Ambola w’oma le ambadi
“Kanyi” yakɔna yayodja Jehowa l’etema wa wedja lo nshi yayaye yaya k’emembe?
Lo kɛnɛ kendana l’etatelo ka mfɔnu ka woke, Ɛnyɛlɔ 17:16, 17 mbutaka ɔnɛ: “Nseke 10 yakayɛnyi ndo nyama ka ngala wayohetsha womoto la numba, wayowohandjola vwa ndo wayowotshika otakataka, vɔ wayɔlɛ emunyi ande ndo wayowotshumba oshiki lo dja. Nɛ dia Nzambi akadje lo etema awɔ dia vɔ nkotsha kanyi yande, ɛɛ, dia vɔ nkotsha kanyi yawɔ yaamɛ lo mbisha nyama ka ngala diolelo diawɔ.” Lo nshi yakete, ekanda aso wakate dia “kanyi” yayodja Jehowa l’etema wa wedja ele ya ndanya ɔtɛmwɛlɔ wa kashi.
Koko, ekɔ ohomba sho nsala otshikitanu. “Kanyi” yayodja Jehowa l’etema wa wedja ele dia vɔ mbisha “nyama ka ngala diolelo diawɔ.” Dia nshihodia woho wayokotshama dui sɔ, tɔsɛdingole ambola wayela anɛ.
Di’anto akɔna watɛkɛtama lo prɔfɛsiya kɛsɔ? “Womoto la numba” mbelamɛka nto “Babilɔna ka Woke”; nde nembetshiyaka tshunda dia l’andja w’otondo di’ɛtɛmwɛlɔ wa kashi. “Nyama ka ngala ka beela” nembetshiyaka Nations unies. Okongamelo ɔsɔ wakakengama ntondo lo 1919 l’oyango wa mbidja wɔladi l’andja w’otondo ndo wakelamɛka ɔnɛ Société des Nations. (Ɛny. 17:3-5) “Nseke 10” nembetshiyaka mandji tshɛ yasukɛ nyama ka ngala.
Diɔtɔnganelo diakɔna diele lam’asa womoto la numba la nyama ka ngala ka beela? Womoto la numba ‘akadjasɛ laadiko’ dia nyama ka ngala, dui dialembetshiya dia nde kisukɛka ndo kilɔmbɔlaka.
Kakɔna kayokomɛ womoto la numba? Nyama ka ngala, kaamɛ la nseke 10 yawosukɛ, “wayohetsha womoto la numba.” La lohetsho tshɛ, vɔ wayomba ɔngɔnyi ande tshɛ ndo wayotondja kɔlɔ kande sɛkɛ. Ndo wayela kilombo ka Jehowa oya le nde, mbuta ate wayowolanya tshɛ lo tshɛ. (Ɛny. 17:1; 18:8) Ɔsɔ mbayonga ekomelo ka tshunda di’ɛtɛmwɛlɔ wa kashi. Koko la ntondo ka dikambo sɔ salema, Jehowa ayokonya dia wedja nsala dui dimɔtshi diele diatasalemaka l’edja k’ɔkɔndɔ w’ɛlɔmbwɛlɔ k’ana w’anto.
Kakɔna kayokonya Jehowa wedja dia nsala? Nde ayodja l’etema wa nseke 10 “kanyi yande,” yata dia “vɔ mbishaka nyama ka ngala wolo awɔ ndo lowandji lawɔ,” mbuta ate Nations unies. (Ɛny. 17:13) Ohokanyiya kɛnɛ kalanga dui sɔ nembetshiya. Onde mandji y’ana w’anto wayɔsa tsho yɛdikɔ la wolo awɔ dia mbisha nyama ka ngala wolo ndo lowandji lawɔ? Ndooko! Prɔfɛsiya mɛnyaka dia Nzambi ndamɛ ayowatshutshuya dia vɔ nsala dui sɔ. (Tok. 21:1; ɛdika la Isaya 44:28.) Onde dui sɔ diayosalema yema yema? Ndooko! Dui sɔ diayosalema la shashimoya ndo esadi esadi. Laasɔ nyama ka ngala kayowosha wolo kɛsɔ kayela kilombo ka Jehowa le atshunda tshɛ w’ɛtɛmwɛlɔ wa kashi lo mbalanya mbala kakɔ ɔtɔi lo pondjo.
Ko laasɔ, kakɔna kakokaso nongamɛ? Hatohombe nongamɛ dia mɛna lo alapɔlɔ w’eyoyo wɛnya dia mandji hayoyoleka nsukɛ Nations unies. Kɛnɛ kakokaso nongamɛ ele: La shashimoya tshɛ, Jehowa ayodja l’etema wa wedja kanyi ya mbisha wolo awɔ le nyama ka ngala. Etena kayosalema dui sɔ, sho tayeya dia mfɔnu ka woke kaya suke la ntatɛ. Lam’akatakonge awui asɔ, “nyɛsɔ tɔsɛnake ndo totetemale monga la ekanelo ka yimba k’ɔlɔlɔ” nɛ dia etshikitanu wa la shashimoya wayanga salema keema edja!—1 Tɛs. 5:6.