“Wɔladi wayofulanɛ” l’ɛlɔmbwɛlɔ ka Diolelo diaki Nzambi

Keem’edja Diolelo diaki Nzambi diambotokongɛ edja, mbuta ate lowandji la l’andja w’otondo lakashikikɛ Nzambi, layokimanyiya anto tshɛ dia monga kaamɛ ndo nsɛna lo wɔladi. Osambo 72:7 ndakaka ɔnɛ: “Wɔladi wayofulanɛ.” Ko etena kakɔna kayɔsɛna anto kaamɛ ndo lo wɔladi? Ngande wayosala Diolelo dui sɔ? Ndo ngande wakokayɛ nkondja wahɔ oma lo ɛlɔmbwɛlɔ ka Diolelo?

ETENA KAKƆNA KAYOYA DIOLELO DIAKI NZAMBI?

Bible kakatatshi awui efula wa diambo wayɛnya dia Diolelo diaki Nzambi diaya suke la ndja. Awui asɔ mbakenga “djembetelo,” mbidja ndo ata wa l’andja w’otondo, ndjala, hemɔ, adidimu wa nkɛtɛ ndo ohamelo wa ɛɔnywɛlɔ k’ɛlɛmbɛ.​—Mateo 24:3, 7, 12; Luka 21:11; Ɛnyɛlɔ 6:2-8.

Prɔfɛsiya kekina mbutaka ɔnɛ: “Lo nshi y’ekomelo, tena dia paa dia wolo mbikikɛ diayoyala. Nɛ dia anto wayoyalanga, wayolanga falanga, . . . wahakitanyiya awui w’ambutshi awɔ, akanga wa lɔhɛndɛ, waha la kɔlamelo, waha la ngandji ka lam’asa ase nkumbo, wahalange mbokana, amamanyishi, waha la ndjakimɛ, akanga w’ekonda, waha la ngandji k’akambo w’ɛlɔlɔ, . . . akanga wa ndjadiya, anangi w’ɛngɛnɔngɛnɔ lo dihole dia monga anangi wa Nzambi.” (2 Timɔte 3:1-4) Anto wokɔkɛnɛmɔlaka waonga wa ngasɔ. Koko nshi nyɛ mbamboleka anto nkɛnɛmɔla waonga asɔ.

Prɔfɛsiya shɔ yakatatɛ kotshama lo 1914. Diakɔ diele, ambeyi w’ɛkɔndɔ, anto wa lokumu ndo afundji wakɛnya woho watatshikitana andja l’ɔkɔngɔ w’ɔnɔnyi ɔsɔ. Ɛnyɛlɔ, Peter Munch, ombeyi w’ɛkɔndɔ w’ose Danemark akafunde ate: “Ta diakalɔma lo 1914 ekɔ dui dimɔtshi dia woke diakasalema l’ɔkɔndɔ w’ana w’anto. La ntondo k’ɔnɔnyi ɔsɔ, anto wakafɔnyaka dia andja wakayalɔngɔsɔmaka, . . . koko oma laasɔ, mpokoso, awui wa wɔma ndo lohetsho lakayoyalaka ahole tshɛ.”

Koko l’ɔkɔngɔ w’akambo asɔ tshɛ, wɔladi wayonga. Akambo asɔ mɛnyaka dia Diolelo diaki Nzambi diayɔlɔmbɔla nkɛtɛ k’otondo diaya suke. Ndo nto, Yeso akasha djembetelo kina ya dimɛna yayɛnya dia ekomelo kaya suke, nde akate ate: “Lokumu l’ɔlɔlɔ lɔnɛ la Diolelo layosambishama lo nkɛtɛ k’otondo oko ɔmɛnyi le anto wa lo wedja tshɛ, ko oma laasɔ ekomelo kayoya.”​—Mateo 24:14.

Lokumu l’ɔlɔlɔ lɔsɔ, mbele losango lasambisha Ɛmɛnyi wa Jehowa. Diakɔ diele, periodikɛ kalekawɔ ntondja kekɔ l’ɔtɛ a dui ɔnɛ: Tshoto y’Etangelo Mbewoyaka Diolelo diaki Jehowa. Yɔ mɛnyaka awui w’amɛna efula wayosala Diolelo diaki Nzambi lo dikambo di’anto ndo dia nkɛtɛ.

NGANDE WAYƆLƆMBƆLA DIOLELO DIAKI NZAMBI?

Okadimwelo wa dimbola sɔ mendanaka l’awui anɛi w’ohomba wayela anɛ:

1. Diolelo sɔ hadiotokamba kaanga l’ɔnɔmbɔdi wa pɔlitikɛ ɔtɔi wa l’andja ɔnɛ.

2. Ɛnɔmbɔdi wa pɔlitikɛ wa l’andja ɔnɛ hawotolanga ntshika lowandji ndo oko akanga wa dinginya, vɔ wayɔlɔshana la Diolelo diaki Nzambi.​—Osambo 2:2-9.

3. Diolelo diaki Nzambi diayolanya waolelo wa pɔlitikɛ walanga ntetemala nɔmbɔla anto. (Danyɛlɛ 2:44; Ɛnyɛlɔ 19:17-21) Ta di’ekomelo dia l’andja w’otondo sɔ mbelamɛka ɔnɛ Aramangɛdɔna.​—Ɛnyɛlɔ 16:14, 16.

4. Wanɛ tshɛ wele l’ɛse ka Diolelo dia Nzambi wayokokamɛ lo ta dia Aramangɛdɔna ndo wayɔtɔ l’andja w’oyoyo wa wɔladi. Vɔ mbelɛ Bible ɔnɛ: “Olui a woke w’anto,” ondo lofulo lawɔ layonga miliyɔ efula.​—Ɛnyɛlɔ 7:9, 10, 13, 14.

NGANDE WAKOKAYƐ NKONDJA WAHƆ OMA L’ƐLƆMBWƐLƆ KA DIOLELO?

Nna dia ntondo diahomba onto ntakola dia monga ombolami wa Diolelo diaki Nzambi ele mbeka. Diakɔ diakate Yeso lo dɔmbɛlɔ diakandalɔmbɛ Nzambi ate: “Dia vɔ nkondja lɔsɛnɔ la pondjo, weke dia keya wɛ Nzambi ɔtɔi ka mɛtɛ, la Yeso Kristo lakayatome.”​—Joani 17:3.

Naka anto mbeya Jehowa Nzambi oko onto la mɛtɛ mɛtɛ, kete vɔ wayokondja wahɔ efula. Tende bɛnyɛlɔ pende nɛ: Dui dia ntondo ele, vɔ mongaka la mbetawɔ ka wolo le nde. Mbetawɔ kɛsɔ kohikami lo tolembetelo t’eshika, mbashikikɛka dia Diolelo diaki Nzambi diekɔ dui dia mɛtɛ ndo ɔnɛ diɔ diaya suke la mbolɛ. (Hɛbɛru 11:1) Dui dia hende ele, ngandji kokawɔ Nzambi ndo asekawɔ anto fulaka. Ngandji kokawɔ Nzambi mbatshutshuyaka dia mbokitanyiya l’otema ɔtɔi. Ngandji kokawɔ wanyawɔ anto mbatshutshuyaka dia nkamba la ɛtɛkɛta wa Yeso wata ɔnɛ: “Nyosale anto kɛnɛ kalanganyu vɔ nyosalɛ.”​—Luka 6:31.

L’ɛnyɛlɔ k’ombutshi wa ngandji, Otungi aso tokombolɛka kɛnɛ koleki ɔlɔlɔ. Nde nangaka dia sho monga la kɛnɛ kelɛ Bible ɔnɛ “lɔsɛnɔ l’oshika.” (1 Timɔte 6:19) Lɔsɛnɔ la nshi nyɛ bu “lɔsɛnɔ l’oshika.” Le miliyɔ y’anto, lɔsɛnɔ lekɔ edika w’edika ndo vɔ wekɔ lo diɛnɛ dia nkondja woho wa nsɛna. Dia monga la kanyi ya kɛnɛ kelɛwɔ “lɔsɛnɔ l’oshika,” enda awui amɔtshi w’amɛna efula wayosalɛ Diolelo diaki Nzambi ambolami adiɔ.