4 | Bible mbishaka alako w’eshika

Kɛnɛ kalembetshiya dui sɔ

Kaanga mbediɔ bu dibuku di’aseka enganga, Bible mbishaka alako w’eshika ndo w’ohomba. Alako akɔ koka kimanyiya onto lalɔshana la hemɔ ka lo yimba. Tɔsɛdingole bɛnyɛlɔ dimɔtshi.

Woho wakoka dui sɔ tokimanyiya

“Anto wele alemba ki hawotoyangaka onganga, paka anto wele la hemɔ.”—MATEO 9:12.

Bible mbetawɔka dia sho koka monga l’ohomba w’esakelo w’aseka enganga. Anto efula wele la hemɔ ka lo yimba wakakimanyiyama diɛsɛ la woho wakaweye awui efula wendana l’okakatanu wele lawɔ ndo lo ntshɔ dia tɛnana la dɔkɔtɛlɛ.

“Osutshesutshelo wa demba diayɛ wekɔ ohomba.”—1 TIMƆTE 4:8, Bible en français courant.

Salaka akambo wayokokimanyiya dia ndowanya yoonge yayɛ, mbeyaka kokimanyiya dia ndowanya yimba yayɛ. Awui akɔ ko: Kɔkɔlaka demba mbala la mbala, monga la mbekelo ka ndɛka mbo ya ndɛ y’amɛna ndo ndalaka efula.

“Otema wele l’ɔngɛnɔngɛnɔ ekɔ okanga wa dimɛna, koko yimba yambɔkɔmɔ shidiyaka wolo w’onto.”—TOKEDI 17:22.

Wadielo w’avɛsa wa lo Bible wa nkeketsha ndo ndjadjɛ eyango wakokayɛ nkotsha ayokoka kokimanyiya dia ntetemala ndjaoka dimɛna. Naka wɛ mbika washo l’akambo w’amɛna wa lo lɔsɛnɔ ndo monga la mbetawɔ di’awui wayolowana lo nshi yayaye, dui sɔ koka kokimanyiya dia wɛ ndɔshana la hemɔ ka lo yimba.

“Lomba lekɔ kaamɛ la akanga w’okitshakitsha.”—TOKEDI 11:2.

Wɛ mbeyaka mɛna dia wɛ bu l’akoka wa nsala kɛnɛ tshɛ kalangayɛ nsala, ɔnkɔnɛ, etawɔ la lolango tshɛ ekimanyielo k’oma le anto akina. Angɛnyi ndo ase nkumbo nangaka kokimanyiya, koko mbeyaka monga ko vɔ haweye kɛnɛ kakokawɔ nsala. Tɛwɔ kɛnɛ kakokawɔ kokimanyiya lo yoho ya laande. Tolongamɛke akambo efula oma lewɔ ndo mbala tshɛ ongaka la lowando l’efula l’ekimanyielo kakoshawɔ.

Woho wakimanyiya alako w’eshika w’oma lo Bible wanɛ wasowa

“Lakayaoke dia aki dui dimɔtshi diakakiyanyaka, ɔnkɔnɛ, lakatshu dia tɛnana la dɔkɔtɛlɛ. Nde akashola kɛnɛ kakafukutanyaka. Kɛsɔ akakimanyiya dia dimi nshihodia okakatanu waki lami ndo mbeya toho shikaa t’esakelo t’amɛna takoka nkokɛ demba diami.”—Nicole,a ladiɛnɛ la hemɔ k’ɔkɔmwɛlɔ woleki tshɛ.

“Lakashola dia wadielo wa Bible wa mbala la mbala kaamɛ la wadɛmi wakakimanyiya dia tatɛka lushi tshɛ la tokanyi t’amɛna ndo ta nkeketsha. Ndo mbala la mbala, nshi yalɔshanami l’ekiyanu, ekɔ divɛsa dimɔtshi shikaa dia yonanda otema ami.”—Peter, ladiɛnɛ la hemɔ k’ɔkɔmwɛlɔ.

“Aki tshondo y’okakatanu dia dimi mbitɛ anto akina hemɔ kakimi la tɔ, nɛ dia laki la nsɔnyi k’efula. Koko ɔngɛnyi ami ɔmɔtshi wa ma ma akampokamɛ la yambalo ndo la nkɛtshi tshɛ, nde akahembe nshihodia woho wakamayaokaka. Nde mɛtɛ akakimanyiya dia dimi ndjaoka dimɛna efula ndo aha dimi ndjaoka opoko.”—Ji-yoo, ladiɛnɛ la okakatanu wendana la olelo.

“Bible kakakimanyiya dia dimi monga la wɛdimo, dia mumuyaka efula ndo diaha kambaka olimu lo yɛdikɔ yambotamba elelo. Dako dia lomba dia lɔkɔ, diakakimanyiya dia dimi ntetemala ndɔshana l’ekakatanu wa lo yimba wakimi lawɔ.”—Timothy, la lɔshana la efukutanu wa lo wɔɔngɔ wahashile (Trouble obsessionnel compulsif, TOC)