nzambi kele ‘suke dia nyimanyiya’
14 Woho wadimanyiya Jehowa tɛkɛtamaka nto lo Etsha 3:19, lɛnɛ adiaso ɔnɛ: ‘Nyoyatshumoya, nyokadimole etema, dia pɛkato yanyu nimɔma.’ Etelo k’ɔnɛ dia pɛkato yanyu ‘nimɔma’ kadimɔma oma lo vɛrbɛ ya lo Grɛkɛ yakoka nembetshiya ‘kitola, ndjaka, kana nanya.’ Oko wadita ambewi wa Bible amɔtshi, kanyi yele lanɛ ele nimola efundelo wakafundama la anya. Ngande wakakoke salema dui sɔ na? Ashi wa mfunda wakawalekaka kamba lawɔ lo nshi y’edjedja aki ɔsɔhanyelo wa lodima, olembo w’esongo ɛmɔtshi la ashi. Yema tshitshɛ l’ɔkɔngɔ w’onto funda, nde akakokaka mbɔsa odimɔ wɔlɔwi yema l’ashi ko nde nimola awui wofundjinde. Ɔsɔ ekɔ yoho kina ya dimɛna efula yɛnyama kɛtshi ka Jehowa. Etena kadimanyiyande pɛkato yaso ekɔ oko nde ndjidimolaka la odimɔ.
NGƆNDƆ KA DIKUMI L’ƆTƆI 19-25
AKAMBO W’OHOMBA W’OMA L’ƆTƐKƐTA WA NZAMBI | ETSHA 4-5
“Vɔ wakatetemala nsambisha Ɔtɛkɛta wa Nzambi la dihonga”
De la transmission orale aux textes sacrés—Les premiers chrétiens et l’écrit
Onde Apɔstɔlɔ kombeyaka mukanda?
‘Lam’akɛnyi ewandji ndo dikumanyi dia la Jɛrusalɛma woho wakatɛkɛtaka Petero la Joani akambo hwe hwe ndo lam’akaweye dia vɔ kombeyaka mukanda ndo wekɔ anto k’anto, vɔ wakaambe.’ (Ets 4:13) Onde mɛtɛ apɔstɔlɔ kombeyaka mukanda? Lo ndjela ɛtɛkɛta ɛsɔ, diksiɔnɛrɛ dimɔtshi diendana l’awui wa lo Bible (The New Interpreter’s Bible) mbutaka ɔnɛ: “Ondo ɛtɛkɛta ɛsɔ konangaka nembetshiya mɛtɛ mɛtɛ ɔnɛ Petero la Joani kɔmbɔtɔ kalasa ndo kombeyaka mfunda kana mbadia. Vɔ wakalange ntsho mɛnya otshikitanu w’efula waki lam’asawɔ la apɔstɔlɔ lo ndjela dihole diaki la wɔ lo tshunda.”
w08 5/15 31 od. 1
Akambo w’ohomba w’oma lo dibuku di’Etsha
4:13—Onde Petero la Joani kɔmbɔtɔ kalasa ndo kombeyaka mbadia?
Apɔstɔlɔ
Elimu wakawasalaka l’etshumanelo k’Akristo. Nyuma k’ekila kakatshulɔma le apɔstɔlɔ lo Pɛntɛkɔsta kakaakeketsha efula. Totshapita totanu t’etatelo ta lo dibuku di’Etsha w’Apɔstɔlɔ mɛnyaka ohetoheto ndo dihonga diaki l’apɔstɔlɔ dia mbewoya lokumu l’ɔlɔlɔ ndo eolwelo ka Yeso kaanga mbakawadjama lo lokanu, mbakawakɔmama ndo mbakawawanɛ ewadji dia mbadiaka. Nshi ngana l’ɔkɔngɔ wa Pɛntɛkɔsta, apɔstɔlɔ wakasha ɛlɔmbwɛlɔ ka dimɛna kakawalongola lo tshimbo ya nyuma k’ekila ndo etombelo waki la dui sɔ ele, etshumanelo k’Akristo kakasale ehamelo wa diambo. (Ets 2:41; 4:4) Ntondo ntondo, wakatshu tosambisha la Jɛrusalɛma ndo oma laasɔ, la Samariya ndo l’ɔkɔngɔ diko wakayeyamaka le anto tshɛ wa lo nshi shɔ.—Ets 5:42; 6:7; 8:5-17, 25; 1:8.
Toyange diangɔ di’oshinga wolo dia lo nyuma
Dive dia tshuku
Osambo 118:22 mɛnyaka dia dive diakakashema oma le ambiki diakahombe ndjonga “ɔtɛ wa tshuku” (Heb., roʼsh pin·nahʹ). Yeso akashile ndo akakambe la prɔfɛsiya kɛsɔ lo dikambo diande ndaamɛ oko “dive dia woke dia tshuku” (Gr., ke·pha·leʹ go·niʹas, ɔtɛ wa tshuku). (Mat 21:42; Makɔ 12:10, 11; Luka 20:17) Paka oko watɛnamaka dive dia woke diele la diko dia luudu lɔmɔtshi, mbele ndo Yeso Kristo ekɔ dive dia woke di’etshumanelo k’Akristo w’akitami kele oko tɛmpɛlɔ ka lo nyuma. Petero nde la wɔ akakambe la Osambo 118:22 lo dikambo dia Kristo, lo mɛnya dia nde mbaki “dive” diakakashema oma le anto, koko diakayɔsɔnama oma le Nzambi dia monga “ɔtɛ wa tshuku.”—Ets 4:8-12; enda ndo 1Pe 2:4-7.
w13 3/1 15 od. 4
Petero la Ananiya wakate kashi—Wetshelo akɔna wakondjaso?
Ananiya nde la wadɛnde Safira wakasondja ɛtshi kawɔ k’ekambɔ dia vɔ kondja falanga yakimanyiya anangɛwɔ l’akadiyɛwɔ wakaye oma la Jerusalɛma dia ndjobatizama. Etena kakaye Ananiya la falanga oya le apɔstɔlɔ nde akawatɛ ɔnɛ tshɛ ka falanga kakamakondjisha kingo. Ko, tetele kashi mbakandawatɛ. Nde akashɛ falanga mɔtshi. Petero akeye dui sɔ l’ekimanyiyelo ka nyuma k’ekila ndo akatɛ Ananiya ate: “Aha anto mbakayakeshi, koko Nzambi.” Mbala kakɔ ɔtɔi Ananiya akakɔ la nkɛtɛ ndo akavu. Ondo l’ɔkɔngɔ wa wenya esato, wadɛnde Safira akakome. Aha la mbeya kɛnɛ kokome omɛnde, nde lawɔ akate kashi ndo akavu.
NGƆNDƆ KA DIKUMI L’ƆTƆI 26–NGƆNDƆ KA DIKUMI L’AHENDE 2
AKAMBO W’OHOMBA W’OMA L’ƆTƐKƐTA WA NZAMBI | ETSHA 6-8
“Etshumanelo k’Akristo k’oyoyo kambohembama”
bt-F 41 od. 17
“Sho pombaka nkitanyiya Nzambi oko wende owandji”
17 Wony’ɔnɛ etshumanelo k’Akristo k’oyoyo kaya lo waale oma l’ɔlɔshamelo wakatombe oma lɔkɔ. Ɔlɔshamelo akɔna? Ambeki efula waki oma la batizama wakatshu tembola Jɛrusalɛma ndo wakakombola mbeka akambo efula la ntondo ka vɔ nkalola lo ngelo yawɔ. Ambeki wakadjasɛka la Jɛrusalɛma wakakɔngɔla falanga yawɔ la lolango tshɛ dia asekawɔ nkondja mbo ya ndɛ ndo mbakotshiyɛ ehomba awɔ ekina. (Ets 2:44-46; 4:34-37) L’etena kɛsɔ, okakatanu ɔmɔtshi wakatombe. Wadi waki edo wakatɛkɛtaka Grɛkɛ “konongolaka dimɛna yema yawɔ ya diangɔ diakakahanyemaka lushi la lushi.” (Ets 6:1) Koko vɔ kosalɛ wadi waki edo wakatɛkɛtaka Hɛbɛru akambo lo yoho shɔ. Ɔnkɔnɛ, dui sɔ diakɛnamaka oko kɔngɔdi. Ɔsɔ aki dui diakakoke ndeka mbidja diatɔnelo.
bt 42 od. 18
“Sho pombaka nkitanyiya Nzambi oko wende owandji”
18 Apɔstɔlɔ wakakambaka oko olui-walɔmbɔla l’oyango w’etshumanelo mpama, wakɛnyi dia keema dimɛna dia vɔ ‘ntshika ɔtɛkɛta wa Nzambi ko ntshɔ tokahanya diangɔ dia ndɛ.’ (Ets 6:2) Dia nkandola okakatanu ɔsɔ, wakasha ambeki ɔkɛndɛ wa nyanga apami esambele “woludi la nyuma ndo la lomba” wakakoke apɔstɔlɔ mbisha “olimu w’ohomba ɔsɔ.” (Ets 6:3) Waki l’ohomba w’anangɛso wakotsha kɛnɛ kalɔmbama nɛ dia ondo olimu ɔsɔ komendanaka ntsho la mbo ya ndɛ, koko wakendanaka ndo l’okandwelo w’awui wa falanga, osombelo wa diangɔ ndo namaka diangɔ diakakimɔmaka la yambalo tshɛ. Apami wakasɔnama asɔ tshɛ waki la nkombo y’ase Grɛkɛ, ondo dui sɔ diakasale dia vɔ mbetawɔma oma le wadi waki edo wakawasalɛka akambo la wɛngiya. L’ɔkɔngɔ wa vɔ nsala alɔmbɛlɔ efula dikambo di’ɔsɔnɛlɔ w’anangɛso asɔ, apɔstɔlɔ wakasɔnɛ apami esambele lo mbasha “olimu w’ohomba ɔsɔ.”
Toyange diangɔ di’oshinga wolo dia lo nyuma
bt 45 od. 2
Stɛfano—‘Akahomɔ lokolo l’ɔlɔ ndo akalodiama la wolo’
2 Dui dimɔtshi dia diambo diakɛnama le Stɛfano l’etena kɛsɔ. Toshushi takawendaka tɛɛ wakɛnyi dia elungi kande kaki “oko ka ondjelo.” (Ets 6:15) Andjelo wɛmba nsango y’oma le Jehowa Nzambi wekɔ l’ɔkɔkɔ waha mboka wɔma ndo ntshikala ki. Ngasɔ mbakidiɔ lo dikambo dia Stɛfano, kaanga toshushi takohetshaka efula wakakoke mɛna dikambo sɔ. Ngande wakandakoke ntshikala ki?
bt 58 od. 16
Wakewoya “lokumu l’ɔlɔlɔ lendana la Yeso”
16 Ɛlɔ kɛnɛ Akristo wekɔ la diɛsɛ dia ndjasha l’olimu wele oko wɔnɛ wakasalaka Filipɛ. Mbala efula, vɔ sambishaka wanɛ wahomana la wɔ lokumu l’ɔlɔlɔ la Diolelo lo tshakitudi, ɛnyɛlɔ oko etena katawande lɔkɛndɔ. Lo waaso efula, woho watanawɔ anto w’etema ɛlɔlɔ bu ntsho ahoma. Dui sɔ salemaka nɛ dia Bible mɛnyaka hwe dia andjelo mbalɔmbɔla olimu w’esambishelo, diakɔ diele losango la Diolelo komaka le anto wa lo “wedja tshɛ ndo waoho tshɛ ndo ɛtɛkɛta tshɛ ndo weho w’anto tshɛ.” (Ɛny 14:6) Ɛlɔmbwɛlɔ kasha andjelo l’olimu w’esambishelo kekɔ mɛtɛ kɛnɛ kakatatshi Yeso. Lo wɛɛla ande wendana l’eponga la kangaka, Yeso akate dia l’etena ka dinela mbuta ate, l’ekomelo ka dikongɛ nɛ di’akambo, “amunyi ele andjelo.” Nde akakotsha nto ɔnɛ, ditongami dia lo nyuma sɔ “wayotshumanya diangɔ tshɛ diatakanya anto ndo anto wɔnyɔla ɛlɛmbɛ oma lo Diolelo diande.” (Mat 13:37-41) L’etena kakɔ kaamɛ, andjelo wayotshumanya ekitɔ wa Diolelo dia l’olongo ndo oma laasɔ, “olui a woke w’anto” wele “ɛkɔkɔ ekina,” mbuta ate wanɛ wakombola Jehowa dia mbakutola oya l’okongamelo ande.—Ɛny 7:9; Jni 6:44, 65; 10:16.