Tokimanyiya akanga wa totshungu dia vɔ mbeka awui wendana la Jehowa
1. Ngande wakɛnya Yeso kɛtshi otsha le akanga wa totshungu?
1 Nshi ngana la ntondo ka Yeso mvɔ, etena kakandatatshɔka otsha l’osomba wa Jeriko, akanga wa totshungu ahende wakalɔmbanaka diangɔ wakɔsɛngasɛnga vate: “Nkumadiɔndjɔ, . . . otoke kɛtshi!” Kaanga mbakandakanyiyaka dikambo di’ekakatanu wa wolo wakookongɛka, Yeso akemala ko akelɛ apami asɔ ndo akaakɔnɔya. (Mat. 20:29-34) Ngande wakokaso mbokoya kɛtshi kaki Yeso otsha le akanga wa totshungu?
2. Ngande wakokaso nsambisha kanga tshungu lohomanyi laso lo dihole dia lo sɛkɛ?
2 Tonge okimanyedi w’oshika: Naka tambohomana la kanga tshungu, ɛnyɛlɔ lo dihole dia lo sɛkɛ, toyaeyanya ndo towosha ekimanyielo. Lam’ele tena efula anto wa ngasɔ waholeke mbɔsama la nɛmɔ, mbala ka ntondo onto koka ntona. Koko, lɔngɛnyi laso la mɛtɛ ndo woho wayashaso le nde l’otema ɔtɔi koka mbɔngɛnyangɛnya. Tohɔ nto dia ekɔ weho efula wa totshungu ndo dui sɔ koka nshikikɛ ekimanyielo kahombama mbasha. L’ɔkɔngɔ wa sho mbasha ekimanyielo, sho koka mbatɛ dia sho tekɔ lo ndjasha l’olimu wa mbetsha anto Bible. Tɔɔlɔmbɛ dia sho mbadia la nde divɛsa dimɔ, ɛnyɛlɔ oko Osambu 146:8 kana Isaya 35:5, 6. Naka nde ekɔ l’akoka wa mbadia ɔtɛkɛta w’akanga wa totshungu, kete lɔmbande dia kana nde ayolanga okanda ɔmɔ wa l’ɔtɛkɛta w’akanga wa totshungu wayowokimanyiya dia nde mbeya awui efula wa lo Bible. Sho koka nto mbokimanyiya dia nde ntana diangɔ dimɔ diakadjama l’eshinga oma lo jw.org. Naka ɔrdinatɛrɛ ande wekɔ la ekongelo k’adia alɛta ladia oma lo ekra, kete nde koka ngɛnangɛna asawo wele lo jw.org ndo ekanda ekina wakokande telesharjɛ lo fɔrma kelɛwɔ ɔnɛ RTF (Rich Text Format).—Enda kiombo yele l’ɔtɛ a dui ɔnɛ: “Etena kakimanyiyayɛ kanga tshungu . . .”
3. Ngande wakokaso nyanga akanga wa totshungu l’ɛtshi kaso ka nkɛtɛ?
3 Toyange akanga wa totshungu: Hatoleke pomanaka l’akanga wa totshungu l’esambishelo ka lo luudu la luudu nɛ dia efula ka kawɔ hawoyaoke dimɛna dia ntɛkɛta l’angɛndangɛnda waya lawakawɔ. Diakɔ diele, nɔmbaka mbidja welo efula dia ‘nyanga’ akanga wa totshungu dia mbaasambisha. (Mat. 10:11) Onde wɛ ekɔ l’osekayɛ la l’olimu kana la la kalasa lele tshungu? Sala la wolo dia nsawola la nde. Naka ɛtshi kanyu ka nkɛtɛ kekɔ la kalasa y’akanga a totshungu, kete shawɔ ekanda aso ɛmɔ wa l’ɔtɛkɛta w’akanga wa totshungu kele wadje lo bibliɔtɛkɛ awɔ. Onde wɛ mbeyaka onto ɔmɔ lele l’ose nkumbo kande lele tshungu? Onde ɛtshi kanyu ka nkɛtɛ kekɔ l’atshunda amɔtshi wakimanyiya akanga wa totshungu kana wele la mvudu yadjasɛ akanga wa totshungu? Lembetshiya ose nkumbo, onto lalongɔna la soko, kana dikitɛlɛ ɔnɛ Ɛmɛnyi wa Jehowa ndjashaka efula dia nkimanyiya akanga wa totshungu ndo lɔmbawɔ dia mbaela ekanda wa l’ɔtɛkɛta w’akanga wa totshungu kana diangɔ diakadjama l’eshinga. Ɛnyande daka dia lo Bible diɛnya dia keema edja Nzambi ayanga minya hemɔ ka tshungu lo pondjo. Ndo nto wɛ koka mbɛnya vidɛo y’oma lo jw.org yele l’ɔtɛ a dui ɔnɛ: “ Sans elle, je serais perdu, ” yɛnya pami kɛmɔ ka tshungu akɔndɔla wahɔ wakandakondja oma lo Bible ka l’ɔtɛkɛta w’akanga wa totshungu. Naka wɛ nembetshiya oyango wa wendelo ayɛ, kɛsɔ koka kosha diaaso dia ndjɛnanaka l’akanga wa totshungu.
4. Wetshelo akɔna wakondjaso oma lo kɛnɛ kakasale Janet?
4 Janet, kadiyɛso kɛmɔ ka tshungu akembola dihole dimɔ diadjasɛ akanga wa totshungu. Nde akatatɛ nsawola la womoto ɔmɔ l’osekaseka. Janet akawotɛ ate: “Yeso akakɔnɔya akanga wa totshungu dia mɛnya kɛnɛ kayondoyosalɛ akanga wa totshungu tshɛ.” Vɔ wakadia Ɛnyɛlɔ 21:3, 4 ndo Janet akoolembetshiya woho wele daka sɔ diayokotshama lo Diolelo diaki Nzambi. Womoto ɔsɔ akɔlama ki ndo akate ate: “Talokaka ndooko lushi dui dia ngasɔ oma le kanga tshungu. Anto efula wɛna fɔnyaka dia anto wekɔ totshungu nɛ dia vɔ kana watshɛwɔ wakasale dui dimɔ.” Janet akafundɛ womoto ɔsɔ mesajɛ wakokonya lo dibuku Bible etshatɔ ndo wekɔ lo mbeka Bible kaamɛ mbala hiende lo lomingu.
5. Kaanga mbele hatokoke nkɔnɔya akanga wa totshungu oko wakasale Yeso, ɛtshɔkɔ akɔna wayotokondja naka sho ndjasha le akanga wa totshungu?
5 Lo mɛtɛ, sho hatokoke kɔnɔya totshungu oko wakasale Yeso, koko sho koka nkimanyiya wanɛ tshɛ wele timba tawɔ tambetɛma totshungu oma le nzambi k’andja ɔnɛ, mbidja ndo akanga wa totshungu ta lo demba dia vɔ nshihodia akambo wa mɛtɛ w’oma l’Ɔtɛkɛta wa Nzambi. (2 Kɔr. 4:4) Yeso akakɔnɔya apami ahende waki suke la Jeriko nɛ dia nde “akawaoke kɛtshi.” (Mat. 20:34) Naka sho ndjasha yoho yakɔ yaamɛ le akanga wa totshungu, kete tayɔngɛnangɛna la diɛsɛ dia nkimanyiya amɔtshi dia mbeka akambo wendana la Jehowa, ɔnɛ layonya hemɔ ka tshungu lo pondjo.