ƆKƆNDƆ 13

Abarahama​—⁠ɔngɛnyi a Nzambi

ƆTƆI ɔmɔtshi a l’atei w’ahole wakatodjasɛ anto l’ɔkɔngɔ a Mvula k’Elola akelamɛka Ura. Osomba akɔ wakakome ohomba efula oma lo mvudu y’amɛna yaki lɔkɔ. Koko anto wa lɔkɔ wakatɛmɔlaka tozambizambi ta kashi. Ɔsɔ aki etshelo kawɔ oma ko Babɛlɛ. Anto wa la Ura la Babɛlɛ kondjela lokolo la Nɔa nde l’ɔnande Shɛmɛ, wanɛ wakakambɛka paka Jehowa.

L’ɔkɔngɔ diko, Nɔa kanga kɔlamelo akayovɔka, lâsɔ ko ambeta ɛnɔnyi 350 l’ɔkɔngɔ wa Mvula k’Elola. Ɛnɔnyi ehende kokele l’ɔkɔngɔ a nyɔi kande mbakotɔ pami kɛnayɛ l’osato kengo. Nde aki mɛtɛ onto lotshikitanyi l’anto akina tshɛ lo asho wa Nzambi. Lokombo lande Abarahama. Nde akadjasɛka la nkumbo kande l’osomba akɔ wa Ura.

Lushi lɔmɔtshi Nzambi akatɛ Abarahama ate: ‘Onɛ wɛ la wakiyɛ oma la Ura kele ntshɔka lo wodja wayomokɛnya.’ Onde Abarahama akakitanyiya Nzambi ndo akatshike ɛngɛnɔngɛnɔ tshɛ wa la Ura oka? Eelo, nde akasale ngasɔ. Ndo lo dikambo di’ɔnɛ Abarahama kitanyiyaka Nzambi, mbakandayeyama oko ɔngɛnyi a Nzambi.

Amɔtshi wa l’atei a nkumbo kaki Abarahama wakatshu lande etena kakandonɔ oma la Ura. She le Tera aki l’ɔnɔngɔ awɔ. Ndo Lɔta, ɔn’aki ɔnango. Ndo wadiaki Abarahama le Sara akatshu kâmɛ lawɔ. L’ɔkɔngɔ a nshi efula vɔ tshɛ wakakome lo dihole dimɔtshi diakawelɛka Harana, lawɔ mbakavu Tera. Lâsɔ ko wambangana la Ura etale.

L’ɔkɔngɔ a nshi mɔtshi, Abarahama la wa lo luudu lande wakonɔ oma la Harana ndo wakakome lo kɛtɛ yakawelɛka Kanana. Lɛkɔ mbakatotaka Jehowa ate: ‘Kɛtɛ yayomosha anayɛ yɔ nyɛ.’ Abarahama akadjasɛ la Kanana lo mvudu y’apɛma.

Nzambi akatatɛ kimanyiya Abarahama ko nde akayongaka la elui a weke w’ɛkɔkɔ ndo nyama kina la ekambi kama. Koko nde la Sara kondjala l’anawɔ hita.

Lam’akakotsha Abarahama ɛnɔnyi 99, Jehowa akawotɛ ate: ‘Lambokolaka dia wɛ ayoyala she anto wa wedja efula.’ Ko woho akɔna wayosalema dikambo sɔ lam’ele Abarahama la Sara wambolekanya ɛnɔnyi wa mbota ana na?

Etatelu 11:​27-32; 12:​1-7; 17:​1-8, 15-17; 18:​9-19.