5. Onde asui wayoshila lushi lɔmɔtshi?

Ohomba wa dimbola sɔ

Naka tekɔ l’ɛkɔkɔ wɛnya di’asui wayoshila, kete elongamelo kɛsɔ koka ndowanya ekanelo kaso ka yimba lo woho wɔsaso lɔsɛnɔ ndo tokimanyiya kaanga dia ndjasukanya la Nzambi.

Tokane yimba la dui nɛ

Anto efula nangaka dia minya asui, koko wekɔ l’elelo l’akoka wele la wɔ dia nsala dui sɔ. Tende awui wayela anɛ:

Kaanga mbambohama awui w’aseka enganga . . .

• Hemɔ ka lo doyi okongaka kiɔkɔ ya lɔnyɔi l’anto.

• Kansɛrɛ ndjakaka miliyɔ y’anto ɔnɔnyi tshɛ.

• Dr. David Bloom akafunde lo jurnalɛ mɔtshi (Frontiers in Immunology) ɔnɛ: “Kaanga mbambotomba ekanga efula w’eyoyo ɛlɔ kɛnɛ, aseka enganga watonge l’akoka wa nkɔnɔla hemɔ efula ndo nto, anto wekɔ lo ntata hemɔ y’eyoyo ndo hemɔ shɔ mongaka edja efula la ntondo ka ndjoyishola.”

Kaanga mbaya wedja ɛmɔtshi l’ɛngɔnyi efula . . .

• Ɔnɔnyi tshɛ, miliyɔ y’ana wekɔ lo mvɔ, ndo dui sɔ salemaka mbala efula l’ahole wele anto woola.

• Miliyara y’anto yekɔ lo nsɛna aha la monga l’ahole w’amɛna wa mbidjasɛ.

• Miliyɔ nkama y’anto bu l’ashi w’amɛna wa nnɔ.

Kaanga mbamboshihodia anto efula woho wasalanɛ akambo . . .

• Alapɔlɔ ɔmɔtshi wa lo tshunda dia ONU mbutaka ɔnɛ: “Lo wedja efula, anto wekɔ lo ntetemala nsala okanda wa nsondja anto ndo hawonde anto wasala dui sɔ, nɛ dia aseka lɛɛta haweye dia dui sɔ salemaka kana l’ɔtɛ wewɔ keema l’ekondjelo kahombama dia minda anto asɔ.”

  DIA MBEYA AWUI AKINA EFULA

  Enda vidɛo yele l’ɔtɛ a dui ɔnɛ: Diolelo dia Nzambi kɛdikɛdi na? yɔ tanemaka lo jw.org.

Kɛnɛ kata Bible

Nzambi ndjakiyanyaka dikambo diaso.

Nde keema la wendjudi lo paa ndo l’ɔkɛyi wele la so.

“[Nzambi] hɔnyɔla ndo hoke asui w’osoyami wɔnɔnyi; Nde hashɛ elungi kande oma le nde. Etena kakandoolelɛ dia nyanga ekimanyielo, nde akooke.”​—OSAMBO 22:24.

“Nyokitsha ekiyanu anyu tshɛ le nde, nɛ dia nde ndjakiyanyaka dikambo dianyu.”​—1 PETERO 5:7.

Asui hawototetemala pondjo.

Bible ndakaka dia kɛnɛ kasangoya Nzambi lo dikambo diaso kayokotshama.

“Nzambi . . . ayokitola asɔyi tshɛ oma lo washo awɔ, nyɔi hatoyala nto, otanda hatoyala nto, delo hatoyala nto, kaanga kandji hatoyala nto.”​—ƐNYƐLƆ 21:3, 4.

Nzambi ayonya kɛnɛ kakonya di’onto nsowa.

Nde ayosala dui sɔ lo tshimbo ya Diolelo diande, Bible mbutaka dia ɔsɔ ekɔ lowandji la mɛtɛ.

“Nzambi ka l’olongo ayotondja Diolelo diahalanyemaki pondjo. Diolelo diakɔ hadiotoshama le anto akina. . . . Diɔ diɔamɛ diayotshikala pondjo.”​—DANYƐLƐ 2:44.