Ekimanyielo le wamato wasalɛwɔ akambo la wɛngiya
“ L’ANDJA w’otondo, miliyɔ ya wamato ndo y’ana wa wamato wekɔ lo salemɛ kɔlɔ. Onde wɛ ekɔ ɔmɔtshi l’atei awɔ? Enda lande na kele ekokelo kayɛ kekɔ dui di’ohomba le Nzambi ndo kɛnɛ kayondosala lo dikambo di’osoyamelo wa wamato.”
Ngasɔ mbatatɛ sawo dia lo jw.org diele l’ɔtɛ a dui ɔnɛ: “Ekokelo ka wamato—Kanyi ya Bible lo dikambo sɔ.” Liɛ lɔmɔtshi la l’ekomelo ka sawo diakɔ mɛnyaka dihole dia wɛ telesharjɛ fɔrma ka l’akatshi kakokayɛ ntondja ndo diɔ diekɔ traktɛ kele la ndjɛkɛ nyɛi. Kadiyɛso kɛmɔtshi kelɛwɔ Stacy kadjasɛ l’États Unis mbutaka ate: “Lakatondja kɔpi ya sawo diakɔ ndo dimi la kadiyɛso kekina takayitɔlɛ lo dihole diakokɛwɔ wamato dia l’ɛtshi ka nkɛtɛ k’etshumanelo kaso.”
Ose olimu ɔmɔtshi wa lɛkɔ akambola dia kana sho koka mbosha kɔpi kina ya sawo diakɔ dia nde kahɛ wanɛ wadjasɛ lɛkɔ. Etombelo waki la dui sɔ ele, takakahe traktɛ kina 40 ndo kartɛ 30 ya woho wa mbɔtɔ lo jw.org. Lam’akatembola dihole sɔ mbala k’ekomelo, owandji wa lɛkɔ akatotɛ dia sho mɛnya wamato wadjasɛ lɛkɔ woho wa mbeka Bible.
Stacy nde l’akadiyɛso akina ahende wakatshu lo dihole dikina diakokɛwɔ wamato lɛnɛ akawatokaha kɔpi tshanu ya traktɛ kɛsɔ ndo wakatowalɔmba kina. Ose olimu ɔmɔtshi akate ate: “Traktɛ kɛnɛ kayokimanyiya wamato wa lanɛ.” Nde akakotsha ate: “Tekɔ l’ohomba atɔ.” Lam’akawakalola dia tembola dihole sɔ, wamato amɔtshi wadjasɛ lɛkɔ wakakombola mɛna woho weta wekelo wa Bible ndo ahende l’atei awɔ wakate dia vɔ nangaka mbɔtɔ lo losanganya lakayele la lo wikɛndɛ lo Mbalasa ka Diolelo.
Stacy mbutaka ate: “Takaambe lo woho waketawɔ anto efula dia mbadia sawo dia dimɛna sɔ. Etena kakatatondjaka ndo kakatadjaka kɔpi ya sawo sɔ l’avelɔpɛ, ɔsɔ aki yoho ya dimɛna efula ya nkahana losango la Diolelo la wamato wakawasalɛka akambo la wɛngiya. Takanandema efula lo mɛna woho waki anto l’ɔngɛnɔngɛnɔ etena kakawoke losango lɔsɔ ndo tekɔ lo nomɔlomɔ dia mɛna woho wayɔtshɔkɔla Jehowa welo aso dia tokimanyiya dia ntetemala mbewoya lokumu l’ɔlɔlɔ le wamato asɔ.”