Etena kayonyɛma lohetsho lo pondjo

NZAMBI AYONYA AWUI WAKONYA LO LOHETSHO

1. 1. SATANA DIABOLO. Satana, ondjelo wakatɔmbɔkɔ mbele l’onongo wa lohetsho lɛnaso ɛlɔ kɛnɛ. Nzambi ayolanya Satana ndo wanɛ tshɛ wahetsha anto akina oko wasalande.​—Osambo 37:38; Rɔmɔ 16:20.

2. 2. LOHETSHO LAKI SATANA LAMBOLOLA L’ANDJA. Nzambi ayonya awui wa kɔlɔ watshutshuya lo lohetsho l’andja ɔnɛ, mbidja ndo atshunda wa pɔlitikɛ wele bu la losembwe ndo ewandji w’ɛtɛmwɛlɔ watshutshuya anto dia mpetshanya. Nzambi ayolanya nto amundji w’okanda wa lokaki, wa lokeso ndo wava anto akina dia vɔ nkondja wahɔ.​—2 Petero 3:13.

3. 3. EONGELO K’ANTO WELE KEEMA KOKELE. Bible nembetshiyaka di’anto tshɛ wakahowɔ eongelo kele keema kokele mongaka la mbekelo ka nkanyiya, ndjaoka ndo nsala kɛnɛ kele kɔlɔ. (Rɔmɔ 5:12) Mbekelo kɛmɔtshi l’atei ayɔ ele monga la lohetsho otsha le anto akina ndo liɛnya l’etsha. Nzambi ayotokimanyiya dia minya mbekelo ya kɔlɔ shɔ ndo oma laasɔ, lohetsho layoshila lo pondjo​—Isaya 54:13.

BIBLE TOLAKAKA ANDJA WELE LOHETSHO HATONGA

1. 1. NDOOKO ONTO LAYOWOSALƐ AKAMBO WAHA LA LOSEMBWE. Diolelo diaki Nzambi diayolɛ nkɛtɛ k’otondo ndo diɔ diayɔlɔmbɔla oma l’olongo ndo diayoshikikɛ losembwe lo pondjo. (Danyɛlɛ 2:44) Awui wele keema la losembwe hawotonga nto. Nzambi ayɔlɔngɔsɔla awui tshɛ wele keema la losembwe wasalɛwɔ anto ɛlɔ kɛnɛ.​—Luka 18:7.

2. 2. ONTO TSHƐ AYONGA LO WƆLADI. Ndooko onto layosowa l’ɔtɛ w’awui wa ngala kana w’ata. (Osambo 46:9) Anto tshɛ wa la nkɛtɛ wayolanga wɔladi diakɔ diele nkɛtɛ ayonga dihole dia wɔladi dia mbidjasɛ.​—Osambo 72:7.

3. 3. ONTO TSHƐ AYƆSƐNA PONDJO PONDJO LO EONGELO KA KOKELE. Onto tshɛ la la nkɛtɛ ayɛnyanya ngandji ka mɛtɛ otsha le wonyande. (Mateo 22:39) Ndooko onto layokiyana, kaanga la tokanyi ta kɔlɔ kana mbohɔ awui wa kandji. (Isaya 65:17) L’etena kɛsɔ, lam’ayoshila lohetsho tshɛ, “anto wayɔngɛnangɛnaka heyama la wɔladi w’efula.”​—Osambo 37:11.

Onde wɛ ekɔ lo nkombola ndjɔsɛna l’andja wa ngasɔ? Kaanga l’etena kɛnɛ, anto efula wekɔ lo mbeka woho wa minya lohetsho lo nkamba l’atɔndɔ wa lo Bible. (Osambo 37:8) Kɛsɔ mɛtɛ mbasala miliyɔ ya Ɛmɛnyi wa Jehowa wa l’andja w’otondo. Kaanga mboyewɔ oma lo waoho ndo mbekelo yotshikitanyi, vɔ wekɔ kaamɛ oko nkumbo ndo mbokanaka ngandji lam’asawɔ.​—Isaya 2:2-4.

Ɛmɛnyi wa Jehowa wayɔngɛnangɛna nkahana la yɛ kɛnɛ kamboweka lo kɛnɛ kendana la woho wa mbikikɛ awui wele keema la losembwe ndo wa kɔngɔdi. Kɛnɛ kekayɛ kokaka kokimanyiya dia wɛ tanyaka yema yema mbekelo ka mpetshana ndo mboka anto akina ngandji. Wɛ koka mbeka woho wa salɛ anto tshɛ akambo w’ɛlɔlɔ, oyadi wanɛ wɛnama dia vɔ bu la lowando kana wanɛ wɛnya lohetsho. Etombelo wayonga la dui sɔ ele, wɛ ayonga la lɔsɛnɔ l’ɔngɛnɔngɛnɔ oma ko nshi nyɛ ndo diɔtɔnganelo diayɛ l’anto akina diayoleka monga dimɛna. Laadiko dia laasɔ, wɛ ayeka kɛnɛ kakokayɛ nsala dia ndjɔsɛna l’ɛse ka Diolelo dia Nzambi etena kayomɔ lohetsho lo pondjo.​—Osambo 37:29.