Tolowanya akoka aso wa nsambisha​—Woho wa nsambisha akanga wa totshungu

OHOMBA WA DUI SƆ: Akanga wa totshungu efula hawoleke ndjaoka dimɛna etena katɛkɛtawɔ l’anto wahaweye. Koko, paka monga la diewo dia nsambisha anto wa ngasɔ. Jehowa ndjakiyanyaka la ngandji tshɛ dikambo di’akanga wa totshungu. (Lɛw 19:14) Sho koka mbokoya ɛnyɛlɔ kande lo mbɔsa yɛdikɔ ya nkimanyiya akanga wa totshungu dia vɔ mbeka awui wendana la Jehowa.

WOHO WA NSALA DUI SƆ:

• ‘Toyange’ akanga wa totshungu. (Mat 10:11) Onde wɛ mbeyaka onto ɔmɔ lele l’ose nkumbo kande ɔmɔtshi ekɔ tshungu? Onde ɛtshi kanyu ka nkɛtɛ kekɔ la kalasa, mvudu yakokɛwɔ anto wele la hemɔ kana ahole akina wayowonga l’ohomba w’ekanda wendana l’akanga wa totshungu?

• Yasha le nde. Woho wayoyoyasha la lɔngɛnyi tshɛ ndo wayoyoyasha l’otema ɔtɔi le nde ayokimanyiya kanga tshungu dia nde ndjaoka dimɛna. Hemba dia ntatɛ sawo la dikambo dimɔtshi diayasha anto wa l’ɛtshi kanyu ka nkɛtɛ

• Tokimanyiya akanga wa totshungu dia vɔ nkondja ekanda wayowakimanyiya dia vɔ mbeya Jehowa. Dia nkimanyiya akanga wa totshungu, okongamelo ambotondjaka ekanda wendana l’akanga wa totshungu lo waa fɔrma efula. Mbola onto woho walangande mbekaka. Omendji w’olimu pombaka ndjashikikɛ dia okambi wakamba l’ekanda ekɔ lo ndodia adɛmandɛ w’ekanda w’akanga wa totshungu lo fɔrma yakombola akanga wa totshungu