Ekadimwelo lo ambola w’oma lo Bible / Kakɔna kata Bible lo dikambo dia lotshungɔ la nsɔna? Onde Nzambi shikikɛka la ntondo kɛnɛ kayotokomɛ?
Okadimwelo washa Bible
Nzambi tɔsaka la nɛmɔ lo woho wakandatosha lotshungɔ la nsɔna, mbuta ate dikoka dia ndjaɔsɛ tɛdikɔ. Hatohombe mfɔnya di’akambo wambotakongɛmaki la ntondo. Tɔsɛdingole kɛnɛ ketsha Bible.
Nzambi akatonge anto lo efanelo kande. (Etatelo 1:26) Anto bu oko wa nyama yasala akambo osalasala, koko sho fɔnaka l’Otungi aso nɛ dia tekɔ l’akoka wa nkɛnɛmɔla waonga wele oko ngandji ndo losembwe. Ndo oko Otungi aso, tekɔ la lotshungɔ la nsɔna.
Mbala efula, sho koka nshikikɛ woho wayoyala nshi yaso yayaye. Bible tokeketshaka dia “nsɔna lɔsɛnɔ . . . lo mpokamɛ dui [dia Nzambi],” mbutaka ate nsɔna dia nkitanyiya ɛlɛmbɛ ande. (Eohwelo k’Ɛlɛmbɛ 30:19, 20) Dui sɔ totodionga ohomba otondongaka sho bu la lotshungɔ la nsɔna. Lo dihole dia totshutshuya dia nsala kɛnɛ katande, Nzambi tɔsɛngasɛngaka lo mbuta ɔnɛ: “Otoyodja yimba lo ɛlɛmbɛ ami lee! Tshike wɔladi ayɛ wotonga oko ɔkɛdi w’ashi.”—Isaya 48:18.
Oyadi sho ntondoya kana bu, awui asɔ kotakongɛmi la ntondo. Naka sho nangaka ntondoya lo dui dimɔtshi, kete sho pombaka nkamba wolo. Bible mbutaka ɔnɛ: “Kɛnɛ tshɛ kɛna lonya layɛ dia nsala, salatɔ la wolo ayɛ tshɛ.”(Ondaki 9:10) Tɔ mbutaka nto ɔnɛ: “Asangwelo wa kanga etete konyaka mɛtɛ lo otondoyelo.”—Tokedi 21:5.
Lotshungɔ la nsɔna lekɔ woshasha wa nɛmɔ w’oma le Nzambi, nɛ dia lɔ tokimanyiyaka dia mbolanga ‘la otema aso tshɛ,’ nɛ dia takasɔnɛ dia mbolanga.—Mateo 22:37.
Shi Nzambi kaheme laadiko dia tshɛ?
Bible mbetshaka dia Nzambi ekɔ Kanga-Wolo-Tshɛ, mbuta ate ndooko onto lakoka mbidjɛ wolo ande elelo. (Jɔb 37:23; Isaya 40:26) Koko nde hakambe la wolo ande l’oseka dui tshɛ. Ɛnyɛlɔ, Bible mbutaka dia Nzambi ‘akayakimɛ’ dia ndanya diolelo dia Babilɔna diaki otunyi wa wodja ande. (Isaya 42:14) Woho akɔ wamɛ mbele, l’etena kɛnɛ Nzambi sɔnaka dia tokotshika wanɛ wakamba la lotshungɔ lawɔ la nsɔna dia salɛ anto akina kɔlɔ. Koko Nzambi howatshika dia vɔ ntetemala nsala dui sɔ pondjo.—Osambo 37:10, 11.