[Oma lo lɔmɔsɔ otsha lo lomi] Marcelo, Yomara, la Hiver. Onto l’onto nkimɛ Ekadimwelo k’andja w’oyoyo ka l’espagnol l’ɔtɛkɛta w’akanga wa totshungu
Vɔ wakɛnyi ngandji l’etsha
YOMARA nde l’anango, Marcelo la Hiver wekɔ lo mbidjasɛ lo ngelo ngelo mɔtshi ya la Guatémala. Yomara akatatɛ mbeka Bible nde l’Ɛmɛnyi wa Jehowa ndo l’ɔkɔngɔ diko anango vɔ lawɔ wakayotatɛ mbeka Bible. Koko vɔ waki l’okakatanu ɔmɔtshi. Vɔ akɔ asato waki totshungu ndo vɔ kombeyaka mbadia ɔtɛkɛta w’akanga wa totshungu. Diakɔ diele, ombetsha awɔ wa Bible akawawadiɛka awui wakawekaka ndo avɛsa wa lo Bible wa lo wekelo.
Vɔ waki nto l’okakatanu dia mbɔtɔ lo nsanganya ya l’etshumanelo. Lo vɔamɛ, takawakokaka nkoma lo Mbalasa ka Diolelo kakaleke suke la wɔ kakahombaka mbaɔsɛ minitɛ 40 ya lɔkɛndɔ. Koko anangɛso wa l’etshumanelo wakayakongɛ dia towaɔsaka lo nsanganya tshɛ. Ndo lam’akawatatɛ mbisha asawo w’ambeki lo losanganya la l’atei wa lomingu, anangɛso wakaakimanyiyaka dia vɔ nkimɛ asawo awɔ l’ɔtɛ.
Lo Ngɔndɔ ka tanu 2019, nsanganya ya l’etshumanelo yakatatɛ salema lo ngelo kawɔ. Oma laasɔ, wadi l’omi amɔtshi waki ambatshi mboka wa pondjo wakonɔ otsha lo ngelo ngelo shɔ. Vɔ wakayadjɛ oyango wa mbetsha ana asato w’otema ɔtɔi asɔ woho wa mbadia la mfunda l’ɔtɛkɛta w’akanga wa totshunbgu, kaanga mbele vɔamɛ kombeyaka mbadia ndo mfunda ɔtɛkɛta akɔ. Vɔ wakatshu lo bibliɔtɛkɛ ɔmɔtshi dia teka ɔtɛkɛta w’akanga wa totshungu ndo toho takambawɔ la tɔ dia mbetsha anto ɔtɛkɛta ɔsɔ.
Marcelo asha kɔmatɛrɛ lo losanganya lɔmɔtshi la l’etshumanelo
Lo ngɔndɔ ngana tsho, ewotɔ esato ɛsɔ wakonge l’akoka wa mbadia ɔtɛkɛta w’akanga wa totshungu aha l’okakatanu ndo dui sɔ diakaakimanyiya dia nyomoleka mpama lo nyuma.a Kakianɛ, Yomara, Marcelo, ndo Hiver wokamba oko ambatshi mboka wa pondjo. Marcelo ekɔ okambi wakimanyiya. Vɔ ndjashaka tshɛ l’awui wa lo nyuma lomingu l’otondo. Vɔ wakasambiyɛ anto akina ohetoheto awɔ.
Ewotɔ esato ɛnɛ wekɔ la lowando lo woho waasukɛ etshumanelo la ngandji tshɛ. Yomara mbutaka ate: “Oma ko mbala kaso ka ntondo kakatahomana la wɔ, Ɛmɛnyi wa Jehowa wakatɛnya ngandji ka mɛtɛ k’Akristo.” Ndo Marcelo kotshaka ate: “Tekɔ l’angɛnyi wa diambo l’etshumanelo kaso ndo tekɔ l’atei wa nkumbo ka l’andja w’otondo k’onto l’ɔnango kele kaamɛ lo dimama dia ngandji.” Yomara nde l’anango wekɔ lo nkongɛ l’asolo walomɔlomɔ etena kayowɛna nkɛtɛ kambokadimɔ paradiso.—Os. 37:10, 11; Isa. 35:5.
a Biukubuku yele l’ɔtɛ a dui ɔnɛ: Méthode d’apprentissage du Braille yakatondjama dia nkimanyiya onto lele tshungu kana lahɛnyi dimɛna dia mbeya woho wa mbadia ndo mfunda ɔtɛkɛta w’akanga wa totshungu.